Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI MAY 2015

 TABA YA LETLAKALA LA KA NTLE | NA BOFELO BO KGAUSWI?

Ba Bantši ba tla Phologa Bofelo—Le Wena o ka Phologa

Ba Bantši ba tla Phologa Bofelo—Le Wena o ka Phologa

Beibele e re botša gore bofelo bo tla akaretša phedišo, ge e re: “Go tla ba le masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale. . . . Ge e le gabotse, ka ntle le ge matšatši ao a be a ka fokotšwa, go be go ka se be le motho yo a bego a tla phologa.” (Mateo 24:21, 22) Eupša Modimo o holofetša gore batho ba bantši ba tla phologa, ge a re: “Lefase le a feta . . . , eupša yo a dirago thato ya Modimo o dula a le gona ka mo go sa felego.”—1 Johane 2:17.

Ke’ng seo o swanetšego go se dira ge e ba o nyaka go phologa go fedišwa ga lefase le le ‘go dula o le gona ka mo go sa felego’? Na o swanetše go thoma go kgoboketša dilo tša motheo goba go dira ditokišetšo tše dingwe? Le gatee. Beibele e re kgothaletša ka matla gore re se etiše dilo tšeo pele bophelong. Re bala gore: “Ka ge dilo tše ka moka di tla tologa ka tsela yeo, gona le hlokomeleng mohuta wa batho bao le swanetšego go ba bona ditirong tše kgethwa tša boitshwaro le medirong ya boineelo go Modimo, ge le dutše le letile e bile le dula le nagana ka go ba gona ga letšatši la Jehofa.” (2 Petro 3:10-12) Taba e dikologilego e bontšha gore “dilo tše ka moka” tšeo di tlago go tološwa di akaretša mebušo ya lefase le leo le senyegilego le bohle bao ba kgethago mebušo e bjalo go e na le go kgetha Mmušo wa Modimo. Go molaleng gore ge e ba re be re ka kgoboketša dilo tše di bonagalago, seo se ka se re phološe phedišong yeo.

Ruri go phološwa ga rena go akaretša go ineela go Jehofa Modimo le go ithuta mohuta wa boitshwaro le ditiro tšeo di mo kgahlišago. (Tsefanya 2:3) Go e na le go latela batho ba bantši ba mehleng yeno le go hlokomologa dipontšho tše di lego molaleng tšeo di bontšhago gore re phela dinakong tšeo tše bohlokwa, re swanetše go “dula [re] nagana ka go ba gona ga letšatši la Jehofa.” Dihlatse tša Jehofa di ka go bontšha go tšwa Beibeleng kamoo o ka phologago letšatši le leo le tlago.

Ithute ka mo go oketšegilego

Ditaba tše Dibotse ke Eng?

Ithute seo se bolelwago ke ditaba tše dibotse, ke ka baka la eng di akgofile, le gona ke eng seo o swanetšego go se dira.

O Swanetše go Dira’ng Gore o Kwešiše Beibele?

Go sa šetšwe setlogo sa gago, o ka kgona go kwešiša molaetša wa Modimo wo o lego ka Mangwalong a Makgethwa.