Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI JANUARY 2015

 BEIBELE E FETOŠA MAPHELO

Therešo ya Beibele e Ile ya Mpha Dikarabo tše Kgodišago

Therešo ya Beibele e Ile ya Mpha Dikarabo tše Kgodišago
  • NGWAGA WA MATSWALO: 1987

  • NAGA: AZERBAIJAN

  • BOPHELO BJA PELE E EBA MOKRISTE: TATAGWE E BE E LE MOMOSELEME GOMME MMAGWE E LE MOJUDA

BOPHELO BJA KA BJA NAKONG E FETILEGO:

Ke belegetšwe kua Baku, Azerbaijan, ke le wa mafelelo baneng ba babedi. Tate e be e le Momoseleme gomme mma e le Mojuda. Batswadi ba ka ba be ba ratana le go amogelana ka ditumelo tša bona tše di sa swanego. Mma o be a thekga tate ge a be a ikona dijo ka kgwedi ya Ramadan gomme tate a thekga mma ge a keteka Paseka. Ka gae re be re na le Koran, Torah gotee le Beibele.

Ke be ke itšea ke le Momoseleme. Le ge ke sa ka ka belaela gore Modimo o gona, go be go na le ditaba tšeo di nkgakantšhago. Ke be ke ipotšiša gore: ‘Ke ka baka la’ng Modimo a bopile batho, gomme gore’ng motho a tlaišega bophelo ka moka a be a feleletše ka go tlaišwa sa ruri diheleng?’ Ka ge batho ba re dilo ka moka tšeo di diregago ke thato ya Modimo, ke ile ka ipotšiša gore: ‘Na Modimo o bakela batho mathata ke moka a kgahlwa ke go ba bogela ge ba tlaišega?’

Ge ke be ke na le nywaga e 12, ke ile ka thoma go rapela dithapelo tše hlano tša tirelo tša letšatši le letšatši tša Mamoseleme tšeo di bitšwago namaz. Ka nako yona yeo, tate o ile a iša nna le mogolwake sekolong sa Bajuda. Dithutong tšeo di bego di rutwa, re be re rutwa le metlwae ya Torah le polelo ya Seheberu. Letšatši le letšatši pele ga ge dithuto di ka thoma, re be re swanetše go rapela ka mokgwa wa Sejuda. Ka gona, mesong ke be ke rapela dithapelo tša namaz ka gae gomme mosegare ke rapela dithapelo tša Bajuda kua sekolong.

Ke be ke tloga ke nyaka dikarabo tše di kwagalago tša dipotšišo tša ka. Ke be ke dula ke botšiša borabi kua sekolong gore: “Ke ka baka la’ng Modimo a bopile batho? Modimo o lebelela bjang tate wa ka wa Momoseleme? Ke monna yo a lokilego, ka gona ke ka baka la’ng a lebelelwa e le yo a sa hlwekago? Ke ka baka la’ng Modimo a mmopile?” Dikarabo tše sego kae tšeo ke di hweditšego di be di sa kwagale le gona di sa nkgodiše.

KAMOO BEIBELE E FETOTŠEGO BOPHELO BJA KA:

Ke ile ka kgaotša go dumela go Modimo ka 2002. Re be re sa tšwa go hudugela Jeremane ge ka morago ga beke feela, tate a ehwa lehlakore ke moka a idibala ka nako telele. Ke be ke tšere nywaga e  mentši ke rapelela gore lapa lešo le phele gabotse. Ka ge ke be ke kgodišegile gore Ramatlaohle ke yena a nnoši a laolago bophelo le lehu, ke ile ka mo lopa letšatši le letšatši gore a phološe tate. Ke be ke nagana ka gore: ‘Modimo a ka se palelwe ke go phethagatša kgopelo e tšwago pelong ya mosetsana yo monyenyane.’ Ke be ke kgodišegile gore o tla kwa dikgopelo tša ka. Eupša tate o ile a hlokofala.

Ke ile ka nyama o šoro ge ke be ke bona eka Modimo ga a na taba le nna. Ke be ke ipotša gore: ‘Mohlomongwe ke rapela ka tsela e fošagetšego goba Modimo ga a gona.’ Ke be ke gakanegile e bile ke se sa kgona go rapela dithapelo tša namaz. Ka ge ke be ke sa kwešiše madumedi a mangwe, ke ile ka phetha ka gore Modimo ga a gona.

Ka morago ga dikgwedi tše tshela, Dihlatse tša Jehofa di ile tša re etela. Ka ge nna le mogolwake re be re sa tšeele Bokriste godimo, re be re nyaka go di bontšha ka botho gore di fošitše. Re ile ra di botšiša gore: “Go tla bjang gore Bakriste ba rapele Jesu, sefapano, Maria le medingwana e mengwe mola Melao e Lesome e ganetša seo?” Dihlatse di ile tša re bontšha bohlatse bjo bo kgodišago go tšwa Mangwalong bja gore Bakriste ba therešo ga se ba swanela go rapela medingwana le gore dithapelo di swanetše go lebišwa go Modimo feela. Seo se ile sa mmakatša.

Ke moka re ile ra botšiša gore: “Go thwe’ng ka Boraro Botee? Ge e ba Jesu e le Modimo, go tla bjang gore o ile a phela lefaseng gomme a bolawa ke batho?” Le mo di ile tša araba ka Beibele gomme tša hlalosa gore Jesu ga se Modimo le gona ga a lekane le Yena. Dihlatse di ile tša hlalosa gore ke ka baka leo di sa dumelego go Boraro Botee. Ke be ke maketše gomme ka nagana gore: ‘Ba ke Bakriste ba sa tlwaelegago.’

Lega go le bjalo, ke be ke nyaka go tseba lebaka leo ka lona batho ba hwago le leo ka lona Modimo a dumelelago tlaišego. Dihlatse di ile tša mpontšha puku ya Tsebo e Išago Bophelong bjo bo sa Felego, * yeo e bego e na le dikgaolo tše feletšego tšeo di arabago dipotšišo tša ka. Di ile tša thoma go ithuta Beibele le nna le semetseng.

Thutong e nngwe le e nngwe, ke be ke hwetša dikarabo tše kwagalago tšeo di theilwego Beibeleng tša dipotšišo tša ka. Ke ile ka ba ka tseba gore leina la Modimo ke Jehofa. (Psalme 83:18) Seka sa gagwe se segolo ke lerato la go hloka boithati. (1 Johane 4:8) O bopile batho ka gobane a nyaka go ba nea bophelo. Ke ile ka thoma go kwešiša gore le ge Modimo a dumelela go hloka toka, fela o go hloile e bile o tla tloga a go fedišetša sa ruri. Ke ithutile gore go rabela ga Adama le Efa go senyeditše batho. (Baroma 5:12) Ditlamorago tše dingwe tše di nyamišago ke go loba bao re ba ratago lehung, go swana le tate. Lega go le bjalo, Modimo o tla dirolla masetlapelo a bjalo lefaseng le lefsa leo le tlago, moo bao ba hwilego ba tla tsošwago.—Ditiro 24:15.

Therešo ya Beibele e ile ya mpha dikarabo tše kgodišago. Ke ile ka thoma gape go dumela go Modimo. Ge ke dutše ke tlwaelana le Dihlatse tša Jehofa, ke ile ka lemoga gore ke barwarre ba lefase ka bophara. Ke ile ka kgahlwa ke gore di na le botee le lerato. (Johane 13:34, 35) Seo ke ithutilego sona ka Jehofa se ile sa ntira gore ke nyake go mo hlankela, ka gona ka phetha ka go ba yo mongwe wa Dihlatse tša Jehofa gomme ka kolobetšwa ka January 8, 2005.

KAMOO KE ILEGO KA HOLEGA KA GONA:

Go kwagala ga Beibele ka tsela e kgodišago go kaonefaditše tsela yeo ke lebelelago bophelo ka yona. Ditlhaloso tše di botegago tšeo ke di hweditšego ka Lentšung la Modimo di ntlišetša khutšo ya ka gare. Ke thabišwa kudu le go homotšwa ke kholofelo ya go bona tate gape tsogong yeo e holofeditšwego Lentšung la Modimo.—Johane 5:28, 29.

Ke na le nywaga e tshela ke thabela lenyalo le monna wa ka Jonathan yo a boifago Modimo. Bobedi bja rena re ithutile gore therešo ka Modimo ke yeo e kwagalago le e bonolo, e bile ke letlotlo le bohlokwahlokwa. Ke ka baka leo re tšeelago godimo go botša ba bangwe ka tumelo ya rena le kholofelo ya rena e thabišago. Lehono ke tseba gore Dihlatse tša Jehofa ga se Bakriste ba sa “tlwaelegago” eupša ke ba therešo.

^ ser. 15 E gatišitšwe ke Dihlatse tša Jehofa eupša ga bjale ga e sa gatišwa.

Ithute ka mo go oketšegilego

Therešo ke Efe ka Modimo?

Na o nagana gore Modimo o tshwenyegile ka wena? Ithute ka semelo sa gagwe le kamoo o ka batamelago kgaufsi le yena.

Morero wa Modimo ka Lefase ke Ofe?

Beibele e hlalosa lebaka leo Modimo a bopilego lefase, tlaišego e tla fela neng, gomme bokamoso ke bofe ka lefase le bao ba dulago go lona.