Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2015

 TABA YA LETLAKALA LA KA NTLE | MODIMO O LEBELELA NTWA BJANG?

Pono ya Modimo ka Ntwa Lekgolong la Pele la Nywaga

Pono ya Modimo ka Ntwa Lekgolong la Pele la Nywaga

Batho ba be ba gateletšwe. Ga go pelaelo gore go swana le borakgolokhukhu ba bona, Bajuda ba lekgolong la pele la nywaga ba ile ba rapela leboelela gore Modimo a ba imolle, nakong ye e le ge ba rapelela go imollwa jokong e gatelelago ya Mmušo wa Roma. Ke moka ba ile ba kwa ka Jesu. Na o be a tla ipontšha e le Mesia yo a holofeditšwego? Ga go makatše ge ba bantši ‘ba be ba holofetše gore motho yo e be yena yo a bego a tlo hlakodiša Isiraele’ go bagateledi ba yona ba Baroma. (Luka 24:21) Eupša ga se ba ka ba imollwa. Go e na le moo, ka 70 C.E., madira a Baroma a ile a tla gomme a fediša Jerusalema le tempele ya yona.

Go ile gwa direga’ng? Ke ka baka la’ng Modimo a se a ka a lwela Bajuda, bjalo ka ge a ile a dira nakong e fetilego? Goba ke ka baka la’ng a se a ba dumelela gore ba yo lwa gore ba itokolle kgatelelong? Na pono ya Modimo ka ntwa e be e fetogile? Aowa. Eupša go be go na le selo seo se fetogilego kudu ka Bajuda. Ba be ba ganne Morwa wa Modimo, Jesu, e le Mesia. (Ditiro 2:36) Ka baka leo, ba ile ba loba tswalano ya bona e kgethegilego le Modimo e le setšhaba.—Mateo 23:37, 38.

Setšhaba sa Bajuda le Naga ya sona ya Kholofetšo di be di se sa šireletšwa ke Modimo, le gona Bajuda ba be ba ka se sa kgona go lwa dintweng tšeo Modimo a bego a di dumeletše goba a di thekga. Ka ge Jesu a be a boletše e sa le pele, ditšhegofatšo tšeo di tlišwago ke go amogelwa ke Modimo di ile tša tlošwa setšhabeng sa Isiraele ya nama gomme tša fetišetšwa setšhabeng se sefsa, e lego setšhaba sa moya, seo ka morago go bolelwago ka sona ka Beibeleng e le “Isiraele ya Modimo.” (Bagalatia 6:16; Mateo 21:43) Phuthego ya Bakriste bao ba tloditšwego ka moya e ile ya itlhatsela e le Isiraele ya Modimo ya moya. Lekgolong la pele la nywaga, ba ile ba botšwa ka go lebanya gore: “Bjale le setšhaba sa [Modimo].”—1 Petro 2:9, 10.

Ka ge bjale Bakriste ba lekgolong la pele la nywaga e be e le ‘setšhaba sa Modimo,’ na Modimo o ile a se lwela, e le gore a se lokolle kgatelelong ya Baroma? Goba na o ile a se dumelela gore se lwe le bagateledi ba sona? Aowa, ga se a dira bjalo. Ka baka la’ng? Ge go tliwa dintweng tšeo di dumeletšwego ke Modimo, ke Modimo feela yo a dirago phetho ya gore dintwa tšeo di tla lwewa neng, bjalo ka ge sehlogo se se fetilego se bontšhitše. Modimo ga se a ka a lwela Bakriste ba lekgolong le pele la nywaga dintweng, goba go ba dumelela go lwa dintweng tšeo e sego tša bodumedi. Go molaleng gore lekgolong la pele la nywaga e be e se nako ya Modimo ya gore a lwantšhe bokgopo le kgatelelo.

Ka go re’alo, go swana le bahlanka ba Modimo ba bogologolo, Bakriste bao ba lekgolong la pele la nywaga ba be ba swanetše go leta go fihlela nakong ya Modimo ya go fediša bokgopo le kgatelelo. Ge ba sa letile, Modimo o be a se a ba dumelela gore ba lwe le manaba a bona. Jesu Kriste o ile a hlalosa se gabotse dithutong tša gagwe. Ka mohlala, ga se a ka a laela balatedi ba gagwe gore ba lwe dintweng, eupša go e na le moo o ile a ba botša gore: “Tšwelang pele le rata manaba a lena le go rapelela bao ba le tlaišago.” (Mateo 5:44) Ge Jesu a be a bolela e sa le pele ka nako yeo Jerusalema ya lekgolong la pele la nywaga e bego e tla hlaselwa ke madira a Baroma, ga se a laela barutiwa ba gagwe gore ba dule gomme ba lwe, eupša o ile a ba laela gore ba tšhabe—e lego seo ba se dirilego.—Luka 21:20, 21.

Go oketša moo, moapostola Paulo o ile a budulelwa go ngwala gore: “Le se ke la itefeletša, ... gobane go ngwadilwe gwa thwe: ‘Tefetšo ke ya ka, ke tla lefetša, go re’alo Jehofa.’” (Baroma 12:19) Paulo o tsopola seo Modimo a bego a se boletše nywagakgolong e fetilego bjalo ka ge go begilwe go Lefitiko 19:18 le go  Doiteronomio 32:35. Ka ge re bone sehlogong se se fetilego, tsela e nngwe yeo Modimo a bego a e diriša go lefeletša batho ba gagwe mehleng ya bogologolo e be e le ka go ba thuša go lwa le manaba a bona. Ka go re’alo mantšu a Paulo a bontšha gore pono ya Modimo ka ntwa e be e se ya fetoga. Lekgolong la pele la nywaga, Modimo o be a sa dutše a lebelela ntwa e le tsela ya maleba ya go lefetša bahlanka ba gagwe le go fediša mekgwa e fapafapanego ya kgatelelo le bokgopo. Lega go le bjalo, go swana le ge go be go le bjalo nakong e fetilego, ke Modimo feela yo a bego a dira phetho ya gore dintwa tšeo di be di tla lwewa neng le gore ke mang yo a bego a tla lwa go tšona.

Go molaleng gore Modimo ga se a ka a dumelela Bakriste ba lekgolong la pele la nywaga gore ba lwe dintweng. Eupša go thwe’ng ka lehono? Na lehono Modimo o dumeletše sehlopha le ge e le sefe sa batho gore se lwe dintweng? Goba na gona bjale ke nako ya gore Modimo a tsene ditaba gare gomme a lwele bahlanka ba gagwe? Ge e le gabotse Modimo o lebelela ntwa bjang lehono? Sehlogo sa mafelelo lelokelelong le la dihlogo se tla araba dipotšišo tšeo.