Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI OCTOBER 2015

 TABA YA LETLAKALA LA KA NTLE | NA GO RAPELA GO A HOLA?

Lebaka Leo Modimo a re Laletšago Gore re Rapele

Lebaka Leo Modimo a re Laletšago Gore re Rapele

Modimo o re laletša go ba bagwera ba gagwe.

Bagwera ba a boledišana e le gore ba hlagolele tswalano e botse. Ka mo go swanago, Modimo o re laletša gore re bolele le yena, e lego seo se re bulelago tsela ya go ba le segwera sa kgauswi le yena. O re: “Le tla mpitša, la tla la nthapela, gomme ke tla le theetša.” (Jeremia 29:12) Ge o dutše o bolela le Modimo, o tla ‘mmatamela gomme o tla go batamela.’ (Jakobo 4:8) Beibele e re kgonthišetša ka gore: “Jehofa o kgauswi le bohle bao ba mmitšago.” (Psalme 145:18) Ge re dula re rapela Modimo, ke moo segwera sa rena le yena se tlago go gola.

“Jehofa o kgauswi le bohle bao ba mmitšago.” —Psalme 145:18

Modimo o nyaka go go thuša.

Jesu o itše: “Ke mang mo gare ga lena yo ge morwa wa gagwe a mo kgopelago senkgwa a ka mo fago leswika? Goba mohlomongwe ge a kgopela hlapi, a ka mo fago noga? Ka gona, ge e ba lena . . . le tseba go nea bana ba lena dimpho tše dibotse, gona Tatago lena yo a lego magodimong o tla nea gakaakang dilo tše dibotse go bao ba mo kgopelago!” (Mateo 7:9-11) Ee, Modimo o go laletša gore o rapele ka gobane “o a [go] hlokomela” le gona o nyaka go go thuša. (1 Petro 5:7) Le gona o go laletša gore o mo tsebiše mathata a gago. Beibele e re botša gore: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga.”—Bafilipi 4:6.

Batho ba nyaka dilo tša moya.

Ditsebi tša tlhago ya batho di bone gore batho ba dimilione tše makgolo ba nagana gore ba swanetše go rapela. Gaešita le bailamodimo le bao ba belaelago go ba gona ga Modimo (ma-agnostic) ba balelwa palong yeo. * Se se hlatsela taba ya gore batho ba bopilwe ba nyaka dilo tša moya. Jesu o itše: “Go thaba bao ba lemogago gore ba nyaka dilo tša moya.” (Mateo 5:3) Tsela e nngwe ya go kgotsofatša senyakwa seo ke ka go boledišana le Modimo ka mehla.

Ge re amogela taletšo ya Modimo ya go mo rapela, re ka letela mehola efe?

^ par. 8 Nyakišišo yeo e dirilwego ka 2012 Lefelong la Nyakišišo la Pew e utolotše gore 11 lekgolong ya bailamodimo goba ma-agnostic bao ba lego United States ba rapela bonyenyane gatee mo kgweding.