Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI AUGUST 2015

 TABA YA LETLAKALA LA KA NTLE | NA GO KA BA LE BOPHELO KA MORAGO GA LEHU?

Na go na le Kholofelo ka Bahu?

Na go na le Kholofelo ka Bahu?

Na bahu ba ka phela gape?

KARABO YA BEIBELE: “Nako e a tla yeo ka yona bohle bao ba lego mabitleng ba tlago go kwa lentšu la [Jesu] gomme ba tšwa.”Johane 5:28, 29.

Ka go re’alo Jesu o ile a bolela e sa le pele ka nako e tlago ya ge Bodulabahu bo ka se sa ba le batho, ka tlase ga pušo ya Mmušo wa gagwe. Fernando, yo go boletšwego ka yena sehlogong se se fetilego, o gopola ka gore: “Ke ile ka makala kudu ge ke be ke thoma go bala lengwalo la Johane 5:28, 29. Le ile la nnea kholofelo ya kgonthe gomme ka thoma go nagana ka bokamoso ke na le kholofelo.”

Mehleng ya bogologolo, monna yo a botegago Jobo o be a letetše gore ka morago ga ge a hwile Modimo o be a tla mo tsoša bahung ge nako e dutše eya. Jobo o botšišitše ka gore: “Ge e ba monna a ehwa, na a ka buša a phela?” Ke moka a araba ka kgodišego a re: “Ke tla leta matšatšing a ka ka moka a ge ke sa gapeletšega go leta [go fetša nako Bodulabahu], go ba go fihla kimologo ya ka e etla. O tla bitša, gomme nna ke tla go araba.”—Jobo 14:14, 15.

Go tsošwa ga Latsaro bahung go re nea kholofelo ya bokamoso

Tsogo ya bahu e be e se taba e mpsha go kgaetšedi ya Latsaro e lego Mareta. Ka morago ga gore Latsaro a hwe, Jesu o ile a re go Mareta: “Kgaetšedi ya gago o tla tsoga.” Mareta o arabile ka gore: “Ke tseba gore o tla tsoga tsogong letšatšing la mafelelo.” Ke moka Jesu a re go yena: “Ke nna tsogo le bophelo. Yo a dumelago go nna, gaešita le ge a ka hwa, o tla phela.” (Johane 11:23-25) Ke moka Jesu a tsoša Latsaro bahung gateetee! Pego yeo e kgahlišago e re bontšha e sa le pele ditiragalo tše dikgolo tšeo di sa tlago. Akanya go tsošwa ga batho mo go bjalo go diragala lefaseng ka bophara!

Na ba bangwe ba tla tsošetšwa legodimong?

KARABO YA BEIBELE: Lentšu la Modimo le bontšha gore go tsošwa ga Jesu bahung go be go fapana le ga batho ba bangwe ba seswai bao ba begilwego ka Beibeleng. Batho bao ba seswai ba ile ba boela ba phela mo lefaseng. Eupša ge e le mabapi le go tsošwa ga Jesu bahung, re bala gore: “Jesu Kriste . . . o ka letsogong le letona la Modimo gobane o ile legodimong.” (1 Petro 3:21, 22) Na Jesu e be e tla dula e le yena feela yo a tsošeditšwego legodimong? Pejana Jesu o be a ile a botša baapostola ba gagwe gore: “Ge e ba ke tloga ke eya go le lokišetša lefelo, ke tla buša ka boa, ka le amogela gae go nna gore moo ke lego gona le lena le be gona.”—Johane 14:3.

Kriste o ile legodimong gomme a lokišeletša go tla ga ba bangwe ba barutiwa ba gagwe. Mafelelong bao ba tlago go tsošetšwa legodimong e tla ba ba 144 000.  (Kutollo 14:1, 3) Eupša balatedi bao ba Jesu ba kgauswi ba tla dira’ng moo?

Ba tla be ba swaregile kudu! Mangwalo a re botša gore: “Yo a thabago le yo e bilego e le yo mokgethwa ke mang le mang yo a nago le kabelo tsogong ya pele; lehu la bobedi ga le na matla go bona, eupša e tla ba baperisita ba Modimo le ba Kriste gomme ba tla buša le yena e le dikgoši ka nywaga e sekete (1 000).” (Kutollo 20:6) Bao ba tsošetšwago legodimong ba tla buša godimo ga lefase e le dikgoši e bile e le baperisita le Kriste.

Ke bomang bao ba tlago go tsošwa bahung ka morago ga bao ba tsošetšwago legodimong?

KARABO YA BEIBELE: Mangwalo a buduletšwego a bega seo moapostola Paulo a se boletšego ge a re: “Ke na le kholofelo go Modimo, e lego kholofelo yeo batho ba le bona ba nago le yona, ya gore go tla ba le tsogo ya ba lokilego gotee le ba sa lokago.”Ditiro 24:15.

Lentšu la Modimo le re kgonthišetša gore batho ba dibilione bao ba hwilego ba tla phela gape

Ke bomang bao ba tlago go akaretšwa sehlopheng sa bao Paulo a boletšego ka bona e le “ba lokilego”? Ela hloko mohlala o itšego. Monna yo a botegago Daniele o ile a botšwa go yela bofelong bja bophelo bja gagwe gore: “O tla khutša, eupša wa tlo emelela gore o tšee kabelo ya gago bofelong bja matšatši.” (Daniele 12:13) Daniele o tla tsogela kae borokong bja gagwe bja lehu? Beibele e re: “Baloki bona e tla ba beng ba lefase, ba tla dula mo go lona ka mo go sa felego.” (Psalme 37:29) Le gona Jesu o ile a bolela e sa le pele a re: “Go thaba ba moya o boleta, ka ge ba tla ja bohwa bja lefase.” (Mateo 5:5) Daniele le banna ba bangwe gotee le basadi bao ba botegago ba tla tsošetšwa go tlo phela gape mo lefaseng, le gona ba phela ka mo go sa felego.

Ke bomang bao ba tlago go akaretšwa sehlopheng sa bao Paulo a ba biditšego gore ke “ba sa lokago”? Ke batho ba dibilione bao ba ilego ba phela gomme ba hwa, bao ba bantši ba sa kago ba ba le sebaka sa go kwešiša therešo ya Beibele le go e diriša. Ka morago ga gore ba tsošwe bahung, ba tla kgona go tseba le go leboga Jehofa * le Jesu. (Johane 17:3) Bohle bao ba kgethago go hlankela Modimo ba tla ba le tebelelo ya go phela nako e telele go etša Jehofa—ka mo go sa felego.

Bohle bao ba kgethago go hlankela Modimo ba tla ba le tebelelo ya go phela ka mo go sa felego ba phetše gabotse ka mo go feletšego mmeleng e bile ba thabile

Maemo lefaseng a tla ba bjang?

KARABO YA BEIBELE: Modimo “o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” (Kutollo 21:4) Beibele e re: “Ba tla aga dintlo ba dula go tšona; ba tla bjala dirapa tša merara ba ja dienywa tša tšona.”—Jesaya 65:21.

Akanya o dula maemong a bjalo o na le baratiwa ba gago bao ba tsošitšwego bahung! Eupša potšišo e šalago ke e rego: O ka tseba bjang gore go tla ba le tsogo ya bahu e le ka kgonthe?

^ ser. 15 Jehofa ke leina la Modimo bjalo ka ge le utolotšwe ka Beibeleng.

Ithute ka mo go oketšegilego

Morero wa Modimo ka Lefase ke Ofe?

Beibele e hlalosa lebaka leo Modimo a bopilego lefase, tlaišego e tla fela neng, gomme bokamoso ke bofe ka lefase le bao ba dulago go lona.

Bophelo Paradeiseng e Tsošološitšwego

Paradeise e tla tsošološwa bjang mo lefaseng gona bophelo bo tla ba bjang?