Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI MAY 2014

 TABA YA LETLAKALA LA KA NTLE | NA GO NA LE MOTHO YO A KA BONAGO BOKAMOSO?

Tše Dingwe di Atlegile, tše Dintši di Paletšwe

Tše Dingwe di Atlegile, tše Dintši di Paletšwe

Na o ka rata go tseba bokamoso bja gago? Kgopolo ye e ipiletša bathong ba bantši. Go na le batho ba bantši bao ba bolela e sa le pele ka ditiragalo tšeo di sa tlago, gomme go ba le mafelelo a fapafapanego. Ela hloko tše di latelago:

  • BORATHUTAMAHLALE ba diriša didirišwa tše di raraganego le ditšhelete tše dintši kudu go akanyetša ditaba tše di fapafapanego, tše bjalo ka kamoo tšhilafalo e tla feleletšago e kgomile lefase ka gona le ge e ba go tla tsoga go ena pula tikologong ya geno.

  • BASEKASEKI BA DITSEBI ba bolela e sa le pele ka maemo ao a tlago go ba gona kgwebong le dipolitiking. Warren Buffett, e lego yo mongwe wa babeeletši ba dikhorane tše dikgolo tša lefase, o kgonne go bolela e sa le pele ka nepo ka maemo a kgwebo moo ba bangwe ba ilego ba mmitša moporofeta. Nate Silver, yo le yena e lego mosekaseki, o hlathollotše dipalopalo go mo thuša gore a bolele e sa le pele ka dilo ka moka go thoma ka dipolitiki tša United States go fihla ka difoka tša difilimi tša Hollywood.

  • METHOPO YA BOGOLOGOLO e hlathollotšwe e le diporofeto. Batho ba bangwe ba bona go phethagala ga mehleng yeno mengwalong yeo e sa kwagalego gabotse ya Michel de Notredame (Nostradamus) ya lekgolong la bo-16 la nywaga. Ba bangwe ba hlathollotše modikologo wa khalentara ya Maya woo o fedilego ka December 21, 2012, e le sešupo sa ditiragalo tša masetlapelo.

  • BAETAPELE BA BODUMEDI ka dinako tše dingwe ba bolela e sa le pele ka ditiragalo tša masetlapelo tša lefaseng ka bophara bakeng sa go lemoša batho le go ikgobokeletša balatedi. Moporofeta wa letšatši la kahlolo e lego Harold Camping le balatedi ba gagwe ba be ba phatlaladitše gohle taba ya gore lefase le be le tla fedišwa ka 2011. Go molaleng gore lefase le sa le gona.

  • DIDUPE di ipolela gore di na le bokgoni bjo bo kgethegilego bja go bolela e sa le pele ka bokamoso. Edgar Cayce gotee le Jeane Dixon ba ile ba bolela e sa le pele ka nepo mabapi le ditiragalo tša lekgolong la bo-20 la nywaga. Yo mongwe le yo mongwe wa bona o bile o dirile dipolelelopele tše dintši tšeo di paletšwego. Ka mohlala, Dixon o ile a bolela e sa le pele ka Ntwa ya III ya Lefase gore e tla ba ka 1958, gomme Cayce a bolela e sa le pele gore New York e be e tla nwelela lewatleng bogareng bja nywaga ya bo-1970.

Na ruri go na le tsela le ge e efe e ka botwago ya go bona bokamoso? Go bohlokwa go botšiša potšišo yeo. Ge o be o ka bona e sa le pele ditiragalo tšeo di sa tlago, bophelo bja gago bo be bo tla fetoga kudu.