Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI DECEMBER 2014

 TABA YA LETLAKALA LA KA NTLE | O KA BA KGAUSWI LE MODIMO

Na o Dira Seo Modimo a go Kgopelago go se Dira?

Na o Dira Seo Modimo a go Kgopelago go se Dira?

“Ge e ba go na le seo o nyakago ke go direla sona, e fo mpotša gomme ke tla thabela go se dira.” Mohlomongwe mantšu ao o ka se a botše motho yo o tlogago o sa mo tsebe goba motho feela yo o mo tlwaetšego. Lega go le bjalo, mohlomongwe o ka se be le bothata bja go botša mogwera wa gago wa paale mantšu ao. Gantši bagwera ba kgauswi ba na le go direlana dilo tšeo ba di kgopelanago.

Beibele e bontšha gore Jehofa ka mehla o dira dilo tšeo a tsebago gore di tla thabiša barapedi ba gagwe. Ka mohlala, Kgoši Dafida, yoo e bego e le mogwera wa kgauswi wa Modimo, o itše: “Wena Jehofa Modimo wa ka, o dirile dilo tše dintši, o re diretše dilo tše dintši tše di makatšago, gomme tšeo o re naganetšego tšona ke tše dintši . . . E ba tše dintši kudu moo ke palelwago ke go di anega.” (Psalme 40:5) Go feta moo, Jehofa e bile o dira dilo tšeo di thabišago bao ba sa hlwago ba mo tseba, ‘o khoriša dipelo tša bona ka mo go feletšego ka dijo le lethabo.’—Ditiro 14:17.

Re direla bao re ba ratago dilo ka lethabo le go ba hlompha

Ka ge Jehofa a thabela go dira dilo tšeo di thabišago ba bangwe, go tloga go kwagala go letela gore bao ba nyakago go ba bagwera ba Modimo ba tla dira dilo tšeo di ‘thabišago pelo’ ya gagwe. (Diema 27:11) Eupša ke’ng se se kgethegilego seo o ka se dirago gore o thabiše Modimo? Beibele e araba ka gore: “Le se ke la lebala go dira botse le go abelana le ba bangwe dilo tšeo le nago le tšona, gobane Modimo o kgahlišwa ke dihlabelo tše bjalo.” (Baheberu 13:16) Na se se bolela gore go dira botse le go abelana dilo le ba bangwe ke sohle seo se nyakegago gore re thabiše Jehofa?

Beibele e re: “Ka ntle le tumelo go kgahliša Modimo gabotse ga go kgonege.” (Baheberu 11:6) Seo se lemogegago ke gore e bile ka morago ga ge ‘Aborahama a bile le tumelo go Jehofa’ moo a ilego “a bitšwa mogwera wa Jehofa.” (Jakobo 2:23) Jesu Kriste gape o ile a gatelela go nyakega ga gore re ‘bontšhe tumelo go Modimo’ ge e ba re nyaka go thabela tšhegofatšo ya Modimo. (Johane 14:1) Ka gona o ka ba bjang le tumelo yeo Modimo a e nyakago go bao a ba batametšago kgauswi le yena? O ka thoma ka go ithuta ka mehla Lentšu la Modimo, e lego Beibele. Ka go dira bjalo, o tla ba le “tsebo e nepagetšego ya thato ya gagwe” gomme ka go re’alo wa ithuta tsela ya gore o mo “kgahliše ka mo go tletšego.” Ka gona, ge o dutše o gola tsebong e nepagetšego ya Jehofa le go diriša seo o ithutago sona ka ditekanyetšo tša gagwe tša go loka, tumelo ya gago go yena e tla gola gomme o tla dula a go batamela kudu.—Bakolose 1:9, 10.

Ithute ka mo go oketšegilego

Modimo o Nyaka Gore ke Dire’ng ka Bophelo bja ka?

Na o swanetše go bona mohlolo gore o tsebe thato ya Modimo? Hwetša karabo ya Beibele.

Na Batho Bohle ba na le Sebaka se se Lekanago sa go Tseba Modimo?

Ithute kamoo Modimo a kgonthišetšago gore batho ka moka ba dipelo tše di botegago ba ithuta ka yena.