Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI AUGUST 2015

 TABA YA LETLAKALA LA KA NTLE | NA GO KA BA LE BOPHELO KA MORAGO GA LEHU?

O ka Kgonthišega Bjang ka Kholofelo Bakeng sa Bahu?

O ka Kgonthišega Bjang ka Kholofelo Bakeng sa Bahu?

Na ke ga bošilo go nagana gore bahu ba tla phela gape? Moapostola Paulo o be a sa nagane bjalo. O ile a budulelwa go ngwala gore: “Ge e ba re holofetše Kriste bophelong bjono feela, gona re ba go šokelwa go feta motho le ge e le ofe. Eupša ge e le gabotse Kriste o tsošitšwe bahung, yena thakangwaga ya bao ba robetšego lehung.” (1 Bakorinthe 15:19, 20) Paulo o be a lebelela tsogo ya bahu e le selo sa kgonthe. Ge e le gabotse, se se ile sa kgonthišetšwa ka go tsošwa ga yena Jesu. * (Ditiro 17:31) Ke ka baka leo Paulo a ilego a bitša Jesu “thakangwaga”—ke yena wa mathomo wa go tsošetšwa bophelong bjo bo sa felego. Ge e ba Jesu e be e le wa mathomo, gona go a kwagala gore go be go tla ba le ba bangwe.

Jobo o itše go Modimo: “O tla hlologela modiro wa diatla tša gago.”—Jobo 14:14, 15

Lebaka le lengwe leo ka lona o ka kgonthišegago ka kholofelo ya tsogo ke le. Jehofa ke Modimo wa therešo. Beibele e re: ‘Modimo a ka se aketše.’ (Tito 1:2) Jehofa ga se a ka a aketša, gomme a ka se tsoge a akeditše. Na a ka re holofetša tsogo, a ba a bontšha gore a ka tsoša batho, ke moka a se dire seo a se holofeditšego? Ga go kgonege!

Ke ka baka la’ng Jehofa a dirile tokišetšo ya go tlo tsoša bahu nakong e tlago? Ke ka baka la lerato la gagwe. Jobo o botšišitše ka gore: “Ge e ba monna a ehwa, na a ka buša a phela? O tla bitša, gomme nna ke tla go araba. O tla hlologela modiro wa diatla tša gago.” (Jobo 14:14, 15) Jobo o be a kgodišegile gore Tatagwe yo lerato wa legodimong o be a tla hlologela go mo tsoša bahung. Na Modimo o fetogile? Beibele e re: “Ke nna Jehofa; ga se ka fetoga.” (Maleaki 3:6) Modimo o sa hlologela go bona bahu ba bušetšwa bophelong ba phetše gabotse mmeleng gomme ba thabile. Se se swana le seo motswadi yo mongwe le yo mongwe yo lerato a ka ratago se direga ka morago ga go loba ngwana wa gagwe lehung. Ke therešo gore  phapano ke gore Modimo o na le matla a go dira seo a ratago go se dira.—Psalme 135:6.

Lehu ke bothata bjo bogolo, eupša Modimo o na le tharollo ya sa ruri

Jehofa o tla nea Morwa wa gagwe matla a go tlišetša bao ba llelago baratiwa bao ba ba lobilego lethabo le legolo. Le gona Jesu o ikwa bjang ka tsogo ya bahu? Pele Jesu a ka tsošetša Latsaro bophelong, o ile a bona kamoo dikgaetšedi tša Latsaro le bagwera ba gagwe ba bego ba kwele bohloko ka gona, gomme le yena a “ntšha megokgo.” (Johane 11:35) Lebakeng le lengwe, Jesu o ile a kopana le mohlologadi wa motseng wa Naini, yoo a bego a lahlegetšwe ke morwa wa gagwe a nnoši lehung. Jesu “a mo šokela a re go yena: ‘Lesa go lla.’” Gateetee o ile a tsoša morwa wa gagwe. (Luka 7:13) Ka gona Jesu o kwešwa bohloko ke manyami le lehu. Ruri Jesu o tla thaba kudu ge a nea batho lebaka la go hlalala go e na le go nyama!

Na o kile wa lebeletšana le manyami? O ka ba o nagana gore lehu ke bothata bjo bo se nago tharollo. Eupša go na le tharollo—tsogo yeo Modimo a tlago go e tliša a diriša Morwa wa gagwe. Gopola gore Modimo o nyaka gore o bone tharollo yeo. O nyaka o eba gona gore o tle o gokarele baratiwa ba gago gape. Akanya o rulaganyetša bokamoso bjo bo sa felego o na le bona, le ka se tsoge le arogane!

Lionel, yo go boletšwego ka yena pejana, o gopola ka gore: “Mafelelong, ke ile ka ithuta ka tsogo ya bahu. Mathomong, go be go le thata go dumela seo gomme ke sa kgolwe motho yo a bego a mpotša ka yona. Eupša ke ile ka e lebelela ka Beibeleng gomme ka hwetša gore ke therešo! Ke tloga ke fagahletše go bona rakgolo wa ka gape.”

Na o ka rata go tseba mo go oketšegilego? Dihlatse tša Jehofa di tla thabela go go bontšha ka Beibeleng ya gago lebaka leo ka lona di kgodišegilego ka tsogo ya bahu ya nakong e tlago. *

^ ser. 3 Bakeng sa bohlatse bja gore Jesu o ile a tsošwa bahung, bona puku ya Beibele—Na ke Lentšu la Modimo Goba la Motho? matlakala 78-86, yeo e gatišitšwego ke Dihlatse tša Jehofa.

^ ser. 9 Hle bona kgaolo 7 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

Ithute ka mo go oketšegilego

Go Lebeletšana le go Hwelwa ke Molekane

Go hwelwa ke molekane go bohloko kudu e bile ga go lebalege. Ithute kamoo kholofelo ya tsogo yeo re e hwetšago ka Lentšung la Modimo e lego mothopo wa khomotšo.

Kholofelo ya Kgonthe Bakeng sa Baratiwa ba Gago ba ba Hwilego

Na o hlokofaletše ke motho yo o mo ratago? Na go a kgonega go ba bona gape? Ithute seo Beibele e se bolelago ka tsogo.