Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2014

 POLEDIŠANO LE MOAGIŠANI

Mmušo wa Modimo o Thomile go Buša Neng? (Karolo 2)

Mmušo wa Modimo o Thomile go Buša Neng? (Karolo 2)

Se se latelago ke mohuta wa poledišano yeo Dihlatse tša Jehofa di ka bago le yona le moagišani. A re tšeeng gore Hlatse yeo e bitšwago Cameron e boetše legaeng la monna yo a bitšwago Jon.

TORO YA NEBUKADINETSARA—POELETŠO E KOPANA

Cameron: Jon, ke thabela go go bona gape. Ka mehla ke thabela dipoledišano tša rena tša Beibele tša beke le beke. * O šetše bjang?

Jon: Ke šetše gabotse, ke a leboga.

Cameron: Ke thabela gore o šetše gabotse. Nakong e fetilego ge ke be ke le mo, re ile ra boledišana ka lebaka leo ka lona Dihlatse tša Jehofa di bolelago gore Mmušo wa Modimo o thomile go buša ka 1914. * Ka ge re ahlaahlile taba yeo, re hwetša bohlatse bjo bogolo boporofeteng bjo bo lego go kgaolo 4 ya puku ya Beibele ya Daniele. Na o gopola seo se begilwego moo?

Jon: Go begilwe ka toro ya Kgoši Nebukadinetsara ya mabapi le sehlare se segolo.

Cameron: O tloga o nepile. Torong ya gagwe, Nebukadinetsara o ile a bona sehlare se seteleletelele seo se bego se fihla magodimong. O ile a kwa moromiwa wa Modimo a laela gore sehlare seo se rengwe, eupša kutu le medu ya sona di šadišwe mmung. Ka morago ga lebaka la “mabaka a šupago,” sehlare se be se tla gola gape. * E bile re ahlaahlile lebaka leo ka lona boporofeta bjo bo nago le diphethagalo tše pedi. Na o sa gopola gore phethagalo ya mathomo e bile efe?

Jon: Na ga se selo seo se diragaletšego Nebukadinetsara ka boyena? O ile a hlakana hlogo ka nywaga e šupago.

Cameron: O nepile. Nebukadinetsara o ile a hlakana hlogo ka lebakanyana, ka gona bogoši bja gagwe bja šitišwa. Eupša phethagalong e kgolo ya boporofeta, bogoši bja Modimo bo be bo tla šitišwa ka tsela e itšego lebaka la mabaka a šupago. Ka ge re bone, mabaka a šupago a thomile ge Jerusalema e be e fedišwa ka 607 B.C.E. Go tloga ka nako yeo go ya pele, ga se gwa ka gwa ba le dikgoši lefaseng tšeo di bego di emela Jehofa Modimo ka go buša batho ba gagwe. Lega go le bjalo, bofelong bja mabaka a šupago, Modimo o be a tla kgetha Mmuši yo mofsa wa go buša batho ba gagwe—motho yo a lego legodimong. Ka mantšu a mangwe, bofelo bja mabaka a šupago bo be bo tla swaya mathomo a bogoši bja Modimo bja Mmušo wa legodimong. Bjale re šetše re ahlaahlile gore mabaka a šupago a thomile neng. Ka gona ge e ba re ka hwetša gore a tšere nako e kaakang, gona re tla tseba gore Mmušo wa Modimo o thomile go buša neng. Na o sa na le nna?

Jon: Ee, poeletšo ye e nthušitše gore ke kgone go ikgopotša.

Cameron: Gona go lokile. Anke re thome poledišano ya rena, ke moka re ahlaahle botelele bja mabaka a šupago. Ke sa tšwa go fetša go bala ka taba ye bakeng sa go ikgopotša dintlha tše kgolo. Ke tla leka go di hlalosa gabotse ka mo nka kgonago.

Jon: Go lokile.

 GO FELA GA MABAKA A ŠUPAGO—MEHLA YA BOFELO E A THOMA

Cameron: Phethagalong ya mathomo ya boporofeta yeo e bego e akaretša Nebukadinetsara, go bonagala mabaka a šupago e be e le nywaga e šupago ya kgonthe. Eupša phethagalong e kgolo yeo e akaretšago Mmušo wa Modimo, mabaka a šupago a swanetše go ba a feta kudu nywaga e šupago ya kgonthe.

Jon: Go re’ng o re’alo?

Cameron: Goba gona, gopola gore mabaka a šupago a thomile ge Jerusalema e be e fedišwa ka 607 B.C.E. Ge e ba re thoma go balela go tloga ka ngwaga woo, nywaga e šupago ya kgonthe e be e tla re fihliša ngwageng wa 600 B.C.E. Eupša ga go selo seo se diragetšego ngwageng woo ge e le mabapi le bogoši bja Modimo. Le gona, ka ge re šetše re ahlaahlile seo, nywagakgolo ka morago ge Jesu a be a le mo lefaseng, o ile a bontšha gore mabaka a šupago a be a se a hlwa a fela.

Jon: Ruri go bjalo. Ke a gopola bjale.

Cameron: Ka gona, go e na le gore e be nywaga ya kgonthe, mabaka a šupago a swanetše go ba a akaretša lebaka le leteletšana la nako.

Jon: E telele gakaaka’ng?

Cameron: Puku ya Beibele ya Kutollo, yeo e sepedišanago kudu le puku ya Daniele, e re thuša go bona gore mabaka a šupago ge e le gabotse ke nako e kaakang. E hlalosa gore mabaka a mararo le seripa a lekana le matšatši a 1 260. * Ka gona, mabaka a šupago—mabaka a mararo le seripa ge a balwa gabedi—a tla lekana le matšatši a 2 520. Na o sa na le nna?

Jon: Ee, ke a go kwa. Eupša ga ke bone gore se se bontšha bjang gore Mmušo wa Modimo o thomile go buša ka 1914.

Cameron: Go lokile, a re bone ge e ba re ka hwetša gore di sepedišana bjang. Ka dinako tše dingwe, letšatši le emela ngwaga boporofeteng bja Beibele. * Ge e ba re latela molao wa gore letšatši le emela ngwaga, gona mabaka a šupago a tla lekana le nywaga e 2 520. Ge re balela pele go tloga ka 607 B.C.E., nywaga e 2 520 e re fihliša ngwageng wa 1914. * Ke ka tsela yeo re fihlago go 1914 e le ngwaga wa go fela ga mabaka a šupago, e lego go thoma ga Jesu go buša e le Kgoši ya Mmušo wa Modimo. Le gona re lemoga gore ga e sa le go tloga ka 1914, go bile le ditiragalo tše dikgolo lefaseng—e lego ditiragalo tšeo Beibele e boletšego ka tšona e sa le pele bakeng sa mehla ya bofelo.

Jon: Ke ditiragalo tša mohuta mang?

Cameron: Ela hloko seo se boletšwego ke Jesu, ka ge se begilwe mo go Mateo 24:7. Jesu ge a bolela mabapi le nako yeo a bego a tla thoma go buša a le legodimong, o itše: “Setšhaba se tla tsogela setšhaba gomme mmušo wa tsogela mmušo; go tla ba le tlhaelelo ya dijo le ditšhišinyego tša lefase lefelong le lengwe ka morago ga le lengwe.” Ela hloko gore Jesu o boletše e sa le pele gore nakong yeo go tla ba le tlhaelelo ya dijo le ditšhišinyego tša lefase. Na ga se therešo gore ruri lefase la rena le bile le mathata a mohuta woo ngwagakgolong o fetilego?

Jon: Ke therešo.

Cameron: Temaneng ye, Jesu gape o boletše e sa le pele ka go ba gona ga ntwa nakong ya go ba gona ga gagwe e le Kgoši ya Mmušo wa Modimo. Le puku ya Beibele ya Kutollo ga se ya bolela e sa le pele ka ntwa ya tikologong feela eupša e boletše ka dintwa tšeo di bego di tla kgoma lefase ka moka mehleng ya bofelo. * Na o sa gopola gore ntwa ya pele ya lefase e thomile neng?

Jon: E thomile ka 1914, ngwageng wona woo o rego Jesu o thomile go buša! Ga se ka ka ka tšea gore ditaba tše di a sepedišana.

 Cameron: Ge re kopanya ditaba tše ka moka—boporofeta bja mabapi le mabaka a šupago gotee le diporofeto tše dingwe tša Beibele mabapi le mehla ya bofelo—ruri di a kwagala. Dihlatse tša Jehofa di kgodišegile gore Jesu o thomile go buša e le Kgoši ya Mmušo wa Modimo ka 1914 le gore mehla ya bofelo e thomile ngwageng wona woo. *

Jon: Ke sa leka go kwešiša dilo tše ka moka.

Cameron: Ke kwešiša seo gabotse. Ka ge ke boletše pejana, le nna go ntšere nakwana pele nka di kwešiša ka moka. Eupša bonyenyane, ke holofela gore poledišano ya rena e go thušitše go bona gore gaešita le ge ngwaga wa 1914 o se wa ngwalwa ka go lebanya ka Beibeleng, Dihlatse tša Jehofa di thea ditumelo tša tšona Mangwalong mabapi le ngwaga woo.

Jon: Ee, ke sona seo se bego se dutše se nkgahla ka lena—go sa šetšwe seo le bolelago ka sona, le se thekga ka lengwalo. Le ka mohla ga le ke le bolela kgopolo ya lena. Lega go le bjalo, ke ipotšiša gore go re’ng taba ye e raragane. Ke ka baka la’ng Modimo a sa ka a fo re botša ka Beibeleng gore 1914 e be e tla ba ngwaga woo ka wona Jesu a bego a tla thoma go buša a le legodimong?

Cameron: Jon, yeo ke potšišo e botse kudu. Ge e le gabotse, go na le dilo tše dintši tšeo di sa bolelwego ka go lebanya ka Mangwalong. Gona ke ka baka la’ng Modimo a dirile gore Beibele e ngwalwe ka tsela yeo e bego e tla nyaka gore batho ba dire maiteko go e kwešiša? Mohlomongwe re ka bolela ka taba yeo ge ke go etela gape.

Jon: Nka thabela seo.

Na go na le taba e itšego ya Beibele yeo e lego kgale o ipotšiša yona? Na o ipotšiša dipotšišo mabapi le ditumelo goba ditiro le ge e le dife tša bodumedi tša Dihlatse tša Jehofa? Ge e ba go le bjalo, o se ke wa dikadika go botšiša yo mongwe wa Dihlatse tša Jehofa. Yena o tla thabela go boledišana le wena ka ditaba tše bjalo.

^ ser. 5 Di diriša lenaneo la tšona la mahala la thuto ya Beibele, Dihlatse tša Jehofa di ahlaahla Beibele go ya ka dihlogo le baagišani ba tšona.

^ ser. 7 Bona sehlogo se se rego, “Poledišano le Moagišani—Mmušo wa Modimo o Thomile go Buša Neng?—Karolo 1” tokollong ya October 1, 2014, ya makasine wo.

^ ser. 22 Bona Kutollo 12:6, 14; mongwalo wa ka tlase wa nwt-E.

^ ser. 24 Bona tšhate e rego, “Toro ya Sehlare ya Nebukadinetsara.”

^ ser. 30 Bona kgaolo 9 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

Ithute ka mo go oketšegilego

Ditiragalo tša Beibele di Utolla Eng ka Ngwaga wa 1914?

Boporofeta bja “mabaka a šupago” bjoo bo lego go Daniele kgaolo 4 bo bolela ka dinako tše thata tša pušo ya batho.

Na re Phela “Mehleng ya Bofelo”?

Ela hloko kamoo ditiro le boitshwaro bja batho bjo bo re dikologilego bo hlatselago gore ga bjale re phela “mehleng ya bofelo” yeo Beibele e boletšego ka yona e sa le pele.