Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI JULY 2015

 TABA YA LETLAKALA LA KA NTLE | KAMOO O KA LEBELETŠANAGO LE DIPELAELO

Dipelaelo di Gohle!

Dipelaelo di Gohle!

“Ke be ke yo reka dijo eupša ka hwetša dikuku feela—theko ya tšona e be e feta e tlwaelegilego ka makga a 10 000! Letšatšing le le latelago, go be go se na dijo mabenkeleng.”—Paul, Zimbabwe.

“Monna wa ka o ile a dula le nna fase gomme a mpotša gore o a re tlogela. Ke be ke tla kgotlelela bjang go ekwa moo? Go be go tla direga’ng ka bana ba ka?”—Janet, United States.

“Ge lešata la alamo le thoma, ke a tšhaba ka yo ikuta gomme ka patlama lebatong ge di-rocket di le gare di thuthupa. Diatla tša ka di tšea diiri di thothomela.” —Alona, Isiraele.

Re phela mehleng ya dipelaelo, e lego “[dinakong] tše di hlobaetšago tšeo go lego thata go lebeletšana le tšona.” (2 Timotheo 3:1) Batho ba bantši ba kgakanegong ya mathata a tša ditšhelete, go thubega ga malapa, ntwa, mauba a malwetši a bolayago le dikotsi tša tlhago goba dikotsi tšeo di bakwago ke batho. Go oketša dilong tše di fapafapanego tšeo di tshwenyago batho, ba bangwe ba ipotšiša gore: ‘Na lethopa leo le hweditšwego mmeleng wa ka le tla fetoga kankere?’ ‘Ditlogolo tša ka di tla golela lefaseng la mohuta mang?’

Go ba le dipelaelo go tlwaelegile. Gantši re ikwa re gateletšegile pele ga go ngwala molekwana, pele ga go phetha modiro o itšego goba go hlahlobelwa mošomo. Le gona go tšhaba kotsi go re thuša gore re pheme go gobala. Eupša go kotsi go belaela ka mo go feteletšego goba go dula o belaela. Dinyakišišong tšeo di sa tšwago go dirwa tšeo di akaretšago batho ba godilego ba fetago ba 68 000, go utolotšwe gore gaešita le go belaela ganyenyane go oketša kgonagalo ya gore motho a hwe go sa letelwa. Ka gona, go a kwagala ge Jesu a be a botšiša gore: “Ke mang go lena yo ka go ba yo a belaelago, a ka oketšago tekanyo ya bophelo bja gagwe ganyenyane?” Ruri go belaela ga go oketše tekanyo ya bophelo bja motho. Ka gona, Jesu o eleditše ka gore: “Tlogelang go [belaela].” (Mateo 6:25, 27) Eupša seo se ka kgonega bjang?

Karabo ya potšišo ye e akaretša go diriša bohlale, go hlagolela tumelo e tiilego go Modimo le go ba le kholofelo ya kgonthe ka bokamoso. Gaešita le ge gona bjale go se na maemo a thata ao re lebeletšanego le ona, mohlomongwe re ka lebeletšana le ona nakong e tlago. Ka gona anke re boneng kamoo go gata megato ye go thušitšego Paul, Janet le Alona gore ba lebeletšane le dipelaelo.