Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2014

 TABA YA LETLAKALA LA KA NTLE | NA SATHANE KE WA KGONTHE?

Na Sathane e fo ba Seka sa Bobe?

Na Sathane e fo ba Seka sa Bobe?

Go bonolo go bolela gore Sathane yo re balago ka yena ka Beibeleng e fo ba seka sa dilo ka moka tše mpe. Eupša na ruri seo ke se Beibele e se rutago? Ge e ba go le bjalo, ke ka baka la’ng Beibele e hlalosa Sathane a bolela le Jesu Kriste le Modimo Ramatlaohle? Ela hloko mehlala e mebedi ya dipoledišano tšeo.

GE SATHANE A BE A BOLELA LE JESU

Ge Jesu a be a thoma bodiredi bja gagwe, Diabolo o ile a leka go mo goketša ka diteko tše tharo. Ya pele, Sathane o lekile go gapeletša Jesu gore a diriše matla a gagwe ao a a filwego ke Modimo ka tsela ya boithati bakeng sa go ikhoriša. Ke moka, Diabolo o ile a leka Jesu ka gore a bee bophelo bja gagwe kotsing ka tsela ya bošilo ya gore a lebiše tlhokomelo go yena. Mafelelong, Sathane o ile a holofetša Jesu bogoši bja mebušo ka moka ya lefase ge yena a be a ka mo rapela ganyenyane. Jesu o ile a gana ditlhaselo tšeo tše tharo ka moka tša mahlajana, nako le nako a tsopola Mangwalo.—Mateo 4:1-11; Luka 4:1-13.

Jesu o be a bolela le mang? Na o be a bolela le seka sa bobe seo se bego se le ka go yena? Go ya ka Mangwalo, Jesu ke yo a “lekilwego ka ditsela tšohle go swana le rena, eupša a se na sebe.” (Baheberu 4:15) Beibele gape e re: “Ga se a ka a dira sebe, le gona ga se gwa hwetšwa bofora molomong wa gagwe.” (1 Petro 2:22) Jesu o ile a dula a phethagetše, a botega. Ga se a ka a dumelela seka sa bobe se mela ka go yena. Go molaleng gore Jesu o be a sa bolele le karolo e itšego ya bobe go yena; o be a bolela le motho wa kgonthe.

Poledišano yona yeo e utolla bohlatse bjo bongwe bja gore Sathane ke motho wa kgonthe.

  • Gopola gore Diabolo o be a holofeditše Jesu bogoši bja lefase ka moka ge yena a be a ka mo rapela. (Mateo 4:8, 9) Kholofetšo e bjalo e be e ka se be le mohola ge nkabe Sathane e be e se wa kgonthe. Go oketša moo, Jesu ga se a ka a belaela Sathane ge a be a ipolela gore o na le matla a magolo gakaalo a taolo.

  • Ka morago ga ge Jesu a ganne diteko tšeo, Diabolo o ile “a mo tlogela go fihla ka nako e nngwe e loketšego.” (Luka 4:13) Na tabeng ye Sathane o bonagala e le seka sa bobe goba lenaba le le phegelelago leo le ikemišeditšego?

  • Ela hloko gore ‘barongwa ba ile ba tla ba hlankela’ Jesu. (Mateo 4:11) Na barongwa bao e be e le batho ba kgonthe ba moya, bao ba kgothatšago Jesu le go mo thuša? Go molaleng gore go bjalo. Ka gona, ke ka baka la’ng re swanetše go nagana gore Sathane e be le selotsoko go e na le gore e be sebopiwa sa kgonthe sa moya?

 GE SATHANE A BE A BOLELA LE MODIMO

Mohlala wa rena wa bobedi o akaretša pego ya monna yo a boifago Modimo e lego Jobo. Pego yeo e re botša ka dipoledišano tše pedi magareng ga Diabolo le Modimo. Dipoledišanong tšeo ka bobedi, Modimo o ile a reta Jobo ka go botega ga gagwe. Sathane o ile a re Jobo o be a hlankela Modimo feela ka baka la mabaka a boithati, a bontšha gore Modimo o be a reka potego ya Jobo. Ge e le gabotse, Diabolo o be a ipolela gore o tseba Jobo gakaone go feta Modimo. Jehofa o ile a dumelela Sathane go amoga Jobo mahumo a gagwe, bana ba gagwe gaešita le go phela ga gagwe gabotse mmeleng. * Ge nako e dutše e eya, go ile gwa ba molaleng gore Jehofa o be a nepile ka Jobo, gomme Sathane a bonagala e le wa maaka. Modimo o ile a šegofatša Jobo bakeng sa potego ya gagwe.—Jobo 1:6-12; 2:1-7.

Dipoledišanong tšeo tša magareng ga Modimo le Sathane, na Jehofa o be a bolela le seka sa bobe seo se bego se le ka go yena? Beibele e re: “Ge e le Modimo wa therešo yena, tsela ya gagwe e phethagetše.” (2 Samuele 22:31) Lentšu la Modimo gape le re: “Mokgethwa, mokgethwa, mokgethwa ke Jehofa Modimo, Ramatlaohle.” (Kutollo 4:8) Lentšu bokgethwa le bolela go sekega, go ba kgole le sebe. Jehofa o phethagetše e bile ga a na phošo. Ruri a ka se be le dika le ge e le dife tša bobe.

Poledišano ya Sathane le Modimo e ile ya kgoma monna yo a bitšwago Jobo ka go lebanya

Le gona, ba bangwe ba ka bolela gore Jobo le yena e be e se motho wa kgonthe, ka gona poledišano yeo ka moka e be e le ya seswantšhetšo. Eupša na polelo yeo e a kwagala? Ditemana tše dingwe tša Beibele di bontšha gore Jobo e be e le motho wa kgonthe. Ka mohlala, go Jakobo 5:7-11, re hwetša gore Jobo o dirišwa e le mohlala wo o tutuetšago Bakriste go kgotlelela dinako tše thata e bile e le kgopotšo e homotšago ya gore Jehofa o putsa kgotlelelo e bjalo. Mohlala wo o be o ka tutuetša bjang ge e ba Jobo e be e se motho wa kgonthe gomme ditlhaselo tše tšwago go Sathane e be e fo ba tša boikgopolelo? Go oketša moo, go Hesekiele 14:14, 20, Jobo o akaretšwa le Noa le Daniele lelokelelong la banna ba bararo ba go loka. Go swana le Noa le Daniele, Jobo e be e le motho wa kgonthe, monna wa tumelo e kgolo. Ge e ba Jobo e be e le wa kgonthe, na mohlasedi wa gagwe, yena yo a bego a mo tlaiša, le yena e be e ka se be wa kgonthe?

Go molaleng gore Beibele e bolela ka Sathane e le motho wa kgonthe wa moya. Lega go le bjalo, o ka ipotšiša gore: ‘Na a ka ba kotsi go nna le go ba lapa lešo lehono lefaseng le la mehleng yeno?’

GO THWE’NG KA MEHLA YA RENA?

Akanya sehlopha sa dikebekwa se kgeregela motseng wa geno go sa letelwa. Go molaleng gore tšhireletšego ya batho gotee le ditekanyetšo tša boitshwaro tikologong di tla phuhlama. Bjale ela hloko tiragalo e swanago: Sathane le batemona ba gagwe—dibopiwa tša kgonthe tša moya, tšeo ka go swana le Sathane, di ilego tša rabela go Modimo—gateetee ba lahlelwa lefaseng. Se se tla feleletša ka eng? Goba gona, nagana ka seo o se bonago ditabeng tša tikologong ya geno le tša lefaseng ka moka.

  • Na o bona koketšego ya ditiro tša go hloka tlhaologanyo le tša bošoro, go sa šetšwe maiteko ao a dirwago lefaseng ka bophara a go di thibela?

  • Na o bona koketšego ya boithabišo bjo bo bontšhago go dirišana le meoya, go sa šetšwe go tshwenyega ga batswadi ba bantši?

  • Na o bona tikologo yeo e duletšego go senywa go sa šetšwe maiteko ao a dirwago ka maikemišetšo a mabotse bakeng sa go e šireletša?

  • Na go bonagala eka go tloga go na le selo seo se sa sepelego gabotse setšhabeng—e lego gore go na le matla a itšego ao a kgoromeletšago batho tshenyegong?

Hle ela hloko gore Beibele e re ke mang yo a bakago mathata a gona bjale, ge e re: “Ka gona drakone e kgolo ya lahlwa, yona noga ya kgale yeo e bitšwago Diabolo le Sathane, yeo e timetšago lefase ka moka; ya lahlelwa lefaseng gomme barongwa ba yona ba lahlwa le yona. . . . Go madimabe lefase le lewatle, gobane Diabolo o theogetše go lena a galefile kudu, ka ge a tseba gore o na le nako e kopana.” (Kutollo 12:9, 12) Ka morago ga go ela hloko bohlatse bjo, batho ba bantši ba ile ba phetha ka gore Sathane ke motho wa moya yo kotsi yo a duletšego go tutuetša lefase leo le re dikologilego.

O ka ipotšiša gore o ka hwetša bjang tšhireletšo. Go tshwenyega mo go bjalo ke ga maleba. Sehlogo se se latelago se tla nea thušo e šomago.

^ ser. 12 Jehofa ke leina la Modimo bjalo ka ge le utolotšwe ka Beibeleng.