Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI OCTOBER 2015

Na o be o Tseba?

Na o be o Tseba?

Heroda o ile a lebeletšana le mathata afe ge a be a tsošološa tempele ya kua Jerusalema?

Mathomong, Solomone o ile a aga tempele ya Jerusalema mmotong gomme a dira gore go agwe maboto a go e ageletša ka mahlakoreng a ka bohlabela le a ka bodikela a mmoto woo e le ge a leka go lekanetša meboto go dikologa moago woo o mokgethwa. Ka ge Heroda a be a nyaka tempele e phalago ya Solomone ka bobotse, o ile a thoma go mpshafatša le go katološa tempele yona yeo.

Baentšeneare ba Heroda ba ile ba oketša lebala leo le bego le le ka leboa la tempele e le gore ba katološe meboto ya moo. Go yela ka lehlakoreng la ka borwa, mmoto o ile wa phagamišwa ka dimithara tše 32. Go ile gwa agwa molokeloke wa meago ya ka tlase ga mobu ya go agwa ka maswika gotee le leboto le lekoto la go e ageletša. Dikarolong tše dingwe, leboto le le be le phagame ka dimithara tše 50.

Heroda o ile a leka gore a se kgopiše Bajuda goba go šitiša ditirelo tša tempeleng le dihlabelo tša gona. Radihistori wa Mojuda e lego Josephus o re Heroda o ile a ba a ruta baperisita ba Bajuda go ba baagi bao ba agago ka maswika gotee le babetli e le gore go se be le mošomi yo a sa swanelegego yoo a tsenago mafelong ao a makgethwa.

Heroda ga se a bona mošomo woo ge o fela. Ka 30 C.E., tempele e be e na le nywaga e 46 e tsošološwa. (Johane 2:20) Mošomo woo o ile wa feleletšwa ke setlogolwana sa Heroda e lego Agaripa II, bogareng bja lekgolo la pele la nywaga C.E.

Ke ka baka la eng batho ba sehlakahlakeng sa Melite ba be ba nagana gore moapostola Paulo ke mmolai?

Modimogadi wa toka (ka go le letshadi) o itia modimogadi wa go hloka toka

Batho ba bangwe ba sehlakahlakeng sa Melite ba ka ba ba be ba tutueditšwe ke dikgopolo tša bodumedi bja Bagerika. Ela hloko seo se diregilego ka morago ga gore Paulo a robegelwe ke sekepe sehlakahlakeng sa Melite, ka ge go ngwadilwe pukung ya Ditiro. Ge moapostola a be a bea ngata ya dikgong godimo ga mollo woo o bego o goleditšwe bao ba bego ba sepela le Paulo bao ba robegetšwego ke sekepe gore ba ruthele, noga ya marabe e ile ya itata seatleng sa gagwe. Eitše ge badudi ba sehlakahlakeng ba bona seo, ba re: “Ruri motho yo ke mmolai, gomme le ge a fihlile mo go bolokegilego go tšwa lewatleng, toka ga se ya mo dumelela go tšwela pele a phela.”—Ditiro 28:4.

Lentšu la Segerika bakeng sa “toka” leo le dirišitšwego mo ke “di’ke.” Lentšu leo le ka bolela toka ka kgopolo ya kakaretšo. Lega go le bjalo, dinonwaneng tša Segerika, Dike e be e le leina la modimogadi wa toka. Go be go naganwa gore o be a okamela ditaba tša batho gomme a begela modimo Tseuse go hloka toka mo go sa lemogegego, e le gore motho yo a nago le molato a otlwe. Ka gona, go ya ka pukuntšu e nngwe, badudi ba sehlakahlakeng sa Melite ba ka ba ba be ba nagana gore: “Le ge Paulo a be a phologile lewatleng, ke motho yo a swailwego yoo bjale a swerwego ke modimogadi Dike . . . ka noga ya marabe.” Batho ba ile ba fetoša menagano ya bona ge ba be ba bona gabotse gore Paulo o be a sa gobala.