Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2015

 TABA YA LETLAKALA LA KA NTLE

Modimo o Lebelela Ntwa Bjang?

Modimo o Lebelela Ntwa Bjang?

O be o ka araba potšišo yeo bjang? Batho ba bantši ba nagana gore Modimo o dumelela dintwa. Ba bolela gore nakong e fetilego o ile a laela barapedi ba bangwe ba gagwe gore ba lwe dintweng; pego ya Beibele e hlatsela seo. Lega go le bjalo, ba bangwe ba lemoga gore Morwa wa Modimo, e lego Jesu, o ile a ruta balatedi ba gagwe gore ba rate manaba a bona. (Mateo 5:43, 44) Ka gona ba bolela gore nakong e itšego pono ya Modimo ka ntwa e ile ya fetoga le gore lehono ga a dumelele ntwa.

Na wena o nagana’ng? Na Modimo o dumelela dintwa? Ge e ba go le bjalo, na Modimo o tšea lehlakore la mang dintweng tša lehono? Go hwetša dikarabo tša dipotšišo tše go ka kgoma tsela yeo o lebelelago dintwa ka yona. Ka mohlala, ge e ba o be o tseba gore Modimo ga a fo dumelela dintwa eupša e bile o thekga lehlakore leo o le ratago ntweng e itšego, go molaleng gore o be o tla thabela lehlakore leo o le tšerego tabeng yeo, o kgodišegile gore lehlakore la gago le tla fenya. Ka lehlakoreng le lengwe, na o be o tla ikwa bjang ge o be o ka tseba gore Modimo o thekga lehlakore leo le lwantšhago la gago ntweng? Ga go pelaelo gore o be o tla nagana lefsa ka boemo bja gago tabeng yeo.

Go na le selo se bohlokwa kudu seo se swanetšego go elwa hloko. Go tseba kamoo Modimo a lebelelago dintwa go ka kgoma kamoo o lebelelago Modimo ka gona. Ge e ba o le yo mongwe wa ba dimilione bao ba ilego ba kwešwa ke dintwa bohloko o šoro, ga go pelaelo gore o nyaka go tseba karabo ya potšišo e rego: Go ya kamoo ba bangwe ba naganago, na Modimo ke mohlohleletši wa ntwa yoo a dumelelago goba gaešita le yo a kgothaletšago tlaišego yeo e sepedišanago le dintwa? Goba na mohlomongwe a ka ba a sa dire selo gomme a se na taba le go phela gabotse ga bao ba gateletšwego?

O ka makatšwa ke go tseba gore karabo ya Beibele e tloga e sa swane le ge e le efe ya dikgopolo tšeo. Go feta moo, go tloga kgale go fihla lehono, pono ya Modimo ka dintwa ga se ya fetoga. Anke re hlahlobeng seo Beibele e se bolelago mabapi le kamoo Modimo a bego a lebelela dintwa ka gona mehleng ya bogologolo le lekgolong la pele la nywaga, ge Jesu a be a sa le lefaseng. Seo se tla re thuša go bona kamoo Modimo a lebelelago ntwa ka gona lehono le go bona ge e ba ntwa e tla ba karolo ya bokamoso bja batho.