Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI OCTOBER 2014

 BEIBELE E FETOŠA MAPHELO

Ke be ke Iphelela

Ke be ke Iphelela
  • NGWAGA WA MATSWALO: 1951

  • NAGA: JEREMANE

  • BOPHELO BJA PELE E EBA MOKRISTE: O BE A IKGANTŠHA, A NA LE MOYA WA GO IPUŠA

BOPHELO BJA KA BJA NAKONG E FETILEGO:

Nywaga e sego kae ya mathomong a bophelo bja ka, lapa lešo le be le dula kgauswi le Leipzig, kua Jeremane Bohlabela, yeo e sego kgole le mollwane wa Czechoslovakia le wa Poland. Ge ke na le nywaga e tshela, lapa lešo le ile la hudugela dinageng dišele ka baka la mošomo wa tate—mathomong ra ya Brazil gomme ka morago ra ya Ecuador.

Ge ke na le nywaga e 14, ke ile ka išwa sekolong seo se nago le bodulabarutwana kua Jeremane. Ka ge batswadi ba ka ba be ba dula kgole kua Amerika Borwa, ke ile ka swanelwa ke go itlhokomela. Ke ile ka thoma go ipota kudu. Ke be ke se na taba le gore ditiro tša ka di be di kgoma batho ba bangwe bjang.

Ge ke na le nywaga e 17, batswadi ba ka ba ile ba boela Jeremane. Mathomong, ke be ke dula le bona. Eupša moya wa ka wa go ipuša o ile wa mpalediša go phela ka tlase ga taolo ya batswadi ba ka. Ge ke na le nywaga e 18, ke ile ka tloga gae.

Ke ile ka thoma go se sa dudišega le go feta, e le ge ke tsoma morero wa bophelo. Ka morago ga go hlahloba mekgwa e fapafapanego ya go phela gotee le mekgatlo, ke ile ka kgodišega gore tsela e kaone yeo nka dirišago bophelo bja ka ka yona ke gore ke lekole polanete ye e botse pele batho ba ka e senya.

Ke ile ka tloga Jeremane, ka reka sethuthuthu gomme ka leba Afrika. Lega go le bjalo, go se kgale ke ile ka swanelwa ke go boela Yuropa bakeng sa go yo lokiša sethuthuthu sa ka. Ka letšatši le lengwe ka moragonyana ga moo, ke ile ka ikhwetša ke le lebopong kua Portugal. Ke ile ka phetha ka gore ke se sa hlwa ke sepela ka sethuthuthu gomme ke thome go diriša sekepe bakeng sa maeto.

Ke ile ka tsena sehlopheng sa bafsa bao ba bego ba itokišeletša go phatša lewatle la Atlantic. Gare ga bona, ke ile ka kopana le Laurie yo e bego e tla ba mosadi wa ka. Re ile ra thoma ka go sesela dihlakahlakeng tša Caribbean. Ka morago ga go dula nakwana kua Puerto Rico, re ile ra boela Yuropa. Re be re holofetše gore re tla hwetša sekepe sa go sesa seo re bego re tla se fetoša ya ba sekepe seo re bego re tla phela ka gare ga sona. Eupša ka morago ga lesolo le lekopana la go nyaka sekepe seo la dikgwedi tše tharo feela, modiro woo o ile wa kgaotša go sa letelwa. Ke ile ka bitšwa gore ke yo hlankela go tša bohlabani kua Jeremane.

Ke ile ka fetša dikgwedi tše 15 ke le madireng a dikepe a Jeremane. Nna le Laurie re ile ra nyalana nakong yeo gomme ra itokišeletša  go tšwela pele ka bophelo bja go tšea maeto. Re be re rekile mmele wa seketswana se se phološago maphelo pejana ga ge nka hlankela go tša bohlabani. Ge ke sa hlankela go tša bohlabani, ganyenyane-ganyenyane re ile ra fetoša mmele wa seketswana se se phološago maphelo ra o dira sekepe. Re be re rerile go phela ka go sona gomme re dule re lekola polanete ye e botse. Lebakeng le—ka morago ga tirelo ya ka ya tša bohlabani, eupša e le pele re ka fetša sekepe—ke moo Dihlatse tša Jehofa di ilego tša ikopanya le rena gomme ra thoma go ithuta Beibele.

KAMOO BEIBELE E FETOTŠEGO BOPHELO BJA KA:

Mathomong, ke be ke bona go sa hlokagale gore ke fetoše bophelo bja ka. Ke be ke nyetše mosadi yo ke bego ke dula le yena, e bile ke be ke šetše ke tlogetše go kgoga. (Baefeso 5:5) Ge e le ka merero ya rena ya go sepela le lefase, ke be ke naganne gore go gafa maphelo a rena go lekoleng tlholo ya Modimo e kgahlišago e be e tloga e le selo sa mohola seo re ka se dirago.

Lega go le bjalo, ge e le gabotse ke be ke swanetše go dira diphetogo—kudukudu semelong sa ka. Ka ge ke be ke ikgantšha ka mo go feteletšego le go ipota, ke be ke nweletše ka mo go feletšego dilong tšeo ke kgonago go di dira le tšeo ke di fihleletšego. Ke be ke iphelela.

Ka letšatši le lengwe, ke ile ka bala Thuto ya Thabeng e tumilego ya Jesu. (Mateo, dikgaolo 5-7) Mathomong ke be ke sa kwešiše seo Jesu a se boleIago ka go ba yo a thabilego. Ka mohlala, o boletše gore go thaba bao ba swerwego ke tlala le bao ba nyorilwego. (Mateo 5:6) Ke be ke ipotšiša gore motho yo a hlokago a ka ba yo a thabilego bjang. Ge ke dutše ke ithuta, ke ile ka lemoga gore ka moka ga rena re nyaka dilo tša moya eupša ka lemoga le gore re swanetše go amogela ka boikokobetšo gore re a di nyaka pele re ka di hwetša. Go bjalo ka ge Jesu a boletše a re: “Go thaba bao ba lemogago gore ba nyaka dilo tša moya.”—Mateo 5:3.

Ka morago ga go thoma thuto ya rena ya Beibele kua Jeremane, nna le Laurie re ile ra hudugela Fora gomme ka morago ra ya Italy. Kae le kae moo re bego re eya gona, re be re hwetša Dihlatse tša Jehofa. Ke ile ka kgahlwa kudu ke lerato la tšona la kgonthe leo di ratanago ka lona gotee le botee bja tšona. Ke ile ka bona gore ruri Dihlatse di borwarreng bja lefase ka bophara. (Johane 13:34, 35) Ge nako e dutše e eya, nna le Laurie re e ile ra kolobetšwa ra ba Dihlatse tša Jehofa.

Ka morago ga go kolobetšwa, ke ile ka tšwela pele ke fetoša semelo sa ka. Nna le Laurie re ile ra phetha ka go sesa go theoga le lebopo la Afrika ke moka ra phatša Lewatle la Atlantic ra ya United States. Gona moo lewatleng—re be re le babedi feela ka seketswaneng re dikologilwe ke meetse a monabo wa dikhilomithara tše dintši—ke moo ke ilego ka lemoga kamoo ke sego selo ge ke bapetšwa le Mmopi wa rena yo bohlale. Ka ge ke be ke na le nako e ntši e bile ke se na dilo tše dintši tšeo ke di dirago lewatleng, ke ile ka diriša nako yeo go bala Beibele. Ke ile ka kgongwa kudu ke dipego tša Jesu tša bophelo bja gagwe bja lefaseng. E be e le motho yo a phethagetšego yo a nago le bokgoni bjo nka se bo bapišego le selo. Lega go le bjalo, o be a sa itšeele godimo. O be a sa iphelele, eupša o be a phelela Tatagwe wa legodimong.

Ke ile ka bona gore ke swanetše go etiša Mmušo wa Modimo pele bophelong bja ka

Ge ke dutše ke naganišiša ka mohlala wa Jesu, ke ile ka bona gore ke swanetše go etiša Mmušo wa Modimo pele bophelong bja ka go e na le go o pataganya le dilo tše di fapafapanego tšeo ke bego ke nyaka go di dira. (Mateo 6:33) Mafelelong ge nna le Laurie re fihlile United States, re ile ra phetha ka gore re dule moo gomme re lebiše tlhokomelo borapeding bja rena.

KAMOO KE ILEGO KA HOLEGA KA GONA:

Ge ke be ke sa le motho yo a ipotilego, gantši ke be ke sa kgodišege ka diphetho tša ka. Lega go le bjalo, ga bjale ke hweditše mothopo wa bohlale bja kgonthe bakeng sa go ntlhahla. (Jesaya 48:17, 18) E bile ke hweditše morero wa bophelo woo pele ke bego ke se na wona—go rapela Modimo le go thuša ba bangwe go ithuta ka yena.

Nna le Laurie re matlafaditše lenyalo la rena kudu ka go diriša melao ya motheo ya Beibele. E bile re šegofaditšwe ka morwedi yo mobotsana, yo ga bjale a tsebago Jehofa e bile a mo rata.

Ga se gore bophelo bja rena ka mehla bo be bo dutše bo thelela. Eupša ka thušo ya Jehofa, re ikemišeditše gore le ka mohla re se ke ra lapa goba ra kgaotša go mmota.—Diema 3:5, 6.

Ithute ka mo go oketšegilego

Lapa la Gago e ka ba Leo le Thabilego Bjang?

Jehofa, Modimo yo a thabilego, o nyaka gore lapa le thabe. Hwetša keletšo e šomago e tšwago ka Beibeleng bakeng sa banna, basadi, batswadi le bana.