Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI MAY 2014

Na o be o Tseba?

Na o be o Tseba?

Ke ka baka la eng disenyi di be di robja maoto ge di be di bolawa?

Pego ya Ebangedi ge e bolela ka go bolawa ga Jesu le disenyi tše pedi koteng ya tlhokofatšo, e re: “Bajuda ba ile ba kgopela Pilato gore maoto a bona a robje gomme ditopo tša bona di tlošwe.”Johane 19:31.

Molao wa Sejuda o be o re setopo sa sesenyi seo se fegilwego koteng ka morago ga gore sesenyi se bolawe “se se ke sa lala koteng.” (Doiteronomio 21:22, 23) Go bonagala Bajuda ba ile ba diriša molao o swanago bathong bao Baroma ba ilego ba ba bolaela koteng. Lebakeng le, go roba maoto a batho go be go tla dira gore ba hwe ka pela gomme ba bolokwe pele ga ge Sabatha e ka thoma ge letšatši le sobela.

Nakong ya dipolao tše dintši tše swanago le tše, motho yo a bonwego molato o be a kokotelwa koteng ya tlhokofatšo ka dipikiri tšeo di bego di phuleletša diatleng tša gagwe le maotong a gagwe. Ge kota e be e emišwa, motho yoo o be a tlogelwa a fegilwe a ekwa bohloko bjo bo tseneletšego gomme boima bja gagwe bo rwelwe ke dipikiri tšeo. E le gore motho a kgone go hema, o be a swanetše go kuka mmele wa gagwe sepikiring goba dipikiring tšeo di lego maotong a gagwe. Lega go le bjalo, ge marapo a maoto a gagwe a be a robegile, go be go ka se kgonege gore a kuke mmele wa gagwe. O be a ka bolawa kapejana ke go hupelana goba go tšhoga.

Diragamabje di be di dirišwa bjang dintweng tša bogologolo?

Seragamabje ke sebetša seo Dafida a ilego a se diriša go bolaya Goliata wa senatla. Go bonagala Dafida a ile a ithuta go diriša sebetša se nywageng ya ge e be e sa le mošemanyana wa modiši.1 Samuele 17:40-50.

Seswantšho sa lebotong seo se bontšhago babetši ba diragamabje ba MaAsiria bao ba hlaselago toropo ya dibo ya Juda

Seragamabje se swantšhitšwe ka diswantšho tša bokgabo tša Egipita le Asiria tša mehleng ya Beibele. Sebetša se se be se na le morabana wo o bulegilego wa letlalo goba wa lešela wo o bego o kgokeletšwe dithapong tše pedi. Motho yo a betšago seragamabje o be a tsenya ka mokotlaneng leswikana le boreledi goba la nkgokolo la bogolo bja disenthimithara tše 5 go ya go tše 7,5 (leo le lekanago le namune) le leo le imelago digrama tše 250. Ke moka o be a se hwidinya ka godimo ga hlogo ya gagwe gomme a lokolla e nngwe ya dithapo, seo sa dira gore leswikana le betše ka matla le ka nepo.

Go epša ga marope kua Bohlabela bja Magareng go utolotše maswikana a mantši a diragamabje a dintwa tša mehleng ya bogologolo. Bahlabani bao ba nago le bokgoni ba ka ba ba be ba betša maswikana ao a bego a kitima ka lebelo la dikhilomithara tše 160 go ya go tše 240 ka iri. Diithuti ga di dumelelane ka taba ya ge e ba seragamabje se be se na le moo go ngangwago bora, eupša seragamabje se be se tloga se le kotsi.Baahlodi 20:16.