Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI AUGUST 2014

 BEIBELE E FETOŠA MAPHELO

Ke be ke Elwa Ntwa ya go Fediša go Hloka Toka le Bošoro

Ke be ke Elwa Ntwa ya go Fediša go Hloka Toka le Bošoro
  • NGWAGA WA MATSWALO: 1960

  • NAGA: LEBANON

  • BOPHELO BJA PELE E EBA MOKRISTE: SETSEBI SA KUNG FU

BOPHELO BJA KA BJA NAKONG E FETILEGO: Ke goletše Rmaysh, kgauswi le mollwane wa magareng ga Isiraele le Lebanon, nakong ya ntwa ya selegae.

Ke sa dutše ke gopola gabotse medumo ya dithuthupi tša go epelwa fase le bahlaselwa bao ba se nago molato ba go ripega matsogo le maoto. Bophelo bo be bo le thata, e bile go tletše bosenyi le bošoro.

Lapa lešo le be le tsena Kereke ya Maronite e lego e nngwe ya Dikereke tša ka Bohlabela tša Katholika. Tate o be a dula a swaregile ka go hlokomela lapa lešo la batho ba 12 ka dilo tša nama, eupša Mma o be a kgonthišetša gore ka moka ga rena re ya kerekeng. Ge nako e dutše e eya, ke ile ka thoma go bona eka kereke go swana le setšhaba ka moka, e be e palelwa ke go thekga bao ba bego ba fokola.

Ge ke be ke sa le mahlalagading, ke ile ka thoma go kgahlegela kung fu. Ke be ke šoma ka thata go itlwaetša ke moka mafelelong ka ba le bokgoni bja go lwa ka matsogo le maoto le go diriša dibetša tše fapafapanego tša karate. Ke ile ka ipotša gore: ‘Nka se kgone go fediša ntwa, eupša nka leka go thibela batho ba nago le bošoro.’ Nako le nako ge ke bona batho ba babedi ba elwa, ke be ke ba kgaoganya gateetee. Ke be ke le sefelapelwana ka tlhago e bile go be go sa nyakege selo se segolo seo se bego se ka nkgalefiša. Batho ka moka kua borwa bja Lebanon ba be ntšhaba, ge ke be ke dutše ke elwa ntwa ye ya go fediša go hloka toka le bošoro.

Ka 1980, ke ile ka ba setho sa mokgatlo wa kung fu kua Beirut. Letšatši le lengwe le le lengwe go be go dula go thuthupa dipomo, dibetša tšeo di bitšwago di-shells le dirokhethe, eupša ke be ke sa dutše ke eya go itlwaetša. Ke be ke hlwela go ja, go robala le go phela bjalo ka Bruce Lee e lego sebapadi sa difilimi tša Amerika sa mo-China e bile e le nkgwete ya kung fu. Ke be ke dirile moriri wa go swana le wa Bruce Lee, tsela ya gagwe ya go sepela gotee le mokgwa woo a bego a goa ka gona ge a be a dira kung fu. Ke be ke sa ke ke myemyele le gatee.

KAMOO BEIBELE E FETOTŠEGO BOPHELO BJA KA: Pakane ya ka e be e le go ba setsebi sa kung fu kua China.

Mantšiboeng a mangwe, ge ke dutše ke itlwaetša ka thata ke itokišetša leeto la ka la  go ya China, ke ile ka kwa batho ba kokota mojako. Mogwera’ke o be a tlile le Dihlatse tša Jehofa tše pedi. Ke be ke sa apere diaparo tše ntsho tša go itlwaetša, ke elela kudumela mmeleng, ke ile ka ba botša gore: “Ga ke tsebe selo ka Beibele.” Ke be ke sa tsebe gore go tloga ka nako yeo bophelo bja ka bo be bo tlo fetoga.

Dihlatse di ile tša mpontšha go tšwa Beibeleng lebaka leo batho ka bobona ba ka se kgonego go atlega ka mo go feletšego go fediša go hloka toka le bošoro. Di ile tša hlalosa gore Sathane Diabolo ke sebaki sa kgonthe sa mathata a bjalo. (Kutollo 12:12) Ke be ke kgahlilwe kudu ke khutšo le kgodišego yeo Dihlatse di bego di e bontšha. Ke ile ka kgomega kudu ge di be nthuta gore Modimo o na le leina. (Psalme 83:18) Di ile tša mpontšha gape 1 Timotheo 4:8, yeo e balegago ka gore: “Go tlwaetša mmele go hola ganyenyane; eupša boineelo go Modimo bo hola dilong tšohle, ka ge bo na le kholofetšo ya bophelo bja gona bjale le bja nakong e tlago.” Mantšu ao a ile a kgoma bophelo bja ka kudu.

Ka manyami, ke ile ka se sa kgona go bonana le Dihlatse ka ge ba lapa lešo ba di boditše gore di se sa hlwa di boa gape. Lega go le bjalo, ke ile ka dira phetho ya go kgaotša go itlwaetša kung fu gomme ka thoma go ithuta Beibele. Bana bešo ga se ba ka ba kgahlwa ke kgopolo yeo, eupša ke be ke ikemišeditše go nyaka Dihlatse tša Jehofa gape gomme ke ithute Beibele le tšona.

Ke ile ka tšwela pele ke nyaka Dihlatse eupša ka se di hwetše. Ga bjale, ke be ke kwešitšwe bohloko ke lehu la kapejana la tate le mathata a mangwe a ka gae. Ke be ke šetše ke thomile go šoma khamphaning ya go aga gomme letšatši le lengwe mošomigotee le nna yo a bitšwago Adel o ile a nkemiša ke moka a mpotšiša gore ke ka baka la’ng ke bonagala eka ke nyamile? O ile a thoma go bolela ka kholofelo ya Beibele ya tsogo ya bahu. Dikgweding tše di latetšego tše senyane, Hlatse ye e lerato, e botho e ile ya thoma go ithuta Beibele le nna ka go se fele pelo.

Ge thuto e dutše e tšwela pele, ke ile ka thoma go bona gore ke swanetše go dira diphetogo tše dikgolo semelong sa ka. Go be go se bonolo. Ke be ke dula ke tenega e bile ke kgopišega ga bonolo. Ke ithutile go tšwa Beibeleng kamoo ke swanetšego go laola bogale bja ka le gore ke se ke ka tšewa maikwelo ke selo se sengwe le se sengwe. Ka mohlala, Mateo 5:44 e na le keletšo ya Jesu e rego: “Tšwelang pele le rata manaba a lena le go rapelela bao ba le tlaišago.” Mola Baroma 12:19 e lemoša gore: “Le se ke la itefeletša, . . . gobane go ngwadilwe gwa thwe: ‘Tefetšo ke ya ka, ke tla lefetša, go re’alo Jehofa.’” Mangwalo a le a mangwe a ile a nthuša ganyenyane-ganyenyane go ba le khutšo.

KAMOO KE ILEGO KA HOLEGA KA GONA: Le ge mathomong lapa lešo le be le sa dumelelane le phetho ya ka ya go ithuta le Dihlatse tša Jehofa, le ile la feleletša le hlompha Dihlatse.

Ge e le gabotse, moratho wa ka yo mongwe o ile a ba Hlatse ya Jehofa mola Mma yena aile a emela tumelo ya rena go ba bangwe go ba go fihlela a e hwa.

Ke ile ka ba ka šegofatšwa ka mosadi yo a kgahlišago le yoo a botegago, Anita, yoo e lego mothuši wa ka yo a rategago bodireding bja ka bja nako e tletšego. Ga e sa le go tloga ka 2000, nna le Anita re dula motseng wa Eskilstuna kua Sweden moo re thušago batho bao ba bolelago Searaba ka go ba ruta Beibele.

Ke sa kwešwa bohloko ke batho bao ba sa tlaišegago ka baka la bošoro. Eupša ka ge ke tseba lebaka leo ka lona bošoro le go hloka toka di atilego—le gore Modimo e se kgale o tla di fediša—se se dira gore ke be le lethabo la kgonthe le khutšo.—Psalme 37:29.

Nna le mosadi wa ka re thabile kudu bodireding bja rena. Re rata go ruta batho ba bangwe ka Jehofa

Ithute ka mo go oketšegilego

Ke ka Baka la Eng Modimo a Dumelela Bobe le Tlaišego?

Bobe bo thomile bjang, gona ke ka baka la eng Modimo a ile a dumelela gore bo tšwele pele? Na tlaišego e tla ka ya fela?