Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI DECEMBER 2014

 BABADI BA RENA BA A BOTŠIŠA . . .

Ditherešo tša Mabapi le Keresemose ke Dife?

Ditherešo tša Mabapi le Keresemose ke Dife?

Batho ba dimilione lefaseng ka bophara ba keteka Keresemose ka mabaka a fapafapanego. Ba bangwe ba thabela dihla tša menyanya le bagwera le ba lapa. Ba bangwe ba nagana ka Modimo goba go gafa nako ya bona bakeng sa go thuša badiidi goba bahloki. Ditiro tše ka botšona ga go pelaelo gore di bohlokwa. Lega go le bjalo, ditiro tše tše dibotse di kgokaganywa le dikarolo tše sa kgahlišego tša letšatši le la maikhutšo.

Ya pele, batho ba bantši bao ba le ketekago ba dumela gore Keresemose ke letšatši la go keteka matswalo a Jesu. Lega go le bjalo, boradihistori ba bantši ba dumelelana ka gore letšatši la matswalo a gagwe ga le tsebje. Puku ya The Christian Book of Why e bolela gore “Bakriste ba pele ba ile ba gana go bea letšatši le itšego la go swaya go tswalwa ga Jesu” ka gobane ba be ba nyaka “go kgaogana le mekgwa ka moka ya boheitene.” Se se kgahlišago ke gore Beibele ga e re nee sešupo sa gore Jesu le ka mohla o ile a keteka matswalo a gagwe goba a motho yo mongwe. Go fapana le seo, o ile a laela balatedi ba gagwe gore ba gopole lehu la gagwe.—Luka 22:19.

Ya bobedi, diithuti tše dintši di dumela gore metlwae e mentši ya Keresemose e theilwe mekgweng yeo e sego ya Bokriste le ya boheitene. Mekgwa ye e akaretša Santa Claus gotee le go dirišwa ga sehlašana sa bolepu le mohlare wa Keresemose, go fana dimpho, go tšhungwa ga dikerese le dikota tše dikoto tša go thoma mollo wa Keresemose, go lekeletša dikgare tša go kgabiša tšeo di dirilwego ka matšoba le matlakala le go opela dikoša tša bodumedi tša Keresemose. Puku ya The Externals of the Catholic Church ge e bolela mabapi le metlwae e mengwe e itše: “Ke ba bakae ba rena bao ba tsebago gore re ka ba re keteka metlwae ya boheitene ge re nea goba re amogela dimpho tša Keresemose le ge re lekeletša dikgare tša go dirwa ka matlakala a matala ka magaeng a rena le dikerekeng?”

“Ke ba bakae ba rena bao ba tsebago gore re ka ba re keteka metlwae ya boheitene ge re nea goba re amogela dimpho tša Keresemose le ge re lekeletša dikgare tša go dirwa ka matlakala a matala ka magaeng a rena le dikerekeng?”—The Externals of the Catholic Church

Lega go le bjalo, mo gongwe o ka ba o ipotšiša gore bothata ke’ng ka go latela metlwae ye yeo e bonagalago e se na molato. Tšea ntlha ye ya boraro e le karabo. Modimo ga a amogele go tswakwa ga metlwae ya boheitene le borapedi bja therešo. A diriša moporofeta wa Gagwe Amose, Jehofa Modimo o ile a botša barapedi ba Gagwe ba go se kwe ba Isiraeleng ya bogologolo, a re: “Menyanya ya lena ke e hloile e bile ke e ganne . . . Tlošang mašata a dikopelo tša lena go nna.”—Amose 5:21, 23.

Ke ka baka la’ng a boletše mantšu a matla gakaakaa? Ela hloko seo batho ba mmušo wa ka leboa wa Isiraele ya bogologolo ba bego ba se dira. Kgoši ya bona ya pele, e lego Jeroboama, o ile a bea dinamane tša gauta metseng ya Dani le Bethele gomme a kgothaletša batho gore ba rapele dinamane tše go e na le go rapela Jehofa Modimo ka nepo tempeleng ya Jerusalema. Kgoši ye gape e ile ya hloma menyanya le go kgetha baperisita ba go thuša batho go e keteka.—1 Dikgoši 12:26-33.

Seo Baisiraele bao ba bego ba se dira se be se bonagala se hola. Go ba gona, na ba be ba sa dire dilo tše ka moka e le ge ba re ba rapela Modimo le go mo kgahla? Mantšu a matla ao Modimo a a boletšego a diriša Amose le baporofeta ba bangwe a bontšha gabotse kamoo Modimo a ikwago ka gona mabapi le mekgwa e bjalo. Modimo o boletše a diriša moporofeta Maleaki, a re: “Ke nna Jehofa; ga se ka fetoga.” (Maleaki 3:6) Na seo ga se re botše kamoo Modimo a ikwago ka gona ka meletlo e mentši ya Keresemose lehono?

Ka morago ga go ahlaahla ditherešo tšeo di lego ka mo godimo, batho ba dimilione ba ile ba phetha ka go tlogela go keteka Keresemose. Legatong la yona, ba hwetša lethabo le kgotsofalo ya kgonthe ge ba fetša nako le bagwera ba bona le ba lapa gotee le go thuša badiidi le bahloki le ge e le neng ge ba nyaka go dira bjalo mo ngwageng.

 

Ithute ka mo go oketšegilego

Ke ka Baka La’ng Dihlatse tša Jehofa di sa Keteke Keresemose?

Batho ba bantši ba keteka Keresemose go sa šetšwe gore e theilwe kae. Ithute lebaka leo Dihlatse tša Jehofa di sa e ketekego.

Borapedi Bjoo Modimo a bo Amogelago

Hlahloba ditsela tše tshelelago tšeo di hlaolago bodumedi feela bjo Modimo a bo amogelago.