Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI OCTOBER 2014

 TABA YA LETLAKALA LA KA NTLE | MMUŠO WA MODIMO—O KA BOLELA ENG GO WENA?

Mmušo wa Modimo—Seo o se Bolelago go Jesu

Mmušo wa Modimo—Seo o se Bolelago go Jesu

Nakong ya bodiredi bja gagwe bja lefaseng, Jesu o ile a bolela ka ditaba tše dintši. Ka mohlala, o ile a ruta balatedi ba gagwe tsela ya go rapela, ya go thabiša Modimo le ya go hwetša lethabo la kgonthe. (Mateo 6:5-13; Mareka 12:17; Luka 11:28) Eupša taba yeo Jesu a bego a bolela ka yona go feta tše dingwe ka moka—taba yeo a bego a rata go bolela ka yona kudu—e be e le ya Mmušo wa Modimo.—Luka 6:45.

Ka ge go boletšwe sehlogong se se fetilego, bophelo bja Jesu bo be bo dikologile tabeng ya “go tsebatša ditaba tše dibotse tša Mmušo.” (Luka 8:1) O be a šoma ka thata, a sepela menabo ya dikhilomithara tše makgolo nageng ka moka ya Isiraele e le gore a rute batho ka Mmušo wa Modimo. Bodiredi bja Jesu bo begilwe Diebangeding tše nne, tšeo di bolelago ka Mmušo ka makga a fetago a 100. Gantši moo go bolelwago ka Mmušo ke mantšung a Jesu, gomme mantšu ao a swanetše go ba a emela karolwana feela ya mantšu ka moka ao a a boletšego ka Mmušo wa Modimo!—Johane 21:25.

Ke ka baka la’ng Jesu a be a tšeela Mmušo godimo gakaakaa ge a be a le lefaseng? Lebaka ke gore Jesu o be a tseba gore Modimo o be a mo kgethile gore e be Mmuši wa Mmušo woo. (Jesaya 9:6; Luka 22:28-30) Eupša Jesu o be a sa tshwenyega kudu ka go ikhweletša matla a taolo goba letago. (Mateo 11:29; Mareka 10:17, 18) O be a sa bolelele Mmušo bakeng sa go ikhola. Sa bohlokwa kudu ke gore Jesu o be a kgahlegela Mmušo wa Modimo * e bile o sa o kgahlegela ka baka la seo o tlago go se direla bao a ba ratago—Tatagwe wa legodimong le balatedi ba gagwe bao ba botegago.

SEO MMUŠO O TLAGO GO SE DIRELA TATAGO JESU

Jesu o rata Tatagwe kudu. (Diema 8:30; Johane 14:31) O tšeela godimo dika tša Tatagwe tšeo di rategago, tše bjalo ka lerato la Gagwe, kwelobohloko ya Gagwe le toka ya Gagwe. (Doiteronomio 32:4; Jesaya 49:15; 1 Johane 4:8) Ka gona, ga go pelaelo gore Jesu o swanetše go ba a hloile go kwa maaka ao a phatlalatšwago ka Tatagwe—maaka a swanago le a gore Modimo ga a na taba le go tlaišega ga batho le a gore Modimo o nyaka re tlaišega. Le ke le lengwe la mabaka ao ka ona Jesu a bego a fišegela go tsebatša “ditaba tše dibotse tša Mmušo”—o be a tseba gore ge nako e dutše e eya Mmušo o be o tla hlatswa leina la Tatagwe. (Mateo 4:23; 6:9, 10) O tla dira seo bjang?

A diriša Mmušo, Jehofa o tla direla batho diphetogo tše dikgolo tšeo di tlago go hola batho. “O tla phumola megokgo ka moka” mahlong a batho bao ba botegago. Jehofa o tla fediša dibaki tša megokgo yeo gomme a kgonthišetša gore “lehu le . . . se hlwe le sa ba gona, le ge e le manyami goba sello goba bohloko di . . . se hlwe di sa ba gona.” (Kutollo 21:3, 4) Modimo o tla fediša tlaišego ka moka ya batho a diriša Mmušo. *

 Ga go makatše gore Jesu o be a fišegela go botša batho ka Mmušo! O be a tseba gore o be o tla bontšha kamoo Tatagwe a tlogago a na le matla e bile a na le kwelobohloko ka gona. (Jakobo 5:11) Jesu e bile o be a tseba gore Mmušo o be o tla hola ba bangwe bao a ba ratago—batho bao ba botegago.

SEO MMUŠO O TLAGO GO SE DIRELA BATHO BA BOTEGAGO

Kgale pele ga ge Jesu a ka tla lefaseng, o be a dula le Tatagwe legodimong. Tate o ile diriša Morwa gore a hlole dilo ka moka—go tloga ka magodimo ao a boifišago gotee le dinaledi tša ona tšeo di sa balegego le melalatladi go fihla ka polanete ya rena e botse gotee le diphedi tša naga tšeo di dulago go yona. (Bakolose 1:15, 16) Lega go le bjalo, dilong tše ka moka, Jesu o ile a ‘kgahlwa ke’ batho.—Diema 8:31.

Bodiredi bja Jesu bo be bo hlaolwa ka go rata ga gagwe batho. Di tloga fase feela, o ile a hlalosa gabotse gore o be a tlile lefaseng go tlo ‘tsebiša ditaba tše dibotse’ go bao ba diilago. (Luka 4:18) Eupša Jesu o be a dira se se fetago go fo bolela ka go thuša batho. Nako le nako, o be a dira dilo tše di bontšhago gore o rata batho. Ka mohlala, nakong ya ge lešaba le legolo le be le bokanetše go tlo mo theetša ge a bolela, Jesu o ile “a le šokela, a fodiša balwetši ba lona.” (Mateo 14:14) Nakong ya ge motho yo a bego a swerwe ke bolwetši bjo bohloko kudu a be a bontšha tumelo ya gore Jesu o be a ka mo fodiša ge e ba a be a nyaka go mo fodiša e le ka kgonthe, Jesu o ile a tutuetšwa ke lerato. O ile a fodiša monna yoo, gomme a mmotša ka go mo kwela bohloko a re: “Ke a rata. Hlweka.” (Luka 5:12, 13) Ge Jesu a be a bona mogwera wa gagwe Maria a be a kwešitšwe bohloko ke lehu la kgaetšedi’agwe e lego Latsaro, Jesu o ile “a tsetsela moyeng,” “a huduega” gomme “a ntšha megokgo.” (Johane 11:32-36) Ke moka o ile a dira selo se sengwe seo se makatšago—Jesu o ile a tsoša Latsaro gaešita le ge Latsaro a be a na le matšatši a mane a hwile!—Johane 11:38-44.

Ge e le gabotse, Jesu o be a tseba gore kimollo yeo a bego a e nea batho ka nako yeo e be e le ya nakwana feela. O be a lemoga gore neng neng, bohle bao a bego a ba fodišitše ba be ba tla babja gape gomme le bohle bao a bego a ba tsošitše ba be ba tla hwa gape. Lega go le bjalo, e bile Jesu o be a tseba gore Mmušo wa Modimo o be o tla fedišetša sa ruri mathata a bjalo. Ke ka baka leo Jesu a bego a sa dire mehlolo feela; gape o be a bolela “ditaba tše dibotse tša Mmušo” ka phišego. (Mateo 9:35) Mehlolo ya gagwe e be e bontšha ka tekanyo e nyenyane seo Mmušo wa Modimo o tla tlogago o se dira lefaseng ka bophara. Ela hloko seo Beibele e se holofetšago mabapi le nako yeo.

  •  Go ka se sa ba le mathata a tša maphelo.

    “Mohlang woo mahlo a difofu a tla buduloga gomme ditsebe tša difoa di tla thibologa. Mohlang woo sehlotša se tlo taboga bjalo ka kgama gomme leleme la semumu le tlo goelela ka lethabo.” Go oketša moo, “ga go na modudi yo a tla rego: ‘Ke a babja.’”—Jesaya 33:24; 35:5, 6.

  • Lehu le ka se sa ba gona.

    “Baloki bona e tla ba beng ba lefase, ba tla dula mo go lona ka mo go sa felego.”Psalme 37:29.

    “O tla metša lehu ka mo go sa felego, gomme Mmuši Morena Jehofa o tla phumola megokgo difahlegong ka moka.”—Jesaya 25:8.

  • Bao ba hwilego ba tla tsošwa.

    “Bohle bao ba lego mabitleng ba [tla] kwa lentšu la gagwe gomme ba tšwa.”—Johane 5:28, 29.

    “Go tla ba le tsogo.”—Ditiro 24:15.

  • Batho ba ka se sa hloka madulo le mešomo.

    “Ba tla aga dintlo ba dula go tšona; ba tla bjala dirapa tša merara ba ja dienywa tša tšona. Ba ka se ke ba aga gwa dula o šele; ba ka se ke ba bjala gwa ja o šele. . . . Bahlaolwa ba ka ba tla thabela modiro wa diatla tša bona ka botlalo.”—Jesaya 65:21, 22.

  •  Go ka se sa ba le ntwa.

    “O fediša dintwa go fihla pheletšong ya lefase.”—Psalme 46:9.

    “Setšhaba se ka se emišetše se sengwe tšhoša, e bile di ka se sa hlwa di ithuta ntwa.”—Jesaya 2:4.

  • Go ka se sa ba le tlhaelelo ya dijo.

    “Lefase lona le tla tšweletša dienywa tša lona; Modimo, e lego Modimo wa rena, o tla re šegofatša.”—Psalme 67:6.

    “Go tla ba le mabele a mantši mo lefaseng; dintlheng tša dithaba go tla ba le motlalo wa mabele.”—Psalme 72:16.

  • Go ka se sa ba le bodiidi.

    “Ga se ka mehla modiidi a tlago go lebalwa.”—Psalme 9:18.

    “O tla hlakodiša modiidi yo a llelago thušo, le mohlaki gotee le mang le mang yo a se nago mothuši. O tla kwela mmotlana le modiidi bohloko, o tla phološa meoya ya badiidi.”—Psalme 72:12, 13.

Ge o nagana ka dikholofetšo tšeo tša mabapi le Mmušo wa Modimo, na o kgona go bona lebaka leo ka lona Mmušo o lego bohlokwa gakaakaa go Jesu? Ge a be a sa le lefaseng, o be a fišegela go bolela ka Mmušo wa Modimo go yo mongwe le yo mongwe yo a bego a theetša, ka gobane o be a tseba gore Mmušo o be o tla fediša mathata ka moka a gateletšago ao a lego gona lehono.

Na dikholofetšo tša Beibele tša mabapi le Mmušo ke tšeo di ipiletšago go wena? Ge e ba go le bjalo, o ka ithuta bjang ka mo go oketšegilego mabapi le Mmušo woo? Le gona o ka dira’ng go kgonthišetša gore o tle o holwe ke ditšhegofatšo tša wona? Sehlogo sa mafelelo lelokelelong le la dihlogo se tla araba dipotšišo tšeo.

^ ser. 5 Sehlogo se ge se bolela ka maikwelo a Jesu se diriša lebaka la bjale ka gobane o a phela legodimong, e bile ga go pelaelo gore o sa dutše a rata Mmušo kudu le ka morago ga ge a boetše legodimong.—Luka 24:51.

^ ser. 8 Bakeng sa tsebišo ya mabapi le lebaka leo ka lona Modimo a dumeletšego gore batho ba tlaišege ka nakwana, bona kgaolo 11 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

Ithute ka mo go oketšegilego

Ke ka Baka la Eng Modimo a Dumelela Bobe le Tlaišego?

Bobe bo thomile bjang, gona ke ka baka la eng Modimo a ile a dumelela gore bo tšwele pele? Na tlaišego e tla ka ya fela?