Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  August 2014

 TABA YA LETLAKALA LA KA NTLE | NA MODIMO O NA LE TABA LE WENA?

Modimo o Nyaka Gore o be le Tswalano le Yena

Modimo o Nyaka Gore o be le Tswalano le Yena

“Ga go motho yo a ka tlago go nna ge a sa gogwe ke Tate yo a nthomilego.”—JOHANE 6:44.

LEBAKA LEO BA BANGWE BA BELAELAGO SE: Batho ba bantši bao ba dumelago go Modimo ba ikwa ba le kgole le yena. Christina, mosadi yo mongwe yo a tšwago Ireland yo a yago kerekeng beke le beke o dumela gore: “Ke be ke fo mo lebelela e le Modimo yo a bopilego dilo ka moka. Eupša ke be ke sa mo tsebe. Le ka mohla ke be ke sa ikwe ke le kgauswi le yena.”

SEO LENTŠU LA MODIMO LE SE RUTAGO: Ge re ikwa re lahlegile, Jehofa ga a re felele pelo. Jesu o bontšhitše tsela yeo Modimo a re hlokomelago ka yona, ge a re: “Ge e ba motho yo mongwe a eba le dinku tše lekgolo gomme e tee ya tšona ya timela, na a ka se tlogele tše masomesenyane-senyane dithabeng a ya go nyaka yeo e timetšego?” Re ithuta’ng tabeng ye? “Ka mo go swanago, Tate yo a lego legodimong ga a rate gore gaešita le yo mongwe wa ba banyenyane ba a lobe.”—Mateo 18:12-14.

Yo mongwe le yo mongwe “wa ba banyenyane ba” o bohlokwa go Modimo. Modimo o ‘nyaka bjang yo a timetšego’? Go ya ka lengwalo leo le tsopotšwego mathomong a sehlogo se, Jehofa o gogela batho go yena.

Lehono ke bomang bao ba etelago batho magaeng a bona le mafelong a batho bohle go ba botša molaetša wa Beibele woo o tšwago go Modimo?

Bona kamoo Modimo a gatilego mogato wa pele gore a gogele batho ba dipelo tše di botegago. Lekgolong la pele la nywaga C.E., Modimo o ile a roma morutiwa wa Mokriste Filipi gore a kopane le mohlankedi wa Moethiopia gomme a mo hlalosetše boporofeta bja Beibele bjoo mohlankedi yoo a bego a bo bala. (Ditiro 8:26-39) Ka morago, Modimo o ile a hlahla moapostola Petro gore a etele legae la mohlankedi wa Moroma yo a bitšwago Koronelio, yoo a bego a rapela e bile a katanela go hlankela Modimo. (Ditiro 10:1-48) Modimo o ile a ba a hlahla moapostola Paulo le badirišanigotee le yena nokeng yeo e bego e le ka ntle ga motse wa Filipi. Ge ba le moo, ba ile ba kopana le “morapedi wa Modimo” yo a bitšwago Lidia, le gona “Jehofa a bula pelo ya gagwe gore a ele hloko dilo.”—Ditiro 16:9-15.

Boemong bjo bongwe le bjo bongwe, Jehofa o ile a kgonthišetša gore bao ba bego ba mo tsoma ba ile ba hwetša sebaka sa go mo tseba. Lehono ke bomang bao ba etelago batho magaeng a bona le mafelong a batho bohle go boledišana le bona ka molaetša wa Beibele woo o tšwago go Modimo? Ba bantši ba be ba tla araba ka gore ke: “Dihlatse tša Jehofa.” Ipotšiše gore: ‘Na se ga se bolele gore Modimo o a ba diriša gore ba nthuše go ba le tswalano le yena?’ Re go kgothaletša gore o rapele Modimo gore a go thuše go arabela maitekong a gagwe a go go gogela go yena. *