Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI JULY 2015

 TABA YA LETLAKALA LA KA NTLE | KAMOO O KA LEBELETŠANAGO LE DIPELAELO

Dipelaelo tša Mabapi le Lapa

Dipelaelo tša Mabapi le Lapa

Janet o laodiša gore: “Ka moragonyana ga gore tate a hlokofale, monna wa ka o ile a mpotša gore o be a ratana le mosadi yo mongwe. Go se go ye kae, o ile a sepela ntle le go ntemoša goba go ntaela, a tšea diaparo tša gagwe ka bobolokelong bja diaparo gomme a ntlogela le bana ba rena ba babedi.” Janet o ile a hwetša mošomo, eupša mogolo wa gagwe o be o sa lekane go ka lefelela ditshenyegelo tša ntlo ya bona. Le gona Janet o be a sa belaele ka tša ditšhelete feela. O gopola gore: “Ke be ke imelwa ke dipelaelo tšeo di sepedišanago le go thoma mošomo o thata o mofsa woo ke bego ke swanetše go o dira ke nnoši. Ke be ke ipona molato wa go se kgone go hlokomela bana ba ka go swana le kamoo batswadi ba bangwe ba hlokomelago bana ba bona. Gaešita le gona bjale, ke tshwenyegile ka gore ba bangwe ba ntebelela bjang gotee le bana ba ka. Na ba ka ba ba ipotšiša ge e ba ke ile ka dira sohle seo ke bego ke swanetše go se dira gore ke šireletše lenyalo la ka?”

Janet

Thapelo e thuša Janet go laola maikwelo a gagwe e bile e matlafatša segwera sa gagwe le Modimo. Janet o re: “Bošego bo tloga bo le thata kudu, ge go itše tuu gomme ke sa kgaotše go belaela. Go rapela le go bala Beibele go nthuša gore ke robale. Lengwalo leo ke le ratago kudu ke la Bafilipi 4:6, 7, leo le rego: ‘Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga; ke moka khutšo ya Modimo yeo e fetago kwešišo yohle ya batho e tla diša dipelo tša lena.’ Ke feditše mašego a mantši ke rapela gomme ka kwa ge khutšo ya Jehofa e nkhomotša.”

Mantšu a Jesu a kgothatšago a lego mabapi le thapelo ao a a boletšego Thutong ya gagwe ya Thabeng ao a šomago mehuteng ka moka ya dipelaelo, a re: “Tatago lena o tseba gore ke dilo dife tšeo le di nyakago le pele le mo kgopela.” (Mateo 6:8) E bile re swanetše go mo kgopela tšona. Tsela ya motheo yeo re ka ‘batamelago Modimo’ ke ka go rapela. Seo se feleletša ka eng? Se feleletša ka gore Modimo ‘o tla go batamela.’—Jakobo 4:8.

Ee, thapelo ga e fo re dira gore re ikwe gakaone ge re boletše dipelaelo tša rena. Jehofa ke “Mokwi wa thapelo,” e bile o lwela bohle bao ba mo tsomago ka tumelo.  (Psalme 65:2) Ke ka baka leo Jesu a rutilego balatedi ba gagwe “gore ba rapele ka mehla ba sa lape.” (Luka 18:1) Re swanetše go dula re kgopela Modimo gore a re hlahle le go re thuša, re kgodišegile gore o tla re putsa bakeng sa tumelo ya rena. Le ka mohla ga se ra swanela go belaela kganyogo goba bokgoni bja gagwe bja go re lwela. Go ‘rapela ka mehla’ ka tsela ye go bontšha gore re na le tumelo ya kgonthe.—1 Bathesalonika 5:17.

SEO GE E LE GABOTSE SE BOLELWAGO KE GO BA LE TUMELO

Eupša ge e le gabotse tumelo ke eng? Tumelo e akaretša go ‘tseba’ Modimo. (Johane 17:3) Re thoma ka go monya dikgopolo tša Modimo ka go ithuta Beibele. Re ithuta gore o bona yo mongwe le yo mongwe wa rena e bile o nyaka go re thuša. Lega go le bjalo, tumelo ya kgonthe e akaretša se se fetago go fo tseba selo se itšego ka Modimo. E bile tumelo ya kgonthe e bolela go ba le tlemo e bontšhago gore re hlompha go ba bagwera ba gagwe. Go tšea nako gore re hlagolele tlemo e bjalo, go etša ge go le bjalo ka mogwera wa kgonthe. Tumelo ya rena e ‘dula e oketšega’ ge nako e dutše e eya ge re dutše re ithuta ka mo go oketšegilego ka yena, re “dira dilo tše di mo kgahlago,” le ge re dutše re thabela thušo ya gagwe yeo e tšwelago pele. (2 Bakorinthe 10:15; Johane 8:29) Woo ke mohuta wa tumelo yeo e thušitšego Janet go lebeletšana le dipelaelo.

Janet o re: “Seo ge e le gabotse se nthušitšego go aga tumelo ya ka ke go bona letsogo la Jehofa mogatong o mongwe le o mongwe. Gantši re be re lebeletšana le ditiro tša go hloka toka tšeo di bego di bonagalago di le thata go ka swaragana le tšona. Ka go dula re rapela, Jehofa ka mehla o be a re ntšha mathateng ka tsela yeo le ka mohla ke bego nka se e nagane. Ge ke mo leboga, se se nkgopotša dilo tše dintši tšeo a ntiretšego tšona. O be a dula a re thuša ka nako ya maleba, gantši a dira seo ka nako ya gona. Le gona o mphile bagwera ba kgonthe bao e lego banna le basadi ba Bakriste ba therešo. Ba dula ba nthekga e bile ke mehlala e mebotse baneng ba ka.” *

Janet o re: “Ke tseba gore go Maleaki 2:16 Jehofa o re: ‘[Ke] hloile tlhalo.’ Tlhalo e dira gore molekane yo a se nago molato a ikwe a ekilwe kudu. Go šetše go fetile nywaga e mentši ga e sa le monna wa ka a ntlogetše, eupša ka dinako tše dingwe ke sa dutše ke lewa ke bodutu e bile ke ikwa ke se selo. Ge ke ikwa ka tsela yeo, ke leka go dira selo se itšego seo se ka holago motho yo mongwe, gomme seo le nna se dula se nthuša.” Ka go re’alo, Janet o fokotša dipelaelo tša gagwe ka go diriša melao ya motheo ya Beibele ya go phema go ipea lekatana. *Diema 18:1.

Modimo ke “tatago ditšhiwana le moahloledi [goba, mošireletši] wa bahlologadi.” —Psalme 68:5

Janet gape o re: “Khomotšo ya ka e kgolokgolo ke e hwetša ka go tseba gore Modimo ke ‘tatago ditšhiwana le moahloledi [goba, mošireletši] wa bahlologadi.’ Le ka mohla a ka se re tlogele go etša ge monna wa ka a ile a re tlogela.” (Psalme 68:5) Janet o a tseba gore Modimo a ka se ke a re leka “ka dilo tše mpe.” Go fapana le seo, bohlale o bo fa ‘bohle kudu’ gomme o nea “matla a fetago a tlwaelegilego” go re thuša go lebeletšana le dipelaelo tša rena.—Jakobo 1:5, 13; 2 Bakorinthe 4:7.

Eupša go thwe’ng ge e ba re belaela ka ge bophelo bja rena bo le kotsing?

^ ser. 10 Bakeng sa go hwetša ditsela tše di oketšegilego tše šomago tša go lebeletšana le dipelaelo, bona lelokelelo la dihlogo tšeo di thomago letlakaleng la ka ntle leo le rego “Na o Laola Bophelo bja Gago?” tokollong ya Phafoga! ya July 2015 yeo e hwetšagalago Inthaneteng go www.jw.org/nso.

Ithute ka mo go oketšegilego

Na o tla Bota Modimo?

Utolla kgotsofalo yeo o ka bago le yona ka go tseba Modimo bjalo ka Mogwera yo a botegago.