Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI MAY 2015

Dipotšišo tša Beibele di a Arabja

Dipotšišo tša Beibele di a Arabja

Letšatši la Kahlolo ke’ng?

Ke ka baka la’ng letšatši la kahlolo e tla ba nako e thabišago?

Mehleng ya ge go ngwalwa Beibele, Modimo o be a diriša baahlodi go phološa batho ba gagwe ditirong tša go hloka toka. (Baahlodi 2:18) Beibele e hlalosa Letšatši la Kahlolo leo le tlago e le nako e thabišago yeo ka yona Jehofa, Moahlodi wa lefase ka moka, a tlago go phološa batho ditirong tša go hloka toka.—Bala Psalme 96:12, 13; Jesaya 26:9.

Modimo o kgethile Jesu go nea batho bao ba phelago gotee le ba hwilego toka. (Ditiro 10:42; 17:31) Batho ba bantši ba hwile ba sa tsebe Modimo. Letšatšing la Kahlolo, Jesu o tla bušetša batho ba bjalo bophelong e le gore ba tle ba tsebe Modimo wa therešo le go mo rata.—Bala Ditiro 24:15.

Ke ka baka la’ng Letšatši la Kahlolo le tla tšea nywaga e sekete?

Bahu ba tla tsošwa nakong ya nywaga e sekete. (Kutollo 20:4, 12) Ba tla nyaka nako ya go ithuta ka ditsela tša Modimo le go mo kwa. Go fapana le seo se tlwaelegilego, Beibele e bontšha gore batho ba tla ahlolwa motheong wa seo ba se dirago ka morago ga tsogo ya bona.—Bala Baroma 6:7.

Le gona Beibele e hlalosa letšatši la kahlolo leo le tla tlago go sa letelwa pele ga ge nako ya nywaga e sekete e ka thoma. Letšatši leo gape le bitšwa bofelo, bjalo ka ge bo ahlaahlwa dihlogong tša taba ya letlakala la ka ntle tša tokollo ye. Letšatšing leo, Modimo o tla fediša batho ka moka bao ba sa boifego Modimo bao e lego ba kgopo. (2 Petro 3:7) Ka gona, re swanetše go hlokomela gore re bontšhe gore re rata Modimo.—Bala 2 Petro 3:9, 13.