Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI DECEMBER 2014

 TABA YA LETLAKALA LA KA NTLE | O KA BA KGAUSWI LE MODIMO

Na o Tseba Leina la Modimo le go le Diriša?

Na o Tseba Leina la Modimo le go le Diriša?

Na o ka nagana ka mogwera le ge e le ofe wa gago wa kgauswi yo o sa mo tsebego ka leina? Ga a gona. Mosadi wa Bulgaria yo a bitšwago Irina a boletše ka tshwanelo a re: “Ga go kgonege gore o be kgauswi le Modimo ge e ba o sa tsebe leina la gagwe.” Se se thabišago ke gore, bjalo ka ge go boletšwe sehlogong se se fetilego, Modimo o nyaka gore o mmatamele. Ka baka leo, ge e le gabotse o itsebišitše go wena a diriša Beibele, a re: “Ke nna Jehofa. Ke lona leina la ka.”—Jesaya 42:8.

Ge e le gabotse Modimo o itsebišitše go wena a diriša Beibele, a re: “Ke nna Jehofa. Ke lona leina la ka.”—Jesaya 42:8

Na ruri Jehofa o na le taba le gore o tseba leina la gagwe le go le diriša goba ga go bjalo? Ela hloko se: Leina la Modimo, leo le ngwadilwego ka ditumammogo tše nne tša Seheberu tšeo di tsebjago e le Tetragrammaton, le tšwelela dingwalweng tša mathomong tša Mangwalo a Seheberu ka makga ao e nyakilego go ba a 7 000. Ao ke makga a mantši kudu go feta ao leina le ge e le lefe ka Beibeleng le ilego la bitšwa ka ona. Ruri bjo ke bohlatse bja gore Jehofa o nyaka gore re tsebe leina la gagwe le go le diriša. *

Gantši segwera se thoma ka gore batho ba babedi ba tsebane ka maina. Na o tseba leina la Modimo?

Lega go le bjalo, ba bangwe ba ka nagana gore ka ge Modimo e le yo mokgethwa e bile e le Ramatlaohle, go diriša leina la gagwe e tla ba go mo nyatša. Ke therešo gore e tla ba phošo go diriša leina la Modimo ka tsela e sa swanelago, go fo etša ge o ka se diriše leina la mogwera wa gago wa kgauswi gampe. Lega go le bjalo, thato ya Jehofa ke gore bao ba mo ratago ba hlomphe leina la gagwe gomme ba le tsebatše. (Psalme 69:30, 31; 96:2, 8) Gopola gore Jesu o ile a ruta barutiwa ba gagwe gore ba rapele ba re: “Tatago rena wa magodimong, leina la gago a le kgethagatšwe.” Re ka tšea karolo go kgethagatšeng leina la Modimo ka go le tsebatša. Go dira bjalo go re batametša kgauswi kudu le yena.—Mateo 6:9.

Beibele e bontšha gore Modimo o šetša kudu “bao ba sa lebalego leina la gagwe.” (Maleaki 3:16) Jehofa o holofetša ka ba bjalo gore: “Ke tla mo šireletša ka gobane a tseba leina la ka. O tla mpitša gomme nna ka mo araba. Ke tla ba le yena tlalelong.” (Psalme 91:14, 15) Go tseba le go diriša leina la Jehofa go bohlokwa ge e ba re nyaka go ba le tswalano ya kgauswi le yena.

^ ser. 4 Ka manyami, diphetolelo tše dintši tša Beibele ga di na leina la Modimo, go sa šetšwe therešo ya gore le tšwelela gantši kudu ka Mangwalong a Seheberu, ao ka tlwaelo a bitšwago Testamente ya Kgale. Go e na le moo, legatong la leina la Modimo go ngwadilwe direto tše bjalo ka “Morena” goba “Modimo.” Bakeng sa tsebišo e oketšegilego mabapi le taba ye, bona matlakala 195-197 a puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.