Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI SEPTEMBER 2015

 PHIHLELO

Go Hwetša Selo se se Phalago Botumo

Go Hwetša Selo se se Phalago Botumo

Bošegong bjo bongwe ka 1984, ke ile ka se sa ba mofsa yo a tlwaelegilego gomme ka ba motho yo a tumilego. Ke ile ka bewa go ba Mmasebotsana wa Hong Kong. Seswantšho sa ka se be se le letlakaleng la ka ntle la dimakasine le la dikuranta. Ke be ke opela, ke tantsha, ke bolela pele ga mašaba, ke swara mananeo a thelebišene, ke apara diaparo tše dibotse le go tšwelela bathong ke na le batho ba bohlokwa, ba swanago le mmušiši wa Hong Kong.

Ngwageng o latelago, ke ile ka thoma go bapala dimobing gomme ka makga a mmalwa ke be ke bapala karolo ya sebapadi sa thwadi. Babegi ba ditaba ba be ba nyaka go tseba ka bophelo bja ka, batšea-diswantšho ba nyaka seswantšho sa ka gomme batho ba tumilego ba be ba ntaletša ba nyaka ke eba gona dimobing tše di bapalwago ka lekga la pele, meletlong ya kgakolo, dijong tša matena le dijong tša mantšiboa. Ke be ke dula ke šeditšwe.

Ke bapala mobing wa bagale

Lega go le bjalo, ganyenyane-ganyenyane ke ile ka lemoga gore bophelo bjo bo be bo sa kgahliše go etša kamoo ke bego ke ile ka nagana ka gona. Ke be ke šoma kudu dimobing tša bagale, gomme seo se be se le kotsi kudu. Bakeng sa dikarolo tše kotsi difiliming tša Hong Kong go be go sa dirišwe batho bao ba tlwaetšego go dira dilo tšeo gantši, go etša ge dibapadi tša difiliming tša Hollywood di be di dira. Ka gona, ke be ke itirela dikarolo tšeo tše kotsi, go swana le go fofa koloi ka sethuthuthu. Difilimi tše dintši tšeo ke ilego ka bapala ke le sebapadi sa thwadi go tšona e be e le tša boitshwaro bjo gobogilego le tša bošoro. Tše dingwe e be e le tša botemona.

Ka 1995, ke ile ka nyalana le motšweletši wa dimobi. Le ge go be go bonagala ke be ke na le dilo tšohle tšeo di ka nthabišago—botumo, lehumo le monna yo a nthatago—ke be ke gateletšegile e bile ke nyamile. Ke ile ka phetha ka go tlogela go bapala difiliming.

GO GOPOLA TUMELO YA KA YA BJANENG

Ke ile ka thoma go gopola ke thabile ka tumelo yeo ke bego ke na le yona ge ke be ke sa le ngwanenyana yo monyenyane. Ka nako yeo, Mokibelong o mongwe le o mongwe nna le mogolwake re be re etela lapa la Dihlatse tša Jehofa. Tate wa gona e lego Joe McGrath, o be a ithuta Beibele le rena gotee le barwedi ba gagwe ba bararo. Ba be ba na le lapa le borutho le le nago le lerato, gomme yo re bego re mmitša malome Joe o be a swara mosadi wa gagwe le bana ba gagwe ka tlhompho. Gape ke be ke thabela go ya le bona dibokeng tša bona tša Bokriste. Ka dinako tše dingwe re be re eya dikopanong tše dikgolo. Dinako tšeo e be e le tše di thabišago. Ke be ke ikwa ke šireletšegile ge ke na le Dihlatse.

 Go fapana le boemo bjoo, nna ke be ke diragalelwa ke tše bohloko ka gešo. Tsela yeo tate a bego a phela ka yona e be e kweša mma bohloko kudu, gomme o ile a gateletšega kudu. Ge ke be ke na le nywaga e ka bago e lesome, mma o ile a kgaotša go kopanela le Dihlatse tša Jehofa. Ke ile ka tšwela pele ka pelo e sa felelago gomme ka kolobetšwa ke na le nywaga e 17. Eupša ka moragonyana ga moo, ke ile ka wela boitshwarong bjo e sego bja Bokriste gomme ka se sa ba karolo ya phuthego.

KE ILE KA PHETHA KA GORE KE BOE

Ka moragonyana ga gore ke nyalwe, bagolo ba babedi ba phuthego ya Dihlatse tša Jehofa ya moo ke bego ke dula gona ba ile ba nketela. Ba ile ba hlalosa kamoo ke bego nka boela go Jehofa Modimo ka gona, gomme ba rulaganya gore ke thušwe ke moromiwa yo a bitšwago Cindy. Mo nakong ye, ka ge tumelo ya ka e be e fokola kudu, ke ile ka mo kgopela gore a mpontšhe gore Beibele ke Lentšu la Modimo e le ka kgonthe. O ile a mpontšha mehlala ya diporofeto tša Beibele tšeo di ilego tša phethagala. Ganyenyane-ganyenyane, re ile ra ba bagwera ba kgauswi gomme a nkgopela gore a ithute le nna dithuto tša motheo tša Beibele. Ke ile ka dumela. E be e le lekga la mathomo ke thoma go lemoga gore Jehofa ke Modimo yo lerato, yo a nyakago gore ke thabe.

Ge ke be ke thoma go boela ke eya dibokeng tša Bokriste, ke ile ka hwetša gore ke thabela kudu go ba gare ga Dihlatse go feta go ba gare ga batho ba kgwebong ya dimobi. Eupša dilo tše di ntiragaletšego bjaneng di ile tša ntlogela ke ikwa gore nka se kgone go bota motho, e bile ke be ke sa ithate. Setho sa phuthego se ile sa nthuša ge se be se mpontšha ka Beibeleng kamoo nka swaraganago le bothata bjoo bja maikwelo, ka ba ka ithuta le go dira bagwera ba kgonthe.

SELO SE SE PHALAGO BOTUMO

Ka 1997, nna le monna wa ka re ile ra hudugela Hollywood, California, U.S.A. Ge ke le moo ke ile ka swarega kudu ka go thuša batho go holwa ke bohlale bjo bo tšwago Lentšung la Modimo. Go ruta batho ka Beibele go nkgotsofaditše kudu go feta botumo ka moka bja go bapala difiliming le go bapala ke le sebapadi sa thwadi dimobing. Ka mohlala, ka 2002, ke ile ka kopana le Cheri yo a tšwago Hong Kong, yo e bego e le kgale re tlwaelane. Go be go na le dilo tše dintši tšeo re bego re swana ka tšona bophelong. O be a bile Mmasebotsana wa Hong Kong ngwageng wa ka pele ga woo ke bilego yena. Ge e le gabotse, ge ke be ke thopa sefoka sa go ba mmasebotsana, ke yena yo a ilego a nkapeša seala sa go ba maemong ao. Le yena o ile a ba sebapadi sa dimobing gomme ka morago a ba motšweletši wa tšona, a šoma le balaodi ba tumilego. Le yena o be a hudugetše Hollywood.

Ke ile ka kwela Cheri bohloko ge ke be ke ekwa gore lesogana leo a bego a tlo nyalana le lona le be le bolailwe ke bolwetši bja pelo. O be a sa hwetše khomotšo bodumeding bja gagwe bja Bobuddha. Ka go swana le nna, o be a fihleletše bophelo bja botumo bjoo ba bangwe ba bo dumago, fela o be a nyamile e bile a sa kgone go bota motho. Ke ile ka thoma go boledišana le yena ka seo ke bego ke ithutile sona ka Beibeleng, eupša go ba ga gagwe Mobuddha go ile gwa mo thatafaletša go kwešiša seo.

Mogwera wa ka Cheri a le moo go bapalelwago mobi

Ka letšatši le lengwe ka 2003, Cheri o ile a nteletša mogala a le Vancouver, Canada, moo a bego a dira filimi gona. O ile a mpotša a thabile gore o be a sepela ka koloi a thabela go boga naga ge gateetee a thoma go rapela ka go hlaboša a re: “Mpotše mo, Modimo wa therešo ke Mang? Leina la gago o mang?” Ka nako yeo o ile a feta Holong ya Mmušo gomme a bona leina la Jehofa. O ile a nagana gore seo e be e le karabo e tšwago go Modimo, gomme a nyaka gore a kopane le Dihlatse tša Jehofa kapejana ka mo go ka kgonegago. Ke ile ka mo direla dithulaganyo, gomme  lebakeng la matšatši a sego kae ke ge a le dibokeng tša phuthego ya se-China kua Vancouver.

Ka morago Cheri o ile a re go nna: “Batho ba ba nkgahlegela e le ka kgonthe. Ke kgona go ba botša kamoo ke ikwago ka gona.” Ke be ke thabile kudu go kwa seo ka gobane ge Cheri a be a sa le kgwebong ya dimobi, o be a se na bagwera le ka mohla. Cheri o ile a tšwela pele a eya dibokeng. Eupša ka 2005, o ile a saena konteraka ya go tšweletša difilimi tše pedi tša ditiragalo tše dikgolo kua China, e lego seo se ilego sa dira gore a swanelwe ke go boela Hong Kong. Se se thabišago ke gore ka 2006, Cheri o ile a neela bophelo bja gagwe go Jehofa gomme a kolobetšwa kopanong ya Dihlatse kua Hong Kong. Gaešita le ge a be a nyaka go hlankela Jehofa ka botlalo kudu, go šoma ga gagwe kgwebong ya dimobi go be go mo thatafaletša go dira bjalo, gomme o be a tloga a se a thaba.

LETHABO LA GO THUŠA BA BANGWE

Ka 2009, bophelo bja Cheri bo ile bja fetoga ka mo go feletšego. O ile a dira phetho ya go tšwa intasetering ya dimobi e le gore a hlankele Jehofa ka botlalo. O ile a ba le bagwera ba bantši ba bafsa ka phuthegong ya Bokriste. O ile a ba mmoledi wa nako e tletšego wa ditaba tše dibotse tša Mmušo gomme a tloga a thabela go thuša batho go hwetša tsela e kaone ya bophelo.—Mateo 24:14.

Ke moka Cheri o ile a dira phetho ya go ithuta Senepal bakeng sa go thekga sehlopha seo se golago sa Dihlatse tšeo di bolelago Senepal kua Hong Kong. Ke nyaka go hlalosa gore Manepal a mantši kua Hong Kong a na le go hlokomologwa goba go nyatšwa ka baka la gore a sa kgone go bolela Seisemane goba se-China gabotse le ka baka la gore meetlo ya ona e le e fapanego. Cheri o ile a mpotša kamoo a tlogago a thabela go thuša batho bao go kwešiša Beibele. Ka mohlala, ka letšatši le lengwe ge a be a eya ka ntlo le ntlo, o ile a kopana le mosadi wa Monepal yo a bego a sa tsebe gakaalo ka Jesu eupša a sa tsebe selo ka Modimo wa therešo e lego Jehofa. Cheri o ile a diriša Beibele go mmontšha gore Jesu o be a rapela Tatagwe yo a lego legodimong. Ge mosadi yoo a lemoga gore le yena o be a ka rapela Modimo wa therešo, yoo leina la gagwe e lego Jehofa, o ile a amogela ditaba tše dibotse ka pelo ka moka. Go se go ye kae ke ge monna wa gagwe le morwedi wa gagwe le bona ba ithuta Beibele.—Psalme 83:18; Luka 22:41, 42.

Cheri lehono

Ge ke be ke bona kamoo Cheri a tlogago a thabela go bolela ditaba tše dibotse ka nako e tletšego, ke ile ka ipotšiša gore: ‘Ke thibelwa ke’ng go dira seo a se dirago?’ Ka nako yeo, le nna ke be ke boetše Hong Kong, ke dula gona. Ke ile ka dira phetho ya go rulaganya bophelo bja ka gore ke tšee karolo ka botlalo go ruteng ba bangwe therešo ya Beibele. Ke hweditše gore go theetša batho le go ba thuša go kwešiša Lentšu la Modimo go nthabiša e le ka kgonthe.

Ke hweditše gore go thuša batho go kwešiša Lentšu la Modimo go nthabiša e le ka kgonthe

Ka mohlala, ke kgonne go ithuta Beibele le mosadi wa mo-Vietnam yo a bego a dula a nyamile e bile a phela a sekile megokgo. Ga bjale o thabela bophelo e bile o tloga a thabela go kopanela le phuthego.

Nna le Cheri re hweditše selo seo se phalago botumo kudu. Gaešita le ge re be re thabela go ba intasetering ya dimobi e bile go re tlišetša botumo, fela go ruta batho ka Jehofa Modimo go kgotsofatša le go feta ka ge go iša letago go Modimo. Ruri re bone therešo ya mantšu a Jesu a rego: “Go na le lethabo le legolo go neeng go feta go amogeleng.”—Ditiro 20:35.

Ithute ka mo go oketšegilego

Ke ka Baka la Eng ke Swanetše go Phema go Ekiša Batho Bao ba Bontšhwago Intasetering ya Boithabišo le Dipapatšong?—Karolo 1: Bakeng sa Basetsana

Bafsa ba bantši bao ba naganago gore ba itirela mokgwa wa bona wa bophelo woo o sa swanego le wa ba bangwe ge e le gabotse ba ekiša seo ba se bonago intasetering ye le dipapatšong.