Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  June 2015

Molwa-le-Kriste ke Mang?

Molwa-le-Kriste ke Mang?

Filimi e mpsha e tšhošago yeo e sa tšwago go lokollwa e ile ya bitšwa Antichrist.

Sehlopha sa go tuma sa mmino se ile sa bitša e nngwe ya dialebamo tša sona gore ke Antichrist Superstar.

Friedrich Nietzsche, e lego radifilosofi yo a phetšego nywageng e ka bago e 100 e fetilego, o ile a bitša e nngwe ya dipuku tša gagwe gore ke The Antichrist.

Go na le nako yeo dikgoši di bego di bitša baganetši ba tšona gore ke balwa-le-Kriste.

Martin Luther wa Mojeremane yoo e bego e le moetapele kgahlanong le dithuto tša Katholika, o ile a bitša bomopapa ba Roma Katholika gore ke balwa-le-Kriste.

KA GE lentšu “molwa-le-Kriste” (antichrist) e le kgale le dirišwa go dilo tše dintši go akaretša dikgoši le difilimi, gona go a kwagala go botšiša gore: Molwa-le-Kriste ke mang? Lentšu le le bolela’ng go rena lehono? Go a kwagala gore re thome go nyakišiša ka Beibeleng gore re tsebe ka molwa-le-Kriste, ka ge lentšu le le tšwelela go yona ka makga a mahlano.

MOLWA-LE-KRISTE O A HLALOSWA

Moapostola Johane ke yena mongwadi wa Beibele a nnoši yoo a dirišitšego lentšu “molwa-le-Kriste.” O ile a mo hlalosa bjang? Bona seo a se boletšego lengwalong la gagwe la pele: “Bana ba ba rategago, ke nako ya bofelo, gomme go etša ge le kwele gore molwa-le-Kriste o a tla, gaešita le bjale go tšweletše balwa-le-Kriste ba bantši; e lego therešo yeo ka yona re tsebago gore ke nako ya bofelo. Ba tšwile go rena, eupša e be e se ba mohuta wa rena; gobane ge e ba e be e le ba mohuta wa rena . . . Moaketši ke mang ge e se yo a latolago gore Jesu ke Kriste? Molwa-le-Kriste ke yo a latolago Tate le Morwa.”—1 Johane 2:18, 19, 22.

Moapostola Johane o be a kwešiša gabotse gore molwa-le-Kriste ke batho ka moka bao ka boomo ba gašago maaka a bodumedi ka Jesu Kriste le dithuto tša gagwe

Re ithuta’ng mantšung a? Johane o boletše ka “balwa-le-Kriste ba bantši,” e le go bontšha gore molwa-le-Kriste ga se motho o tee eupša ke sehlopha sa batho. Batho goba mekgatlo ya balwa-le-Kriste e gaša maaka, e gana gore Jesu ke Kriste goba Mesia le gona e leka go šira tswalano magareng ga Modimo le Morwa wa Gagwe Jesu Kriste. Balwa-le-Kriste ba ipitša Kriste goba baemedi ba gagwe, eupša ka ge “ba tšwile go rena,” ba arogile dithutong tša Beibele. Go oketša moo, sehlopha se se be se dutše se le gona mehleng ya ge Johane a be a ngwala lengwalo la gagwe ‘nakong ya bofelo,’ yeo mohlomongwe e ka bolelago mehleng ya bofelo ya baapostola.

Ke’ng se sengwe seo Johane a ilego a se ngwala ka molwa-le-Kriste? Ge a be a bolela ka baporofeta ba maaka, o ile a lemoša ka gore: “Mantšu a buduletšwego a tšwago go Modimo le a tseba ka se: Lentšu le lengwe le le lengwe leo le buduletšwego leo le bolelago ka Jesu Kriste e le yo a tlilego ka nama, le tšwa go Modimo. Eupša lentšu le lengwe le le lengwe leo le buduletšwego leo le sa bolelego ka Jesu, ga le tšwe go Modimo. Go feta moo, a ke mantšu a buduletšwego a molwa-le-Kriste ao le kwelego gore a etla gomme bjale a šetše a le gona lefaseng.” (1 Johane 4:2, 3) Ke moka lengwalong la bobedi, Johane o ile a gatelela ntlha ye ka gore: “Gobane bafori ba bantši ba tšwetše lefaseng, e lego batho bao ba sa bolelego gore ba dumela go Jesu Kriste e le yo a tlilego a le nameng. Yo ke mofori le molwa-le-Kriste.” (2 Johane 7) Johane o be a tloga a kwešiša gabotse gore molwa-le-Kriste ke batho ka moka bao ka boomo ba gašago maaka ka Jesu Kriste le dithuto tša gagwe.

“BAPOROFETA BA MAAKA” LE “MOTHO WA GO HLOKA MOLAO”

Jesu o ile a lemoša ka baporofeta ba maaka bao ba tlago go tšwelela ‘ba apere matlalo a dinku eupša ka gare e le diphiri tše di gagolago’

Kgale pele ga ge Johane a ka ngwala ka badumedi bao ba timetšago ba bangwe, Jesu Kriste o be a eleditše  balatedi ba gagwe ka gore: “Phafogelang baporofeta ba maaka bao ba tlago go lena ba apere matlalo a dinku eupša ka gare e le diphiri tše di gagolago.” (Mateo 7:15) Moapostola Paulo le yena o ile a lemoša Bakriste ba kua Thesalonika gore: “Le se ke la arošwa ke motho ka mokgwa le ge e le ofe, gobane letšatši leo [la Jehofa] le ka se ke la tla ka ntle le gore bohlanogi bo tle pele gomme motho wa go hloka molao a utollwe, yena morwa wa tshenyego.”—2 Bathesalonika 2:3.

Nywaga e ka bago 2 000 e fetilego, baporofeta ba maaka le bahlanogi ba be ba dutše ba le gona, ba leka ka thata go fokodiša phuthego ya Bokriste. Batho ka moka bao ba tšerego karolo go phatlalatšeng maaka ka Kriste le go diriša bodumedi go fora batho ka Jesu Kriste le dithuto tša gagwe ba bitšwa “molwa-le-Kriste.” Paulo o ile a utolla pono ya Jehofa ka bona ge a be a re ke “morwa wa tshenyego.”

PHAFOGELA MEDIRO YA BALWA-LE-KRISTE MEHLENG YE

Na lehono ba sa le gona? Mekgatlo le batho bao ba bopago molwa-le-Kriste ba sa dutše ba ganetšana le Kriste le dithuto tša gagwe. Ba gaša maaka ka boomo le go fora batho ka maikemišetšo a go ba hlakahlakanya gore ba se tsebe Tate e lego Jehofa Modimo le Morwa wa Gagwe e lego Jesu Kriste. Re na le mabaka a kwagalago a go phafogela maaka a bjalo a bodumedi. A re hlokomeleng mehlala ye e mebedi.

Dikereke di be di dutše di phatlalatša thuto ya Boraro Botee ka nywaga e mentši, di ruta gore Tate le Morwa ke selo setee. Ka gona balwa-le-Kriste ba hlakahlakanya le go šira seo Jehofa Modimo le Jesu Kriste ba lego sona. Se se thibela batho ba botegago go ekiša Jesu Kriste le go batamela kgauswi le Modimo go etša ge Beibele e ba kgothaletša go dira bjalo.—1 Bakorinthe 11:1; Jakobo 4:8.

Dikereke di hlakahlakanya batho le go feta ka go kgothaletša go diriša diphetolelo tša Beibele tšeo di ntšhitšego leina la Modimo e lego Jehofa ka mangwalong. Di dira se go sa šetšwe taba ya gore leina Jehofa le tšwelela ka makga a 7 000 ka mangwalong a mathomong a Beibele. Se se bile le mafelelo afe? Thuto ye e širile batho gore ba se tsebe Modimo.

Ka lehlakoreng le lengwe, go tseba leina la Modimo e lego Jehofa, go thušitše batho ba dipelo tše dibotse go rapela le go batamela go Modimo. Se se ile sa diragalela Richard, yo a anegago seo a se boletšego le Dihlatse tša Jehofa tše pedi. O re: “Di ile tša mpontšha ka Beibeleng gore leina la Modimo wa therešo ke Jehofa. Ke ile ka kgahlwa kudu ke go tseba gore Modimo o na le leina, e lego selo seo ke sa kago ka se kwa bophelong bja ka.” Go tloga ka nako yeo, Richard o ile a dira diphetogo bophelong gore a phele ka melao ya Beibele le go kgahliša Jehofa. O tlaleletša ka gore: “Go ithuta ka leina la Modimo go nthušitše go ba le tswalano ya kgauswi le yena.”

Ka nywaga e mentši balwa-le-Kriste ba be ba dutše ba timetša batho. Eupša ka go ithuta Lentšu la Modimo, e lego Beibele, re kgona go ithuta seo molwa-le-Kriste a lego sona le go lokologa maakeng le boforeng bja balwa-le-Kriste.—Johane 17:17.

Ithute ka mo go Oketšegilego

DIPUKU LE DIPOROUTŠHA

Ge e le Gabotse ke Mang yo a Laolago Lefase?

Karabo ya Beibele potšišong ye e ka go šia o ahlame. Ithute gore ke baka la’ng e le bohlokwa le kamoo e kgomago bokamoso.

DIPOTŠIŠO TŠA BEIBELE DI A ARABJA

Na Borarobotee ke Thuto ya ka Beibeleng?

Dikereke tše dintši di ruta gore Modimo ke Borarobotee. Na se ke seo Beibele e se rutago?

DITABA TŠE DIBOTSE TŠE DI TŠWAGO GO MODIMO!

Na Modimo o na le Leina?

Modimo o na le direto tše dintši tše swanago le Ramatlaohle, Mmopi gotee le Morena. Eupša leina la gagwe le dirišwa ka makga a fetago a 7 000 ka Beibeleng.