Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI SEPTEMBER 2015

Na o Nyamišitšwe ke Modimo?

Na o Nyamišitšwe ke Modimo?

“KE KA BAKA LA’NG SE SE DIRAGALELA NNA? Ke ka baka la’ng Modimo a dumeletše gore ke diragalelwe ke se?” Tšeo ke dipotšišo tše di bego di tshwenya Sidnei wa nywaga e 24 yo a tšwago Brazil. Ka morago ga gore a be kotsing ge a be a le papading ya go thelela meetseng, o ile a dulela sa ruri setulong sa digole.

Go tlaišega ka baka la kotsi, bolwetši, go hwelwa ke moratiwa, kotsi ya tlhago goba ntwa di ka fo dira gore batho ba ikwe ba nyamišitšwe ke Modimo. Ye ga se taba e mpsha. Mopatriareka Jobo wa bogologolo o ile a welwa ke masetlapelo a latelana. Ka phošo o ile a bea Modimo molato, a re: “Ke llela gore o nthuše, eupša ga o nkarabe; ke eme, gore o nkele hloko. O iphetotše yo sehlogo go nna; o mpontšha bonaba ka matla a feletšego a seatla sa gago.”—Jobo 30:20, 21.

Jobo o be a sa tsebe gore mathata a gagwe a tšwa kae le gore a be a mo wela ka lebaka lefe goba a sa tsebe lebaka la gore mathata ao a dumelelwe. Se se thabišago ke gore Beibele e re sedimoša ka lebaka leo ka lona ditiragalo tše bjalo di diregago gotee le mabapi le kamoo re ka swaraganago le tšona.

NA MODIMO O BE A RERILE GORE BATHO BA TLAIŠEGE?

Beibele ge e re botša ka Modimo e re: “Mediro ya gagwe e phethagetše, gobane ditsela tša gagwe ka moka ke tša toka. Ke Modimo yo a botegago, yoo go yena go se nago go hloka toka.” (Doiteronomio 32:4) Ka ge go le bjalo, na go a dumelelana goba go a kwagala gore Modimo yo a “botegago, yoo go yena go se nago go hloka toka” o be a ka rerela batho gore ba tlaišege goba gore o be a ka diriša masetlapelo go ba otla goba go ba dira gore e be ba sekilego?

Ka mo go fapanego, Beibele e re botša gore: “A go se be le yo a rego ge a le molekong a re: ‘Ke lekwa ke Modimo.’ Gobane Modimo a ka se ke a lekwa ka dilo tše mpe le gona yena ga a leke motho le ge e le ofe.” (Jakobo 1:13) Ge e le gabotse, ka Beibeleng re ithuta gore Modimo o dirile batho ba phethagetše mathomong. O ile a nea batho ba pele e lego Adama le Efa legae le lebotse, dinyakwa ka moka tša bophelo le mošomo o nago le morero gore ba o dire. Modimo o ile a ba botša gore: “Tswalang le ate le tlale lefase le be le le fenye.” Ruri Adama le Efa ba be ba se na lebaka la gore ba nyamišwe ke Modimo.—Genesi 1:28.

Eupša lehono, re phela maemong ao a sa phethagalago. Ge e le gabotse, go theoša le histori, masetlapelo a batho e bile a šoro. Tlhaloso ye e a kwagala ge e re: “Tlholo yohle e tšwela pele e tsetsela gotee gomme e ekwa bohloko gotee go fihla bjale.” (Baroma 8:22) Go diregile’ng?

KE KA BAKA LA ENG GO NA LE TLAIŠEGO?

E le gore re kwešiše lebaka leo ka lona go nago le tlaišego, re swanetše go boela morago nakong yeo tlaišego e thomilego ka yona. Ka ge Adama le Efa ba be ba tutueditšwe ke morongwa wa lerabele, yo ka morago a ilego a bitšwa Sathane Diabolo, ba ile ba gana ditekanyetšo tša Modimo tša se se lokilego le se se fošagetšego ka ge di bontšhwa ka taelo yeo a ba neilego yona ya gore ba gane go ja dienywa tša “sehlare sa go tseba botse le bobe.” Diabolo o ile a botša Efa gore ba be ba ka se hwe ge ba be ba ka se kwe Modimo, ka go re’alo a latofatša Modimo ka gore o na le maaka. Le gona Sathane o ile a latofatša Modimo ka gore o tima balata ba gagwe tshwanelo ya go ikgethela botse le bobe. (Genesi 2:17; 3:1-6) Sathane o be a bolela gore batho ba tla phela gakaone ge ba sa bušwe ke Modimo. Tše ka moka di ile tša tsoša kgang e bohlokwa kudu e rego, Na Modimo o be a swanetše go buša?

Diabolo o ile a tsoša kgang e nngwe gape. O ile a latofatša batho ka gore ba hlankela Modimo ka mabaka a boithati. Diabolo o ile a botša Modimo ka Jobo yo a botegago, a re: “Na ga se wena o mo ageleditšego ka legora, yena le bohle ba ntlo ya gagwe gotee le se sengwe le se sengwe seo a nago le sona go mo dikologa? . . . Eupša, hle otlolla seatla sa gago o kgwathe selo se sengwe le se sengwe se a nago le sona gomme o bone ge e ba a ka se go roge mahlong.” (Jobo 1:10, 11) Le ge Sathane a be a bolela ka Jobo, o be a era gore batho ka moka ba hlankela Modimo ka mabaka a boithati.

KAMOO MODIMO A RAROLLAGO DIKGANG KA GONA

Tsela e kaone kudu ya go rarollela dikgang tše sa ruri e be e tla ba efe? Modimo, yo a lego bohlale ka mo go feletšego, o be a na le tharollo e kaone kudu—yeo e sa re tlogelego re nyamile. (Baroma 11:33) O ile a dira phetho ya go dumelela batho gore ba ipuše ka nako e itšego gomme a tlogelela gore ditlamorago tša  yona di bontšhe gore ke pušo ya mang yeo e phagamego.

Maemo a lehono a hlobaetšago lefaseng ke bohlatse bjo bo lego molaleng bja gore pušo ya motho e paletšwe ka mo go feletšego. Ga se feela gore mebušo ya lefase e paletšwe ke go tliša khutšo, tšhireletšego le lethabo, eupša e nyakile go senyetša lefase sa ruri. Se se gatelela therešo e bohlokwa e boletšwego ka Beibeleng, e rego: “Ga go matleng a motho yo a sepelago gore a laole dikgato tša gagwe.” (Jeremia 10:23) Tsela ya Modimo ya go buša ke yona feela yeo e ka kgonthišetšago khutšo e swarelelago, lethabo le katlego bathong, ka gobane woo ke morero wa Modimo.—Jesaya 45:18.

Ka gona, Modimo o tla phethagatša morero wa gagwe bjang bakeng sa batho? Gopola gore Jesu o rutile balatedi ba gagwe gore ba rapele ka gore: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:10) Ee, ka nako e swanetšego, Modimo o tla fediša dibaki ka moka tša tlaišego a diriša Mmušo wa gagwe. (Daniele 2:44) Go ka se sa ba le bodiidi, bolwetši le lehu. Beibele ge e bolela ka badiidi e bontšha gore Modimo “o tla hlakodiša modiidi yo a llelago thušo.” (Psalme 72:12-14) Beibele e holofetša bao ba babjago, e re: “Ga go na modudi yo a tla rego: ‘Ke a babja.’” (Jesaya 33:24) Le gona Jesu o boletše ka bahu bao ba lego kgopolong ya Modimo, a re: “Nako e a tla yeo ka yona bohle bao ba lego mabitleng ba tlago go kwa lentšu la gagwe gomme ba tšwa.” (Johane 5:28, 29) A dikholofetšo tše di ruthetšago pelo gakaakang!

Go aga tumelo dikholofetšong tša Modimo go re thuša gore re fenye maikwelo le ge e le afe a go ikwa re nyamišwa ke yena

GO FENYA GO NYAMA

Nywaga e ka bago e 17 ka morago ga kotsi ya gagwe, Sidnei, yo go boletšwego ka yena mathomong a sehlogo se, o ile a re: “Ga se ka ka ka bea Jehofa Modimo molato bakeng sa kotsi yeo, eupša ke nyaka go dumela gore mathomong ke be ke ikwa a nnyamišitše. Go na le matšatši ao ke nyamago e le ruri, gomme ke a lla ge ke nagana ka bogole bja ka. Lega go le bjalo, Beibele e nthušitše go kwešiša gore kotsi yeo e be e se kotlo e tšwago go Modimo. Go etša ge Beibele e bolela, ‘nako le ditiragalo tšeo di sa letelwago di re wela ka moka.’ Go rapela Jehofa gotee le go bala mangwalo a itšego go matlafaditše tswalano ya ka le Modimo gomme go nthušitše gore ke dule ke na le pono e botse.”—Mmoledi 9:11; Psalme 145:18; 2 Bakorinthe 4:8, 9, 16.

Go dula re nagana ka mabaka ao ka ona Modimo a dumeletšego tlaišego le kamoo ditlamorago tša yona di tlago go fedišwa kgauswinyane go re thuša gore re pheme maikwelo le ge e le afe ao re ka bago re na le ona a go ikwa re nyamišwa ke Modimo. Re kgodišegile gore Modimo ke “moputsi wa bao ba mo tsomago ka phišego.” Ga go na le o tee yo a theago tumelo ya gagwe go yena le go Morwa wa gagwe yo a tlago go nyamišwa.—Baheberu 11:6; Baroma 10:11.

Ithute ka mo go oketšegilego

Ke ka Baka la Eng o Swanetše go Ithuta Beibele?

Beibele e nea dikarabo tša dipotšišo tša bohlokwa go batho ba dimillione lefaseng ka bophara. Na o ka rata go ba yo mongwe wa bona?