Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2014

 TABA YA LETLAKALA LA KA NTLE | NA SATHANE KE WA KGONTHE?

Na re Swanetše go Boifa Sathane?

Na re Swanetše go Boifa Sathane?

Carbon monoxide ga e bonagale e bile e kotsi—go swana le Sathane

Ga go bonolo go o bona. Ka ge o se na mmala le monkgo, o ka tsena batho ba sa lemoge. Mohlomongwe ka godimo ga seripa sa mahu ka moka ao a bago gona lefaseng ka bophara ao a bakwago ke mpholo a ka ba a bakwa ke lenaba le: carbon monoxide. Lega go le bjalo, ga se ra swanela go tšhoga. Go na le ditsela tša go lemoga moya woo le go itšhireletša go wona. Batho ba bantši ka bohlale ba tsenya metšhene yeo e lemošago gomme ba šetša ditemošo.

Go swana le carbon monoxide, Sathane ga a bonagale, ga go bonolo gore batho ba mo lemoge, e bile o kotsi o šoro. Eupša Modimo ga se a re tlogela ntle le thušo. Ga se wa swanela go boifa Sathane ge e ba o diriša dimpho tše Modimo a re neago tšona tše di latelago.

Matla a go ikgethela. Jakobo 4:7 e re botša gore: “Le ganetše Diabolo, yena o tla le tšhaba.” Le ge Sathane a na le matla, a ka se go gapeletše go dira dilo tšeo o sa nyakego go di dira. O na le kgetho. Petro wa Pele 5:9 e re: “Emeletšanang le yena [Diabolo] le tiile tumelong.” Gopola gore Sathane o ile a tlogela Jesu ka morago ga gore a gane diteko tše tharo ka go tia. (Mateo 4:11) Le wena o ka kgetha go ganetša maiteko a Sathane.

Go gwerana le Modimo. Jakobo 4:8 e re kgothaletša go ‘batamela Modimo.’ Jehofa ka boyena o go laletša go hlagolela segwera sa kgauswi le yena. O ka dira seo bjang? Tsela e kaone ya go thoma ke go ithuta mo go oketšegilego ka yena ka Beibeleng. (Johane 17:3) Seo o ithutago sona ka Jehofa se tla go tutueletša go mo rata, gomme lerato leo lona le tla go tutueletša go dira thato ya gagwe. (1 Johane 5:3) Ge o dutše o batamela kgauswi le Tatago wa legodimong, yena o tla arabela bjang? Jakobo o tšwela pele ka gore: ‘Modimo o tla go batamela.’

Jehofa o nea ditokišetšo tša moya bakeng sa go go šireletša

Kholofetšo ya tšhireletšo. Diema 18:10 e re: “Leina la Jehofa ke tora e matla. Moloki o tšhabela go lona gomme a šireletšwa.” Ke therešo gore seo ga se bolele gore leina la Modimo ka tsela e itšego ke pheko ya mahlatse. Go e na le moo, se se bolela gore bao ba tlogago ba hlompha leina la Modimo ba ka mo kgopela nako le ge e le efe gore a ba šireletše.

Mohlala o šomago. Ditiro 19:19 e re botša se sengwe seo se sedimošago ka bao e bego e sa tšwa go ba Bakriste kua Efeso, ge e re: “Ba bantši ba bao ba bego ba dira malea ba kgobokanya dipuku tša bona gomme ba di fiša pele ga mang le mang. Ba bala theko ya tšona ka moka gomme ba hwetša di bitša  ditsekana tša silifera tše dikete tše masomehlano (50 000).” * Bakriste bao ba ile ba fiša didirišwa le ge e le dife tšeo di bego di sepedišana le go dirišana le meoya, go sa šetšwe theko ya tšona e kgolo. Mohlala wo o ka re thuša kudu lehono. Lefase le le nweletše go dirišaneng le meoya. Gaešita le dilo tšeo di sepedišanago le go dirišana le meoya le mekgwa yeo e bonagalago e se na molato di ka dira gore motho a tutuetšwe ke botemona. Go bohlokwa gore o ntšhe dilo tše bjalo bophelong bja gago, go sa šetšwe gore go direga eng.—Doiteronomio 18:10-12.

Rogelio, yo go boletšwego ka yena sehlogong sa mathomo sa lelokelelo le la dihlogo, o be a sa dumele gore Diabolo o gona go fihlela a eba le nywaga e 50. Eupša o ile a hlahlobišiša dipono tša gagwe. Ka baka la’ng? Rogelio o gopola ka gore: “E be e le la mathomo bophelong bja ka ke hwetša Beibele. Tsebo ya Mangwalo e ile ya nkgodiša gore Diabolo o gona. Tsebo yona yeo ga bjale e ntšhireletša tutuetšong ya gagwe.”

“Tsebo ya Mangwalo e ile ya nkgodiša gore Diabolo o gona. Tsebo yona yeo ga bjale e ntšhireletša tutuetšong ya gagwe”

Na o ka rata go ba gona nakong yeo Sathane a tla bego a se sa le gona? Ee, o ka ba gona. Mangwalo a bolela e sa le pele ka nako e tlago yeo ka yona Diabolo, yo a timetšago batho ba bantši, a tlago go “lahlelwa letsheng la mollo le sebabole.” (Kutollo 20:10) Ke therešo gore mollo le sebabole tša kgonthe di ka se gobatše sebopiwa sa moya seo se sa bonagalego. Ka gona, letsha la mollo le swanetše go ba le emela phedišo ya sa ruri. Sathane o tla yela sa ruri. Ruri e tla ba nako e thabišago go bao ba ratago Modimo!

Ge re sa letile seo, tšwela pele o ithuta sohle seo o ka se kgonago ka Jehofa le ditsela tša gagwe. * Akanya o phela nakong yeo mafelelong go tla bolelwago e le ka kgonthe gore: “Sathane ga a gona!”

^ ser. 8 Ge e ba setsekana sa silifera seo go bolelwago ka sona e be e le tenariase ya Roma, tekanyo ya tšhelete yeo e be e tla lekana le mogolo o kopantšwego wa letšatši le letšatši wa bašomi ba 50 000 ba tlwaelegilego—e lego tekanyo e kgolo kudu!

^ ser. 11 Bakeng sa tsebišo e oketšegilego mabapi le Sathane le go dirišana le meoya, bona kgaolo 10 ya puku ya Ke Eng Seo ge e le Gabotse Beibele e se Rutago? Kgopela le ge e le mang wa Dihlatse tša Jehofa kopi.

Ithute ka mo go oketšegilego

Morero wa Modimo ka Lefase ke Ofe?

Beibele e hlalosa lebaka leo Modimo a bopilego lefase, tlaišego e tla fela neng, gomme bokamoso ke bofe ka lefase le bao ba dulago go lona.

Dibopiwa tša Moya—Kamoo di re Kgomago ka Gona

Beibele e bolela ka barongwa le batemona. Na dibopiwa tše tša moya di gona? Di ka go kgoma bjang?