Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  August 2015

 PHIHLELO

Jehofa o Mphile se se Fetago Seo se Ntshwanetšego

Jehofa o Mphile se se Fetago Seo se Ntshwanetšego

Ke be ke na le nywaga e 17 feela gomme ke na le ditoro le dilo tšeo ke tshwenyegilego ka tšona go swana le bafsa ba bantši. Ke be ke rata go ba le bagwera ba ka, re rutha le go bapala kgwele ya maoto. Eupša bošegong bjo bongwe bophelo bja ka bo ile bja fetoga ka tsela e makatšago. Ke ile ka ba kotsing e šoro ya sethuthuthu yeo e ntlogetšego ke golofetše go tloga molaleng go ya tlase. Seo se diregile nywaga e ka bago e 30 e fetilego, gomme e šetše e le nako e telele bjale ke dula ke le malaong.

Ke goletše motseng wa Alicante, wo o lego ka lebopong la ka bohlabela bja Sepania. Lapa lešo le be le se na lerato, ka gona ge ke sa le mofsa ke be ke fetša nako e ntši ke le ditarateng. Go be go na le lebenkele la go lokiša dithaere kgauswi le ga gešo. Ke gona moo ke ilego ka gwerana le José María, yo e bego e le yo mongwe wa bašomi ba moo. José e be e le motho yo borutho gomme o nneile tlhokomelo yeo ke bego ke tloga ke e hloka lapeng lešo. Dinakong tša tlalelo, o be a le bjalo ka ngwanešo—mogwera wa kgonthe, gaešita le ge a be a mpheta ka nywaga e 20.

José María o be a šetše a thomile go ithuta Beibele le Dihlatse tša Jehofa. Ruri o be a rata Mangwalo e bile o be a dula a boledišana le nna ka ditherešo tša ka Beibeleng. Ke be ke mo theetša ka tlhompho, eupša le ka mohla ke sa thabele seo a bego a mpotša sona. Ke be ke le mofsa e bile ke swaregile ka dilo tše dingwe. Lega go le bjalo, seo se be se tla tloga se fetoga.

KOTSI YEO E FETOŠITŠEGO BOPHELO BJA KA

Ga ke rate go bolela kudu ka kotsi yeo ya tseleng. Seo nkago go se bolela ke gore ke bile lešilo le go dira dilo ka go se šetše. Ka letšatši letee feela, bophelo bja ka bo ile bja fetoga ka mo go feletšego. Go tloga go mofsa yo a bego a tletše ka matšato, gateetee ka ikhwetša ke golofetše ke kgakgetšwe ka phapošing ya go hlahlobela balwetši sepetlele. Ruri go be go le thata go amogela boemo bjo ke lego go bjona. Ke be ke fela ke ipotšiša gore: ‘Ke sa phelela’ng?’

José María o ile a nketela, gomme kapejana a rulaganya gore Dihlatse tša Jehofa tša phuthego ya lefelong leo di tle di nketele gona moo sepetlele. Diketelo tšeo tša ka mehla di ile tša nkgoma pelo. Gateetee ge ke etšwa ka phapošing ya sepetlele ya balwetši bao ba nyakago tlhokomelo e kgolo, ke ile ka thoma go ithuta Beibele. Ke ile ka hwetša therešo ya mabapi le lebaka leo batho ba tlaišegago le lebaka leo Modimo a dumeletšego gore dilo tše mpe di direge. Ke ile ka ba ka ithuta ka dikholofetšo tša Modimo tša nakong e tlago, gore lefase ka moka le tla tlala ka batho ba phethagetšego gomme go ka se be le motho yo a ka se tsogego a itše: “Ke a babja.” (Jesaya 33:24) Ka lekga la pele bophelong, ke ile ka bulegelwa ke kholofelo e kgahlišago.

Ge ke tloga sepetlele, ke ile ka dira tšwelopele ya kapejana ge ke ithuta Beibele. Ka ge ke be ke diriša setulo se se kgethegilego sa digole, ke ile ka ba ka ya dibokeng tše dingwe tša Dihlatse tša Jehofa le go tšea karolo modirong wa go ruta ka Beibele. Ka November 5, 1988, ge ke be ke na le nywaga e 20, ke ile ka kolobetšwa ka go inwa ka meetseng ka pafong e kgethegilego ya go hlapela. Jehofa Modimo o be a nthušitše gore ke lebelele bophelo ka tsela e fapanego. Eupša ke be nka dira eng gore ke bontšhe tebogo?

 GO DIRA DILO GO SA ŠETŠWE GO GOLOFALA

Ke be ke ikemišeditše gore ke se dumelele boemo bja ka bo nthibela go dira sohle seo nka se kgonago go hlankela Jehofa. Ke be ke nyaka go dira tšwelopele go hlankeleng Jehofa. (1 Timotheo 4:15) Mathomong go be go se bonolo, ka ge ba lapa lešo ba be ba ganetša tumelo ya ka e mpsha. Eupša ke be ke na le badumedigotee le nna bao e lego bana bešo le dikgaetšedi tša ka. Ba be ba kgonthišetša gore ke ba gona dibokeng ka mehla le gore ke tšea karolo ka mafolofolo modirong wa go ruta ka Beibele.

Lega go le bjalo, ge nako e dutše e eya, go ile gwa ba molaleng gore go tla nyakega gore ke newe tlhokomelo e kgethegilego ka dinako tšohle. Ka morago ga go nyaka ka nako e telele lefelo leo ke tlago go hlokomelwa go lona, mafelelong ke ile ka hwetša lefelo la maleba leo go lona go hlokomelwago batho bao ba sa kgonego go itirela dilo motseng wa Valencia, wo o lego bokgole bja dikhilomithara tše 160 ka leboa la Alicante. Lefelo le le ile la fetoga legae la ka la sa ruri.

Gaešita le ge ke dula ke le malaong, ke ikemišeditše go boledišana le ba bangwe ka tumelo ya ka

Gaešita le ge ke be ke dula ke le malaong, ke ile ka ikemišetša go dula ke gatela pele go hlankeleng Jehofa. Ke ile ka reka khomphutha ka tšhelete yeo e newago batho bao ba golofetšego le ka ditšhelete tše dingwe tša thekgo gomme ka rulaganya gore e hlongwe kgauswi le malao a ka. Le gona ke ile ka reka founo. Bjale mesong e mengwe le e mengwe, motho yo a re hlokometšego o mpulela khomphutha le founo. E le gore ke šomiše khomphutha ye, ke diriša sedirišwa (joystick) seo ke se laolago ka seledu. E bile ke na le phata e nyenyane yeo ke e swarago ka molomo. Phata ye e dira gore ke kgone go ngwala ditlhaka khomphutheng le go kgotla dinomoro founong ya ka.

Ke kgona go kgotla dinomoro tša founo ke diriša phata

Thekinolotši ye e nthušitše bjang? Sa pele, e dira gore ke kgone go tsena Wepesaeteng ya jw.org le BOKGOBAPUKUNG BJA ITHANETENG bja Watchtower. Ruri didirišwa tše di nkhola kudu! Letšatši le letšatši ke fetša nako e ntši ke ithuta le go dira nyakišišo dikgatišong tša rena tšeo di theilwego Beibeleng e le gore nka tšwela pele ke ithuta ka Modimo le ka dika tša gagwe tše di kgahlišago. Le gona ge ke ikwa ke lewa ke bodutu goba ke nolega moko, go dula go na le selo se itšego Wepesaeteng ya rena seo se nkgothatšago.

Le gona khomphutha ya ka e nthuša gore ke theetše le go tšea karolo dibokeng tša phuthego. Ke kgona go nea ditlhaloso, go rapela, go nea dithero tša Beibele gaešita le go bala makasine wa Morokami ge ke abetšwe gore ke dire bjalo. Gaešita le ge ke sa kgone go ya dibokeng tšeo, ke sa dutše ke ikwa ke le karolo ya phuthego ya mo ke lego gona.

Go ba le founo le khomphutha le gona go nthuša gore ke tšee karolo ka botlalo modirong wa go ruta ka Beibele. Ke therešo gore nka se kgone go ya ka ntlo le ntlo go etša ge Dihlatse tša Jehofa tše dintši di dira bjalo. Eupša seo ga se sa nthibela gore ke bolele ka Beibele. Ke diriša didirišwa tše go boledišana le batho ba bangwe ka tumelo ya ka. Ge e le gabotse, ke tloga ke thabela dipoledišano tša founo mo e lego gore bagolo ba phuthego ya mo ke lego gona ba ile ba ba ba nkgopela gore ke rulaganye masolo a go nea bohlatse ka founo. Masolo a  a thušitše kudukudu ditho tša phuthego tšeo di sa kgonego go tšwa magaeng a tšona.

O ruta motho yo mongwe ka Beibele

Eupša bophelo bja ka ga se bja ithekga ka thekinolotši feela. Letšatši le letšatši ke etelwa ke bagwera ba ka bao ke ba ratago. Ba tla le ba leloko le batho bao ke tlwaelanego le bona bao ba thabelago ditaba tša Beibele. Gantši ba nkgopela gore e be nna ke boledišanago le bona ka Beibele. Mabakeng a mangwe, malapa a a nketela le go ntaletša gore ke be le ona mantšiboeng a borapedi bja lapa. Ke thaba kudu ge bana ba banyenyane ba dula kgauswi le malao a ka gomme ba mpotša mabaka a bona a go rata Jehofa.

O thabela mantšiboa a borapedi bja lapa le bagwera

Ke thabela go etelwa ke batho ba bantši kudu. Phapoši ya ka e dula e tletše batho le bagwera bao ba tšwago kgole le kgauswi ba ba tlilego go mpona. Ka ge o ka nagana, lerato leo ke le hwetšago le makatša bahlokomedi lefelong le. Letšatši le lengwe le le lengwe, ke leboga Jehofa ge a ile a ntumelela go ba karolo ya borwarre bjo bjalo bjo bo kgahlišago.

GO LWA NTWA

Ge motho a ntumediša gomme a mpotšiša gore ke ikwa bjang, ke fo re: “Ee, ke sa dutše ke elwa ntwa!” Ke therešo gore ke a tseba gore ga ke noši ntweng ye. Go sa šetšwe maemo goba mafokodi a rena, Bakriste ka moka ba ntweng, e lego “ntwa e botse ya tumelo.” (1 Timotheo 6:12) Ke’ng seo se nthušitšego go lwa ntwa ye ka nywaga e mentši? Letšatši le letšatši ke rapela le go leboga Jehofa ge a mphile bophelo bjo bo nago le morero. Le gona ke leka go dula ke swaregile go hlankeleng Modimo ka mo go ka kgonegago, ke tsepamišitše mahlo a ka kholofelong yeo e letšego ka pele.

José María

Ke fela ke nagana ka lefase le lefsa le gore go tla ba bjang go kitima le go tshelatshela gape. Ka dinako tše dingwe, ke dira metlae le mogwera wa ka wa kgonthe José María—yo a swerwego ke bolwetši bja polio—mabapi le go kitima lebelong le letelele re le gotee. Ke mmotšiša gore: “Go tla fenya mang?” José o araba ka gore: “Ga go na taba gore mofenyi ke mang. Se bohlokwahlokwa ke go ba moo, e lego Paradeiseng, gore re kitime lebelong leo.”

Go be go se bonolo go lebeletšana le go golofala ga ka. Ke a tseba gore ge ke be ke sa le mofsa, ke ile ka dira selo se itšego sa bošilo gomme seo se dirile gore ke lahlegelwe e le ruri. Lega go le bjalo, ke leboga gore Jehofa ga se a ntlogela. O ntšhegofaditše ka dilo tše dintši, e lego lapa la barwarre, go rata bophelo, lethabo la go thuša ba bangwe le kholofelo e kgahlišago ya bokamoso. Ge nka swanelwa ke go bolela ka lefoko letee feela gore ke ikwa bjang, ke be nka re ruri Jehofa o mphile se se fetago seo se ntshwanetšego.

Ithute ka mo go oketšegilego

DITABA TŠE DIBOTSE TŠE DI TŠWAGO GO MODIMO!

Morero wa Modimo ka Lefase ke Ofe?

Beibele e hlalosa lebaka leo Modimo a bopilego lefase, tlaišego e tla fela neng, gomme bokamoso ke bofe ka lefase le bao ba dulago go lona.

DITABA TŠE DIBOTSE TŠE DI TŠWAGO GO MODIMO!

Ditaba tše Dibotse ka Bodumedi ke Dife?

Na go tla tla nako yeo ka yona batho ka moka ba tlago go kopana gotee go rapela Modimo wa therešo?

DIPUKU LE DIPOROUTŠHA

Na Tlaišego e tla ka ya Fela?

Beibele e re Modimo o hloile go hloka toka e bile o tloga a rata batho. Seo se ka go hola bjang?

MOROKAMI

Mmušo wa Modimo—O tla Bolela Eng go Wena?

Ka tekanyo e kgolo, karabo e ithekgile ka wena.