Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  August 2014

 TABA YA LETLAKALA LA KA NTLE | NA MODIMO O NA LE TABA LE WENA?

Modimo o a go Kwešiša

Modimo o a go Kwešiša

“Wena Jehofa, o mphetlekile gomme o a ntseba.”—PSALME 139:1.

“Mahlo a gago a mpone ke sa thoma go bopega.”—PSALME 139:16

LEBAKA LEO BA BANGWE BA BELAELAGO SE: Batho ba bantši ba nagana gore Modimo o lebelela batho e le badiradibe feela—ba sa hlwekago e bile ba sa swanelwe go šetšwa ke yena. Kendra, yoo a bego a gateletšegile monaganong, o ile a ikwa a na le molato ka gobane o be a sa fihlelele melao ya Modimo e phethagetšego. Ka baka leo, o itše: “Ke kgaoditše go rapela.”

SEO LENTŠU LA MODIMO LE SE RUTAGO: Jehofa o lebelela ka kua ga go se phethagale ga gago e bile o tloga a go kwešiša. Beibele e re: “O tseba gabotse kamoo re bopegilego ka gona, a gopola gore re lerole.” Go feta moo, ga se a re swara “go ya ka tšeo di lebanego dibe tša rena,” eupša ge re itshola o re lebalela ka kgaugelo.—Psalme103:10, 14.

Nagana ka Dafida, kgoši ya Isiraele yeo e tsopotšwego sehlogong sa pele sa lelokelelo le la dihlogo. Ge Dafida a be a rapela Modimo, o itše: “Mahlo a gago a mpone ke sa thoma go bopega, gomme ka pukung ya gago go be go ngwadilwe . . . Mphetleke o tsebe pelo ya ka, hle Modimo.” (Psalme 139:16, 23) Ee, Dafida o be a kgodišegile gore gaešita le ge a be a dirile sebe—ka dinako tše dingwe a sentše kudu—Jehofa o ile a lemoga pelo ya gagwe yeo e itsholago.

Jehofa o go kwešiša gakaone go phala motho le ge e le ofe. Beibele e re: “Motho o bona ponagalo ya ka ntle; eupša Jehofa yena o bona dipelo.” (1 Samuele 16:7) Modimo o tseba gabotse seo se dirago gore o itshware ka tsela e itšego—kamoo leabela, tsela yeo o godišitšwego ka yona, setlogo le semelo di go dirago motho yo o lego yena. O bona le go tšeela godimo motho yoo o katanelago go ba yena le ge o dira diphošo.

Lega go le bjalo, Modimo o diriša bjang kwešišo ya gagwe e tseneletšego ya seo o lego sona go go homotša?