Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI JANUARY 2015

Na o be o Tseba?

Na o be o Tseba?

Lentšu “moopafatšwa” le bolela’ng go ya kamoo le dirišwago ka Beibeleng?

Karolo ya seswantšho sa Asiria sa moopafatšwa

Ka dinako tše dingwe, lentšu le le ka šupa monna yo a opafaditšwego. Mehleng ya Beibele, banna ba bangwe ba be ba opafatšwa ge ba be ba otlwa goba ba thopša goba ba dirwa makgoba. Banna bao ba botwago bao ba bego ba opafaditšwe ba be ba hlokomela dintlo tša basadi ba direthe malapeng a ka bogošing. Ka mohlala, Hekai le Shaashakasi bao e bego e le baopafatšwa ba be ba hlankela e le bahlokomedi ba basadi ba Kgoši ya Peresia Ahasiwerosi le basadi ba gagwe ba direthe, yoo go naganwago gore ke Xerxes wa I.—Esitere 2:3, 14.

Lega go le bjalo, ga se bohle bao Beibele e ba bitšago baopafatšwa, bao ba ilego ba opafatšwa ka kgonthe. Diithuti tše dingwe di bolela gore lentšu le le be le dirišwa gape ka tsela e nabilego go šupa go mohlankedi yo a abetšwego go dira mediro e itšego ka lapeng la kgoši. Go bonagala e le kgopolo yeo lentšu leo le dirišitšwego ka yona go Ebede-meleke, modirišanigotee wa Jeremia, gotee le Moethiopia yoo moebangedi Filipi a ilego a bolela le yena. Go molaleng gore Ebede-meleke e be e le letona la maemo a godimo, ka ge a be a kgona go ya go Kgoši Tsedekia ka boyena. (Jeremia 38:7, 8) Le gona Moethiopia yo o hlaloswa e le ramatlotlo wa ka bogošing yoo a bego “a ile Jerusalema go yo rapela.”—Ditiro 8:27.

Ke ka baka la’ng badiši ba mehleng ya Beibele ba be ba kgethologanya dinku go dipudi

Ge Jesu a be a hlalosa kahlolo ya nakong e tlago o itše: “Ge Morwa wa motho a fihla ka letago la gagwe . . . o tla kgethologanya batho go etša ge modiši a kgethologanya dinku go dipudi.” (Mateo 25:31, 32) Ke ka baka la’ng badiši ba kgonthe ba be ba kgethologanya diphoofolo tše?

Gantši dinku le dipudi di be di dišwa le go fudišwa gotee mosegare. Bošego di be di hlahlelwa ka mašakeng ao a bego a di šireletša go diphoofolo tša naga, mahodu le diphefo. (Genesi 30:32, 33; 31:38-40) Mehuta e mebedi ya diphoofolo e be e hlahlelwa ka mašakeng a go se swane e le go šireletša dinku tše bonolo, kudukudu tše tshadi gotee le dikwana gore dipudi tše kotsi di se di gobatše. Puku ya All Things in the Bible e re gape modiši o be a kgethologanya dinku go dipudi ge “di tswala, di gangwa le ge di kotwa.” Seswantšho se sa Jesu se be se theilwe dilong tšeo batho ba Isiraele ya bogologolo ba bego ba tlwaetše go di bona le go di dira ka ge go be go tlwaetšwe dinku le badiši lefelong leo.

Ithute ka mo go oketšegilego

Bophelo bja Mehleng ya Beibele—Modiši

Ke diphoofolo tša mohuta mang tšeo modiši a bego a di hlokomela? Modiro wa gagwe o be o akaretša’ng?