Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2015

 TABA YA LETLAKALA LA KA NTLE | MODIMO O LEBELELA NTWA BJANG?

Pono ya Modimo ka Ntwa Mehleng ya Bogologolo

Pono ya Modimo ka Ntwa Mehleng ya Bogologolo

Batho ba be ba gateletšwe. Ba be ba rapela Modimo leboelela gore a ba imolle, eupša ba sa imollwe—e ka ba e le go se imollwe ka yona nako yeo. Batho ba e be e le Baisiraele, e lego setšhaba sa Modimo sa mehleng ya bogologolo. Ba be ba gateletšwe ke setšhaba se matla sa Baegipita. (Ekisodo 1:13, 14) Ka nywaga e mentši, Baisiraele ba ile ba letela Modimo gore a fediše kgatelelo ya setšhaba sa Baegipita. Nako ya Modimo ya go tšea kgato e ile ya feleletša e fihlile. (Ekisodo 3:7-10) Beibele e bega gore Modimo o ile a lwa le Baegipita ka boyena. O ile a otla Egipita ka dikotlo tše šoro tše di latelanago, ke moka a fediša kgoši ya Egipita le madira a yona Lewatleng le Lehwibidu. (Psalme 136:15) Jehofa Modimo o ile a ipontšha e le “mogale wa ntwa” bakeng sa setšhaba sa gagwe.—Ekisodo 15:3, 4.

Taba ya gore Modimo o ile a lwa le Baegipita ka boyena e bontšha gore ga a ganetše dintwa ka moka. Mabakeng a mangwe, o ile a dumelela setšhaba sa gagwe e lego Isiraele gore se lwe ntweng. Ka mohlala, o ile a se laela gore se lwe le Bakanana, bao e bego e le ba babe ka mo go feteletšego. (Doiteronomio 9:5; 20:17, 18) O ile a laela Kgoši Dafida wa setšhaba sa Isiraele gore a lwe le Bafilisita ba bagateledi. Modimo o ile a ba a nea Dafida leano la ntwa leo le bego le tla kgonthišetša gore a fenye.—2 Samuele 5:17-25.

Dipego tšeo tša Beibele di utolla gore ge mekgwa e itšego ya bokgopo le ya kgatelelo e be e bea Baisiraele kotsing, Modimo o be a dumelela gore go be le ntwa e le gore a šireletše setšhaba sa gagwe le go šireletša borapedi bja therešo. Eupša ela hloko dintlha tše tharo tše bohlokwa tšeo di latelago tša mabapi le dintwa tše bjalo tšeo di dumeletšwego ke Modimo.

  1. KE MODIMO FEELA YO A BEGO A DIRA PHETHO YA GORE KE MANG YOO A TLAGO GO LWA NTWENG. Lebakeng le lengwe, Modimo o ile a botša Baisiraele gore: “Go ka se nyakege gore le lwe [ntweng ye].” Ka lebaka lefe? Modimo ka boyena o be a tla ba lwela. (2 Dikoronika 20:17; 32:7, 8) O ile a dira bjalo gantši, bjalo ka ge a ile a dira lebakeng leo go boletšwego ka lona mathomong a sehlogo se. Dinakong tše dingwe, Modimo o ile a laela batho ba gagwe Isiraeleng ya bogologolo gore ba lwe dintweng tšeo a di dumeletšego, e lego tšeo di bego di lwelwa go šireletša Naga ya bona ya Kholofetšo.—Doiteronomio 7:1, 2; Joshua 10:40.

  2. KE MODIMO FEELA YO A BEGO A DIRA PHETHO YA GORE DINTWA TŠEO DI BE DI TLA LWEWA NENG. Bahlanka ba Modimo ba be ba swanetše go letela ka go se fele pelo nako ya Modimo e beilwego gore ba lwantšhe  kgatelelo le bobe tšeo di bego di ba dikologile. Go fihlela nako yeo e fihla, ba be ba sa lwe. Ge ba be ba ka lwa, ba be ba se sa amogelwa ke Modimo. Ge e le gabotse, Beibele e bontšha gore ge Baisiraele ba be ba elwa dintweng tšeo Modimo a sa kago a di dumelela, gantši ditlamorago tša gona e be e le tše šoro. *

  3. Le ge Modimo a ile a lwa le Bakanana, o ile a phološa ba bangwe, ba bjalo ka Rahaba le ba lapa la gabo

    MODIMO GA A KGAHLWE KE GO HWA GA BATHO, GO AKARETŠA LE BATHO BA KGOPO. Jehofa Modimo ke Mothopo wa bophelo le Mmopi wa batho. (Psalme 36:9) Ka baka leo, ga a nyake go bona batho ba ehwa. Lega go le bjalo, ka manyami, go na le batho bao ba logago maanomabe a go gatelela gotee le go bolaya ba bangwe. (Psalme 37:12, 14) Ka dinako tše dingwe e le ge a fediša bobe bjo bjalo, Modimo o ile a dumelela dintwa tša go lwa le batho ba kgopo. Lega go le bjalo, nywageng ka moka yeo a ilego a dumelela gore Baisiraele ba lwe dintweng tšeo, o be a sa dutše a ‘gaugela’ le go ‘diega go galefela’ bagateledi ba Isiraele. (Psalme 86:15) Ka mohlala, o be a laetše gore pele Baisiraele ba ka lwa le motse, ba be ba swanetše go ‘o botša gore ba tlile ka khutšo’ e le gore badudi ba be le sebaka sa go fetoša ditsela tša bona le go efoga ntwa. (Doiteronomio 20:10-13) Ka mokgwa wo, Modimo o be a bontšha gore ga a “kgahlwe ke lehu la yo kgopo, eupša [o] kgahlwa ke gore motho yo kgopo a furalele tsela ya gagwe gomme a tšwele pele a phela.”—Hesekiele 33:11, 14-16. *

Go ya ka seo se ahlaahlilwego ka mo godimo re bona gore mehleng ya bogologolo, Modimo o be a lebelela ntwa e le tsela ya maleba ya go fediša dibopego tše di fapafapanego tša kgatelelo le bokgopo. Eupša e be e le Modimo—e sego batho—yoo ka mo go swanetšego a bego a dira phetho ya gore dintwa tše bjalo di be di tla lwewa neng le gore ke mang yo a bego a tla lwa. Le gona na Modimo o be a fišegela go lwa ntweng, ka tsela ya go nyorelwa madi? Ga go bjalo le gatee. Ge e le gabotse o hloile bošoro. (Psalme 11:5) Na pono ya Modimo ka ntwa e ile ya fetoga ge Morwa wa gagwe, Jesu Kriste, a be a thoma bodiredi bja gagwe lekgolong la pele la nywaga?

^ par. 7 Ka mohlala, lebakeng le lengwe, Baisiraele ba ile ba fenywa ge ba be ba elwa le Baamaleke le Bakanana ka morago ga gore Modimo a ba laele gore ba se dire bjalo. (Numeri 14:41-45) Nywaga e mentši ka morago, Kgoši Josia yo a botegago o ile a lwa ntweng ntle le tumelelo ya Modimo, gomme tiro ye ya bošilo e ile ya mo lobiša bophelo bja gagwe.—2 Dikoronika 35:20-24.

^ par. 8 Baisiraele ga se ba ka ba botša Bakanana gore ba tlile ka khutšo pele ba ka lwa le bona. Ka baka la’ng? Ka gobane Bakanana ba be ba ile ba newa nywaga e 400 gore ba fetoše ditsela tša bona tše kgopo. Nakong ya ge Baisiraele ba etla go lwa le bona, Bakanana, e le sehlopha, e be e le ba kgopo ba sa ikemišetša go fetoga. (Genesi 15:13-16) Ka go re’alo, ba be ba tla fedišetšwa sa ruri. Lega go le bjalo, Bakanana bao ba ilego ba fetoša ditsela tša bona ba ile ba phološwa.—Joshua 6:25; 9:3-27.

Ithute ka mo go oketšegilego

Baisiraele ba Tsena Kanana

Ge Baisiraele ba be ba tsena Kanana, ke ka baka la’ng Jehofa a ile a phološa Rahaba le lapa la gabo kua Jeriko?

Rahaba o Ile a “Bolelwa Gore o Lokile ka Mediro”

Kanegelo ya Rahaba e bontšha bjang gore ga go na le o tee wa rena yo a sego bohlokwa go Jehofa? Re ka ithuta’ng tumelong ya gagwe?