Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI MAY 2014

 EKIŠANG TUMELO YA BONA | MARIA

O Ile a Kgotlelela Tšhoša

O Ile a Kgotlelela Tšhoša

MARIA o be a kwatame ka matolo gomme bohloko bja gagwe bo tseneletše wa go se hlalosege. Ditsebeng tša gagwe go be go sa duma sello sa morwa wa gagwe sa mafelelo ge a be a ehwa ka morago ga gore a hlokofatšwe lebaka la diiri. Go be go swifetše mosegareng wa sekgalela. Bjale lefase le ile la šišinyega o šoro. (Mateo 27:45, 51) Maria o be a bona eka Jehofa o be a tsebiša lefase gore o be a kwešitšwe bohloko kudu ke lehu la Jesu Kriste go feta motho le ge e le ofe yo mongwe.

Maria o ile a llela morwa wa gagwe ge seetša sa thapama se be se tloša leswiswi leo le bego le apareditše Gologotha goba Lefelo la Magata. (Johane 19:17, 25) Go ka direga gore o be a gopola dilo tše dintši kudu. Kgopolo e nngwe yeo e ka bego e ile ya mo tlela e ka ba e be e le tiragalo ya nywageng e ka bago e 33 pele ga moo. Ge yena le Josefa ba be ba sa tšwa go iša leseana la bona le bohlokwa tempeleng kua Jerusalema, mokgalabje yo a bitšwago Simeone o ile a a budulelwa gore a bolele boporofeta. O ile a bolela e sa le pele ka dilo tše dikgolo tšeo di bego di tla diragalela Jesu, eupša a oketša ka gore ka letšatši le lengwe Maria o be a tla kwa eka o phuleletšwa ka tšhoša e telele. (Luka 2:25-35) Iring ye ya tlalelo, e be e le gona a kwešišago ka botlalo therešo ya mantšu ao.

Maria o ile a hlabja ke manyami bjalo ka tšhoša pelong

Go thwe lehu la ngwana a nnoši wa motho ke tahlegelo e šoro le e bohloko kudu yeo motho a ka lebeletšanago le yona. Lehu ke lenaba le sehlogo, gomme ka moka ga rena le re kweša bohloko ka tsela le ge e le efe. (Baroma 5:12; 1 Bakorinthe 15:26) Na go a kgonega go kgotlelela bohloko bjoo? Ge re dutše re hlahloba bophelo bja Maria go tloga ge Jesu a be a thoma bodiredi bja gagwe go fihla nakong ya lehu la gagwe le ka moragonyana ga moo, re tla ithuta mo gontši ka tumelo yeo e thušitšego Maria go kgotlelela tšhoša ya manyami.

“SE SENGWE LE SE SENGWE SEO A LE BOTŠAGO SONA, LE SE DIRE”

A re boeleng morago nywageng e meraro le seripa e fetilego: Maria o ile a belaela gore go tla phetogo e itšego. Gaešita le motsaneng wa Natsaretha, batho ba be ba bolela ka Johane Mokolobetši le molaetša wa gagwe o tutuetšago wa tshokologo. Maria o be a bona gore morwa wa gagwe yo mogolo o be a lebelela ditaba tšeo e le sešupo; e be e le nako ya gore Jesu a thome bodiredi bja gagwe. (Mateo 3:1, 13) Go se be gona ga Jesu go be go tla bolela gore Maria le ba lapa la gagwe ba tla lebeletšana le diphetogo tše di fapafapanego. Ka baka la’ng?

Go bonagala eka monna wa Maria e lego Josefa o be a šetše a hwile. Ge e ba go be go le bjalo, Maria o be a sa thome go lahlegelwa. * Ga bjale Jesu o be a sa bitšwe “morwa wa mmetli” feela eupša o be a bitšwa “mmetli.” Go molaleng gore Jesu o be a tšwetša pele kgwebo ya tatagwe gomme a šetše a thomile go hlokomela lapa labo, leo le bego le na le bonyenyane bana ba tshelelago bao ba belegwego ka morago ga gagwe. (Mateo 13:55, 56; Mareka 6:3) Gaešita le ge e ba Jesu a be a tlwaetša Jakobo—yoo e bego e le morwa yo a mo latelago ka bogolo—go tšwetša kgwebo pele le go tloga ga morwa yo mogolo go be go ka se be bonolo bakeng sa lapa. Maria o be a šetše a rwele morwalo o boima; na o ile a tšhošwa ke phetogo yeo? Ga re tsebe. Eupša potšišo e bohlokwa kudu ke gore: O be a tla arabela bjang ge Jesu wa Natsaretha e eba Jesu Kriste, Mesia yo e bego e le kgale a holofeditšwe? Pego e nngwe ya Beibele e utolla se sengwe tabeng yeo.Johane 2:1-12.

 Jesu o ile a ya go Johane a yo kolobetšwa, ke moka a ba Motlotšwa wa Modimo, goba Mesia. (Luka 3:21, 22) Ke moka o ile a thoma go kgetha baapostola ba gagwe. Le ge modiro wa gagwe o be o akgofile, o be sa dutše a ipha nako ya go ithabiša le ba lapa le bagwera. O ile a ya monyanyeng wa lenyalo a na le mmagwe, barutiwa ba gagwe le bana babo ba madi kua Kana, yeo go bonagalago e be e le motse wo o lego mmotong le wo o lego bokgoleng bja dikhilomithara tše e ka bago tše 13 go tloga Natsaretha. Nakong ya monyanya, Maria o ile a lemoga gore go na le bothata. Mohlomongwe o be a lemoga gore ba bangwe ba lapa labo banyalani ba be ba lebelelana ba bontšha ba tšhogile e bile ba sebelana ba sa fetše. Ba be ba feletšwe ke beine! Ka setšo sa gabo bona, tlhaelelo e bjalo nakong ya ge baeng ba le gona e be e tla leša lapa dihlong gomme ya senya tiragalo yeo o šoro. Maria o ile a ba kwela bohloko gomme a yo botša Jesu.

O ile a botša morwa wa gagwe gore:“Ga ba na beine.” O be a letetše gore a dire’ng? Re ka fo inaganela, eupša o be a tseba gore morwa wa gagwe e be e le motho yo mogolo yo a bego a ka dira dilo tše dikgolo. Mohlomongwe o be a holofetše gore o tla thoma nakong yeo. Ge e le gabotse o be a re go yena, “Morwa, thuša hle!” Karabelo ya Jesu e ka ba e ile ya mo makatša. O itše: “Go re’ng seo se swanetše go tshwenya nna le wena?” Mantšu a Jesu a be a sa bontšhe lenyatšo, gaešita le ge a ile a kwelwa thoko ka tsela yeo. Lega go le bjalo, mantšu a gagwe a fetiša kgalemelo e botho. Jesu o be a gopotša mmagwe gore o be a tloga a sa swanela go mmotša selo mabapi le kamoo a swanetšego go phetha bodiredi bja gagwe ka gona; yeo e be e le taba ya Tatagwe, Jehofa.

Maria o ile a amogela phošollo ya morwa wa gagwe, ka ge e be e le mosadi yo a kgomegago gabonolo le yo a ikokobeditšego. O ile a ya go bao ba bego ba šoma monyanyeng gomme a fo re: “Se sengwe le se sengwe seo a le botšago sona, le se dire.” Maria o ile a lemoga gore o be a se sa swanetše go laela morwa wa gagwe, go e na le moo, yena le ba bangwe ba be ba swanetše go hwetša tlhahlo go Jesu. Jesu yena o be a kwela batho bao ba sa tšwago go nyalana bohloko, go swana le mmagwe. O ile a dira mohlolo wa gagwe wa mathomo, a fetoša meetse gore e be beine. Mafelelo e bile a fe? “Barutiwa ba gagwe ba [ile ba] dumela go yena.” Maria le yena o ile a dumela go Jesu. O be a sa mo lebelele feela e le morwa wa gagwe eupša e le Morena le Mophološi wa gagwe.

Batswadi lehono ba ka ithuta mo gontši tumelong ya Maria. Ke therešo gore ga go na motho yo a kilego a godiša ngwana yo a swanago tlwaa le Jesu. Eupša ge ngwana le ge e le ofe e eba motho yo mogolo, go sa šetšwe gore ga se a phethagala, phetogo yeo e ka mo tlišetša ditlhohlo. Motswadi a ka no tšwela pele a swara morwa goba morwedi bjalo ka ngwana, le ge tshwaro e bjalo e ka no ba e se sa swanela. (1 Bakorinthe 13:11) Motswadi a ka thuša bjang ngwana yo a godilego? Tsela e nngwe ke gore a kgodišege e le ka kgonthe gore morwa goba morwedi yo a botegago o tla tšwela pele a diriša dithuto tša Beibele gomme a feleletša ka go amogela ditšhegofatšo tša Jehofa. Go bontšha ga motswadi tumelo le kgodišego ka boikokobetšo go ka hola bana bao ba gotšego. Ga go pelaelo gore Jesu o be a tšeela godimo thekgo ya Maria nywageng ya ka morago yeo e bego e tletše ka ditiragalo.

“BANA BABO BA BE BA . . . SA DUMELE GO YENA”

Diebangedi di re botša ganyenyane ka Maria nywageng e meraro le seripa ya bodiredi bja Jesu. Lega go le bjalo, gopola gore e ka ba e be e le mohlologadi—mma yo a se nago molekane, mohlomongwe a sa na le bana ba banyenyane ba šetšego ka gae. Go tloga go kwagala ge e ba a be a sa kgone go latela Jesu ge a be a dira boboledi nageng ya gabo. (1 Timotheo 5:8) Lega go le bjalo, o ile a tšwela pele a naganišiša ka dilo tša moya tšeo a ilego a ithuta tšona ka Mesia e bile a eya dipokanong sinagogeng ya lefelong la gabo ka ge lapa le be le tlwaetše go dira seo.Luka 2:19, 51; 4:16.

Ka gona, go ka direga gore o be a dutše gare ga batheetši  nakong ya ge Jesu a be a bolela sinagogeng kua Natsaretha. O swanetše go ba a ile a thaba kudu ge a be a ekwa morwa wa gagwe a tsebiša gore boporofeta bja mabapi le Mesia bjo bo begilwego nywagakgolong e mentši e fetilego ga bjale bo be bo phethagala ka yena! Lega go le bjalo, o swanetše go ba a be a kwešwa bohloko ke go bona gore Banatsaretha ba gabo ba be ba sa amogele morwa wa gagwe. Ba ile ba ba ba leka go bolaya morwa yoo!Luka 4:17-30.

Se sengwe seo se bego se kweša bohloko e be le tsela yeo barwa ba bangwe ba gagwe ba bego ba itshwara ka yona go Jesu. Re ithuta go Johane 7:5 gore bana babo Jesu ba bane ba be ba sa dumele seo mmago bona a bego a se dumela. Re bala ka gore: “Bana babo ba be ba . . . sa dumele go yena.” Ge e le ka dikgaetšedi tša Jesu—tšeo bonyenyane e bego e le tše pedi—Beibele ga e bolele selo ka tšona. * Ka baka leo, Maria o be a tseba bohloko bjo bo sa tlwaelegago bja go dula lapeng leo le nago le dipono tše di sa swanego tša bodumedi. O ile a swanelwa ke go katanela tekatekano ya gore a dule a botegela therešo ya Modimo mola a le gare a šomela go fihlelela dipelo tša ditho tša lapa la gagwe ntle le gore a di fekeetše le go lwa le tšona.

Lebakeng le lengwe, sehlopha sa ba leloko la gabo—ga go pelaelo gore bana babo Jesu ba be ba le gona—se ile sa phetha ka go yo “swara” Jesu. Ge e le gabotse se be se re: “O hlakane hlogo.” (Mareka 3:21, 31) Go ba gona, Maria yena o be a sa nagane bjalo, eupša o ile a ya le barwa ba gagwe, mohlomongwe e le ge a holofetše gore ba be ba tla ithuta se sengwe seo se bego se tla ba thuša gore ba gole tumelong. Na ba ile ba ithuta? Gaešita le ge Jesu a ile a tšwela pele a dira mediro e makatšago le go ruta ditherešo tše di kgahlišago, barwa ba bangwe ba Maria ba ile ba no se dumele. A le kgauswi le go tenega, na o ile a ipotšiša gore ge e le gabotse dipelo tša bona di be di ka fihlelelwa bjang?

Na o dula lapeng leo le aroganego bodumeding? Tumelo ya Maria e ka go ruta go gontši kudu. Ga se a ka a hloboga ba leloko la gabo bao ba bego ba sa dumele. Go e na le moo, o ile a kgetha go ba bontšha gore tumelo ya gagwe e be e mo tlišetša lethabo le khutšo ya monagano. Ka lehlakoreng le lengwe, o ile a dula a thekga morwa wa gagwe yo a botegago. Na o be a hlologela Jesu? Na ka dinako tše dingwe o be a duma eka a ka be a sa dula ka gae a na le yena le lapa la gagwe? Ge e ba go le bjalo, o ile a kgona go itshwara. O ile a tšea go thekga Jesu le go mo kgothatša e le tokelo. Na le wena o ka thuša bana ba gago ka mo go swanago gore ba etiše Modimo pele maphelong a bona?

“TŠHOŠA E TELELE E TLA PHULELETŠA MOYA WA GAGO”

Na go dumela ga Maria go Jesu go ile gwa putswa? Jehofa ka mehla o putsa batho bakeng sa tumelo, gomme ga go pelaelo gore Maria le yena o ile a putswa ka mo go swanago. (Baheberu 11:6) E fo akanya gore o ile a ikwa bjang ge a ekwa morwa wa gagwe a bolela goba a ekwa dipego mabapi le dithero tša gagwe ka ba bangwe bao ba ikwetšego tšona.

Tše dintši tša dipapišo tša Jesu di bontšha kamoo a bego a tutueditšwe ke tlwaetšo yeo a e filwego ke Josefa le Maria

Dipapišong tša morwa wa gagwe, na Maria o ile a kwa Jesu a eleletša ka dilo tša bjaneng bja gagwe ge a be a gola kua Natsaretha? Ge Jesu a be a bolela ka mosadi yo a bego a swiela ntlo ya gagwe gore a nyake tšhelete ya tšhipi yeo e timetšego, yo a šilago bupi bja go apea senkgwa, goba yo a tšhumago lebone gomme a le bea godimo ga sehlomapone, na Maria o ile a nagana ka mošemanyana yoo a bego a na le yena ge a be a šoma mešomo ya gagwe ya letšatši le letšatši? (Luka 11:33; 15:8, 9; 17:35) Ge Jesu a be a re joko ya gagwe e botho gomme morwalo wa gagwe o bohwefo, na Maria o ile a nagana kgale thapameng e nngwe e kgahlišago ge a be a bogetše Josefa a ruta Jesu yo monyenyane gore a dire le go betla joko ka kelohloko e le gore e se ke ya kokonela phoofolo yeo e e rwalago? (Mateo 11:30) Ga go pelaelo gore Maria o ile a kgotsofala kudu ge a naganišiša ka tokelo yeo Jehofa a mo filego yona bophelong—ya go thuša ka go godiša le go tlwaetša morwa  yoo e bego e tla ba Mesia. O swanetše go ba a be a thaba ka mo go kgethegilego ge a theetša Jesu, morutiši yo a fetago barutiši ka moka ba batho, yoo a bego a diriša dilo tše di tlwaelegilego le maemo a gona gomme a ntšha dithuto tše di tseneletšego kudu go tšona!

Lega go le bjalo, Maria o ile a dula a ikokobeditše. Le ka mohla morwa wa gagwe ga se a ka a mo nea theto, go sa bolelwe ka go mo rapela. Nakong ya bodiredi bja gagwe, mosadi yo mongwe lešabeng o ile a goelela ka gore mmago Jesu o swanetše go ba a thabile kudu gore o mmelege. Jesu o ile a araba ka gore: “Aowa, go e na le moo, go thaba bao ba kwago lentšu la Modimo gomme ba le boloka!” (Luka 11:27, 28) Le gona ge ba bangwe lešabeng ba be ba šupetša Jesu gore mmagwe le bana babo ba be ba le kgauswi, o ile a ba botša gore bao ba dumelago e be e le bona bommagwe le bana babo e le ka kgonthe. Go e na le gore a kgopišege, ruri Maria o ile a kwešiša ntlha ya Jesu, ya gore ditlemo tša moya di bohlokwa kudu go feta tša nama.Mareka 3:32-35.

Le gona, bohloko bjoo Maria a bo kwelego ge a be a bona morwa wa gagwe a ehwa gabohloko koteng ya tlhokofatšo ga bo hlalosege. Hlatse yeo e bonego ka mahlo ge Jesu a bolawa, e lego moapostola Johane, ka morago o ile a akaretša tlhaloso ye e nabilego pegong ya gagwe ka gore: Nakong ya tlhokofatšo yeo, Maria o be a eme “hleng ga kota ya Jesu ya tlhokofatšo.” Go be go se na seo se ka thibelago mma yoo yo a botegago le yo lerato gore a eme hleng ga morwa wa gagwe go fihla bofelong. Jesu o ile a mmona, gomme gaešita le ge a be a hema gabohloko kudu gomme a thatafalelwa kudu ke go ntšha mantšu, o ile a bolela. O ile a laela gore mmagwe a hlokomelwe ke moapostola Johane yo a rategago. Ka ge bana babo Jesu ba madi ba be ba sa tšwa e eba badumedi, Jesu o ile a re Maria a hlokomelwe ke molatedi wa gagwe yo a botegago, e sego bona. Ka go re’alo, Jesu o ile a bontšha kamoo go lego bohlokwa ka gona gore motho yo a nago le tumelo a hlokomele ba gabo, kudukudu ge go tliwa dinyakweng tša bona tša moya.Johane 19:25-27.

Ge mafelelong Jesu a ehwa, Maria o ile a kwa bohloko bjo go bego go boletšwe ka bjona e sa le pele kgale kudu, tšhoša e telele yeo e phuleletšago ya manyami. Ge e ba re thatafalelwa ke go akanya tekanyo ya manyami a gagwe, gona re tloga re ka se kgone go akanya ka lethabo leo a ilego a ba le lona matšatši a mararo ka morago ga moo! Maria o ile a bona mohlolo o mogolo wa go e feta ka moka—Jesu o be a tsošitšwe! Le gona lethabo la gagwe le ile la oketšega, ka gobane ga go pelaelo gore ka morago Jesu o ile a iponagatša ka sephiring go ngwanabo ka motswadi o tee, e lego Jakobo. (1 Bakorinthe 15:7) Go iponagatša moo ga gagwe go yena go ile gwa kgoma Jakobo le bana ba bangwe babo Jesu ka motswadi o tee. Re kwa gore le bona ka morago ba ile ba dumela go Jesu e le Kriste. Go se go ye kae, ke ge ba eya dibokeng tša Bokriste le mmago bona, “ba phegelela thapelong.” (Ditiro 1:14) Ba babedi ba bona, Jakobo le Juda, ka morago ba ile ba ngwala dipuku tša Beibele.

Maria o ile a thabišwa ke go bona barwa ba bangwe ba gagwe e eba Bakriste ba botegago

La mafelelo ge go bolelwa ka Maria ke ge a le dibokeng le barwa ba gagwe, ba rapela. A phetho e botse gakaakang ya pego ya Maria, gomme o tloga a šiile mohlala o mobotse! Ka baka la tumelo ya gagwe, o ile a kgotlelela tšhoša ya manyami gomme mafelelong a amogela moputso wa letago. Ge e ba re ekiša tumelo ya gagwe, le rena re tla kgotlelela bohloko le ge e le bofe bjoo re bo bakelwago ke lefase le le thata gomme re tla thabela meputso yeo e fetago yeo re ka e akanyago.

^ ser. 8 Ka morago ga gore go bolelwe ka Josefa tiragalong yeo e diregilego ge Jesu a na le nywaga e 12, ga go sa bolelwa ka yena pegong ya Ebangedi. Ka morago ga moo, go bolelwa ka mmago Jesu le bana ba gagwe ba bangwe eupša e sego ka Josefa. Ke gatee feela moo Jesu a bitšwago “morwa wa Maria” go sa bolelwe ka Josefa.Mareka 6:3.

^ ser. 16 Josefa e be e se tatago Jesu wa madi, ka gona bana babo Jesu e be e le bana babo le dikgaetšedi tša gagwe ka motswadi o tee.Mateo 1:20.