Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI APRIL 2015

 TABA YA LETLAKALA LA KA NTLE | NA O KA RATA GO ITHUTA BEIBELE?

Lenaneo la go Ithuta Beibele Bakeng sa Bohle

Lenaneo la go Ithuta Beibele Bakeng sa Bohle

Dihlatse tša Jehofa di tsebja kudu ka modiro wa tšona wa boboledi bja phatlalatša. Eupša na o be o tseba gore e bile re swara lenaneo la go ithuta Beibele la lefase ka bophara?

Ka 2014, Dihlatse tše ka godimo ga tše 8 000 000 dinageng tše 240 di ile tša swara dithuto tša Beibele tše e nyakilego go ba tše 9 500 000 kgwedi le kgwedi. * Ruri palo ya batho bao ba ithutago Beibele le rena e feta palo ya badudi ba dinaga tše ka bago tše 140 tše di ikemetšego!

E le gore modiro wo wa go ruta ka Beibele o phethwe, ngwaga le ngwaga Dihlatse tša Jehofa di gatiša Dibeibele, dipuku, dimakasine le dikgatišo tše dingwe tšeo di theilwego Beibeleng tše di nyakilego go ba tše bilione le seripa—ka maleme a ka bago a 700! Maiteko a a sa bapišegego a go gatiša a dira gore batho ba ithute Beibele ka maleme ao ba a ratago.

 DIKARABO TŠA DIPOTŠIŠO TŠEO DI BOTŠIŠWAGO KUDU TŠA MABAPI LE LENANEO LA RENA LA GO ITHUTA BEIBELE

Thuto e swarwa bjang?

Re tšea dihlogo tše fapafapanego tša Beibele gomme ra hlahloba ditemana tša Beibele tšeo di tswalanago le ditaba tšeo. Ka mohlala, Beibele e araba dipotšišo tše bjalo ka tše: Modimo ke mang? Ke motho wa mohuta mang? Na o na le leina? O dula kae? Na re ka batamela go yena? Tlhohlo yeo re ka bago le yona ke go tseba moo re ka tsomago dikarabo gona ka Beibeleng.

E le gore re thuše batho go hwetša dikarabo tša dipotšišo tše, gantši re diriša puku ya matlakala a 224 ya Ke Eng Seo ge e le Gabotse Beibele e se Rutago? * Puku ye e hlametšwe go thuša batho go kwešiša dithuto tša motheo tša Beibele. E akaretša dithuto tša mabapi le Modimo, Jesu Kriste, tlaišego ya batho, tsogo ya bahu, thapelo le ditaba tše dingwe tše dintši.

 Thuto e ka swarwa neng le gona kae?

Thuto e ka swarwa ka nako le lefelong leo le go swanetšego.

Thuto e ka swarwa ka nako e kaaka’ng?

Beke le beke batho ba bantši ba beela ka thoko iri goba go feta moo gore ba ithute Beibele. Eupša nako ya go ithuta e ithekgile ka motho. Re tla fetofetoga le mabaka gore re sepedišane le maemo a gago. Ba bangwe ba ithuta feela metsotso e 10 goba e 15 beke le beke.

Motho o lefa bokae gore a ithute?

Thuto ya Beibele le dipuku tšeo di dirišwago nakong ya thuto ke mahala. Se se sepedišana le taelo ya Jesu go barutiwa ba gagwe, yeo e rego: “Le amogetše feela, neang feela.”—Mateo 10:8.

Thuto e tšea lebaka le lekaaka’ng?

Go ithekgile ka wena gore lebaka le lekaakang. Puku ya Ke Eng Seo ge e le Gabotse Beibele e se Rutago? e na le dikgaolo tše 19. O ka ithuta kgaolo le ge e le efe yeo o e ratago goba dikgaolo go ya ka lebelo leo o le nyakago.

Na ke tlamegile go ba Hlatse ya Jehofa?

Aowa. Ka tlhompho re lemoga gore motho yo mongwe le yo mongwe o swanetše go kgetha seo a se dumelago. Lega go le bjalo, batho bao ba hwetšago tsebo ya motheo ya Beibele ba ka dira kgetho go ya ka tsebo yeo.

 Nka hwetša kae tsebišo e oketšegilego?

Wepesaete ya jw.org/nso e nea tsebišo e nepagetšego mabapi le ditumelo le mediro ya Dihlatse tša Jehofa.

Nka kgopela bjang thuto ya Beibele?

  • Tlatša kgopelo ya gago Inthaneteng go jw.org/nso.

  •  
  • Ikgokaganye le Dihlatse tša Jehofa tša kgauswi le moo o dulago gona. O ka nyaka “Jehovah’s Witnesses” lelokelelong la puku ya dinomoro tša mogala tša lefelong la geno.

^ ser. 4 Dithuto tša Beibele gantši di swarwa le batho goba dihlopha tše dinyenyane tša batho.

^ ser. 9 E gatišitšwe ke Dihlatse tša Jehofa. Go šetše go gatišitšwe dikopi tše di fetago tše dimilione tše 230 tša puku ye gomme e hwetšagala ka maleme a fetago a 260.

Ithute ka mo go oketšegilego

Go Gatiša Dikgatišo Lefaseng ka Bophara go Thuša Batho go Tseba Modimo

Dihlatse tša Jehofa di na le mafelo a go gatiša a 15 lefaseng ka bophara, go tšweletša dikgatišo tšeo di theilwego Beibeleng ka maleme a ka bago a 700.

Na Beibele e ka Nthuša go ba le Lapa Leo le Thabilego?

Keletšo e bohlale yeo e tšwago ka Beibeleng e šetše e thušitše banna le basadi ba dimilione go ba le lethabo ka gae.