Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  September 2015

 TABA YA LETLAKALA LA KA NTLE

Dihlatse tša Jehofa ke Bomang?

Dihlatse tša Jehofa ke Bomang?

“Ke be ke na le nywaga e mentši ke tseba Mike. Ke Hlatse ya Jehofa. Eupša bodumedi bja gagwe bo be bo mmakatša ka mehla. Ke be ke ipotšiša gore Jehofa ke mang? Ke ka baka la’ng Dihlatse di sa keteke matšatši a maikhutšo? Na Mike e be e le setho sa sehlotswana sa bodumedi?”—Becky, California, U.S.A.

“Ge baagišani ba ka ba be ba thoma go ithuta Beibele le Dihlatse tša Jehofa, ke be ke ipotšiša gore: ‘Leina le la Dihlatse tša Jehofa le ra go re’ng? Ruri leina leo la bodumedi ga le a tlwaelega!’”—Zenon, Ontario, Canada.

“Nna le mosadi wa ka re be re nagana gore Dihlatse tša Jehofa di re etetše e le gore di ikhole ka go ikwa ga rena re na le molato ka ge re be re sa ya kerekeng. Le gona re be re nagana gore ge e ba dikereke tše tlwaelegilego di se na seo re bego re se nyaka, gona sehlotswana sa bodumedi se sa tlwaelegago seo se swanago le sa Dihlatse tša Jehofa se ka se re nee seo re tlogago re se nyaka.”—Kent, Washington, U.S.A.

“Go bolela therešo ke be ke sa tsebe gore Dihlatse tša Jehofa ke bomang le seo di se dumelago.”—Cecilie, Esbjerg, Denmark.

O ka ba o di bone di boledišana le batho ka Beibele ka ntlo le ntlo goba mafelong a batho bohle, di nea batho dipuku le dimakasine tšeo di theilwego Beibeleng e bile di ithaopela go ruta batho ka Beibele mahala. O ka ba o hweditše makasine wo go yo mongwe wa tšona. Lega go le bjalo, o ka ba o ipotšiša gore ge e le gabotse Dihlatse tša Jehofa ke bomang. Go ka direga gore seo o se naganago se swana le seo se boletšwego ke yo mongwe wa bao go boletšwego ka bona mathomong a sehlogo se.

Ge e ba o na le dipotšišo le dilo tše bjalo tšeo o tshwenyegilego ka tšona, o ka hwetša kae dikarabo? O ka tseba bjang seo ge e le gabotse Dihlatse tša Jehofa di se dumelago? Bodiredi le mafelo a tšona a borapedi di thekgwa bjang ka tša ditšhelete? Le gona ke ka baka la’ng di etela batho magaeng a bona le mafelong a batho bohle?

Cecilie yo go boletšwego ka yena pejana, o re: “Ke badile kudu ka Dihlatse tša Jehofa Inthaneteng. Ke kwele mabarebare ka tšona e bile ke kwele dipolelo tše dintši tša lehloyo mabapi le tšona. Ka baka leo, ke ile ka ba le maikwelo a fošagetšego kudu ka Dihlatse tša Jehofa.” Lega go le bjalo, ka morago Cecilie o ile a boledišana le Dihlatse tša Jehofa ka go lebanya gomme o hweditše dikarabo tše di kgotsofatšago tša dipotšišo tša gagwe.

Na o ka rata go hwetša dikarabo tša kgonthe tša dipotšišo tša gago mabapi le Dihlatse tša Jehofa? Re go kgothaletša gore o ikwele kgodung e tšwago lerotseng—tšona Dihlatse tša Jehofa ka go lebanya, e lego bagatiši ba makasine wo. (Diema 14:15) Re holofela gore dihlogo tše di latelago di tla go thuša go bona gore re bomang le seo re se dumelago gotee le go kwešiša modiro woo re o dirago.