Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI AUGUST 2015

 TABA YA LETLAKALA LA KA NTLE | NA GO KA BA LE BOPHELO KA MORAGO GA LEHU?

Go Direga Eng ka Morago ga Lehu?

Go Direga Eng ka Morago ga Lehu?

“Ke be ke nagana gore go na le mafelo a mararo ao motho a yago go ona ka morago ga ge a hwile: legodimong, diheleng goba pakatori. Ke be ke tseba gore ga ke yo a lokilego go ka ya legodimong goba ga ke yo mobe kudu gore nka ya diheleng. Ke be ke sa kwešiše gabotse gore go na le eng pakatori. Ga se ka ka ka e bona e ngwadilwe ka Beibeleng. E be e fo ba seo batho ba se bolelago.”—Lionel.

“Ke be ke rutilwe gore batho ka moka ba ya legodimong ka morago ga go hwa eupša ke be ke sa kgodišege ka seo. Ke be ke nagana gore lehu ke mafelelo a dilo ka moka—gore ga go na bokamoso bakeng sa bao ba hwilego.”—Fernando.

Na o kile wa ipotšiša gore: ‘Ge e le gabotse go direga’ng ge motho a hwile? Na baratiwa ba rena ba ba hwilego ba a tlaišega felo tsoko? Na re tla ka ra ba bona gape? Re ka kgodišega bjang?’ Hle ela hloko seo ge e le gabotse Mangwalo a se rutago. A re thomeng ka go hlahloba gore Beibele e re lehu ke eng. Ke moka re tla ahlaahla kholofelo yeo re e newago ke Lentšu la Modimo, e lego Beibele.

 Boemo bja bahu ke bofe?

KARABO YA BEIBELE: “Bao ba phelago ba a tseba gore ba tlo hwa; eupša ge e le bahu ga ba tsebe selo le gatee, le gona ga ba sa na moputso le ka mohla ka gobane ba lebetšwe. Tšohle tšeo seatla sa gago se kgonago go di dira, di dire ka matla a gago ka moka ka gobane Bodulabahu mo o yago gona, ga go na modiro le ge e le maano goba tsebo.” *Mmoledi 9:5, 10.

Ka boripana, Bodulabahu ke moo batho ba yago gona ge ba ehwa; ke lefelo goba boemo bja seswantšhetšo moo go se nago bophelo goba mediro. Monna yo a botegago Jobo o be a lebelela Bodulabahu bjang? O be a lobile dilo ka moka tšeo a bego a na le tšona le bana ba gagwe ka letšatši letee, ke moka a otlwa ka dišo tše šoro mmeleng wa gagwe ka moka. O ile a kgopela Modimo ka gore: “A mola O kabe O nkuta kwa bodulabahu [“diheleng,” Catholic Douay Version], . . . O sa mphihlile.” (Jobo 1:13-19; 2:7; 14:13, Beibele ya Sepedi) Go molaleng gore Jobo o be a sa lebelele Bodulabahu e le mollo wa dihele, e lego lefelo leo go lona go tlaišega ga gagwe go bego go tla oketšega. Go e na le moo, o be a bo lebelela e le lefelo la kimologo.

Go na le tsela e nngwe ya go ithuta ka boemo bja bahu. Re ka hlahloba dipego tša Mangwalo a buduletšwego mabapi le batho ba seswai bao ba ilego ba tsošwa bahung.—Bona lepokisi le le rego, “ Ka Beibeleng go Hlaloswa ka Batho ba Seswai Bao ba Tsošitšwego Bahung.”

Ga go le o tee wa batho bao ba seswai yo a ilego a bolela ka go ba lefelong la boiketlo goba la tlhokofatšo. Ge e ba batho bao ba ilego ba tsošwa bahung ba be ba ile lefelong le bjalo ge ba ehwa, na nkabe ba sa botša batho ka lefelo leo? Le gona na seo se be se ka se akaretšwe pegong ya Beibele e buduletšwego gore se bonwe ke bohle? Ga go na pego e bjalo ka Mangwalong. Go molaleng gore batho bao ba seswai ga se ba bolela selo ka taba yeo. Ka baka la’ng? Ka gobane ba be ba sa tsebe selo, go le bjalo ka ge eka ba robetše boroko bjo bogolo. Ge e le gabotse, ka dinako tše dingwe Beibele e diriša boroko ka tsela ya seswantšhetšo go hlalosa lehu. Ka mohlala, Dafida le Stefano bao ba botegago ba ile ba “robala lehung.”—Ditiro 7:60; 13:36.

Ka gona, go na le kholofelo efe bakeng sa bahu? Na ba tla tsoga borokong bjo?

^ ser. 7 Beibeleng ya Phetolelo ya Lefase le Lefsa ya Mangwalo a Makgethwa, lentšu “Bodulabahu” le dirišitšwe go fetolela lentšu la Seheberu la “Sheol” le lentšu la Segerika la “Hades.” Diphetolelo tše dingwe tša Beibele di diriša lentšu “dihele,” eupša kgopolo ya lefelo la go hlokofatša bahu leo le tukago mollo ga e tšwe ka Mangwalong.

Ithute ka mo go oketšegilego

Na Jesu o Ile a Tsoša Batho e le ka Kgonthe?

Go tsoša ga Jesu batho go re kgonthišetša’ng ka dikholofetšo tša gagwe tša nakong e tlago?