Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI FEBRUARY 2014

 BEIBELE E FETOŠA MAPHELO

Kholofetšo ya Lefase la Paradeise e Fetošitše Bophelo bja ka!

Kholofetšo ya Lefase la Paradeise e Fetošitše Bophelo bja ka!
  • NGWAGA WA MATSWALO: 1974

  • NAGA: LATVIA

  • BOPHELO BJA PELE E EBA MOKRISTE: MOPHADIŠANI YO A IPEAGO KOTSING WA DITHUTHUTHU

BOPHELO BJA KA BJA NAKONG E FETILEGO:

Ke belegetšwe Riga, motsemošate wa Latvia. Nna le kgaetšedi ya ka re godišitšwe ke mmago rena. Le ge Mma e le Mokhatolika, re be re eya kerekeng feela ka matšatši a maikhutšo a bodumedi. Ke be ke dumela gore Modimo o gona, eupša ka ge ke be ke le mofsa, ke be ke dula ke swaregile ka dilo tše dintši.

Ge ke be ke gola, mma o ile a lemoga gore ke na le bokgoni bja go hlahlamolla dilo gomme ka morago ke di kopanye gape. Ka ge go be go na le dilo tše dintši ka ntlong tšeo ke bego nka di hlahlamolla, o be a tšhaba go ntlogela gae ke nnoši. Ke ka baka leo a ilego a mpha papadi ya go kopanya ditšhipi, yeo ke bego ke rata go e kopanya gomme ke e hlahlamolle. Go rata ga ka go kopanya papadi yeo go be go swana le selo se sengwe seo ke se ratago—go otlela dithuthuthu. Mma o ile a nngwadiša phadišanong ya dithuthuthu yeo e bitšwago Zelta Mopēds (The Golden Moped). Ke ile ka thoma ke otlela dithuthuthu tše dinyenyane gomme ka morago ka otlela tše dikgolo.

Ke be ke swara ka pela gomme ka moragonyana ke ile ka atlega papading ye ya lebelo le e kotsi. Ke ile ka thopa sefoka gararo diphadišanong tša dinkgwete tša Latvian tša dithuthuthu tše dikgolo, le gona ka thopa gabedi Baltic States Superbike Championship.

KAMOO BEIBELE E FETOTŠEGO BOPHELO BJA KA:

Ge ke be ke šetše ke le kgole kudu ka papadi ye, kgarebe ya ka Evija (yo ka morago a ilego a ba mosadi wa ka) o ile a kopana le Dihlatse tša Jehofa. O ile a hwetša e nngwe ya dikgatišo tša bona, yeo e bego e na le setlankana seo o ka se tlatšago ge o kgopela thuto ya Beibele. O ile a tlatša setlankana seo gomme a se romela ka poso. Go se go ye kae, Dihlatse tše pedi di ile tša mo etela ke moka a thoma go ithuta Beibele le tšona. Seo se be se sa ntshwenye, eupša ka nako yeo, ke be ke se na taba le bodumedi.

Ka moragonyana, Dihlatse tšeo di ile tša nkgopela gore ke dule gomme ke theetše ge ba swarela Evija thuto ya Beibele.  Ke ile ka dula le bona, gomme ka kgahlwa ke seo ke se kwago. Selo seo se nkgomilego kudu ke kholofetšo ya Beibele ya lefase la paradeise. Ka mohlala, ke ile ka balelwa Psalme 37:10, 11, yeo e rego: “Go se gokae yo kgopo o tla be a se sa le gona; wena o tla lebelela lefelo la gagwe, gomme yena o tla be a se gona. Eupša ba boleta bona e tla ba beng ba lefase, ba tla thaba kudu ka baka la go ata ga khutšo.” Kholofetšo yeo e ile ya nkgahla kudu.

Go rata ga ka dithuto tša Beibele go ile gwa oketšega. Ke ile ka thoma go lemoga maaka a mantši a bodumedi. Lega go le bjalo, dithuto tša Beibele di ile tša nkgahla kudu ka ge di kwagala e bile di le bonolo.

Ge ke be ke tšwela pele ke ithuta Beibele, ke ile ka lemoga tsela yeo ka yona Jehofa a tšeelago bophelo godimo le kamoo bo lego bohlokwa kudu go yena. (Psalme 36:9) Seo se ile sa fetoša pono ya ka ka go phadišana ka dithuthuthu—ka se hlwe ke nyaka go bea bophelo bja ka kotsing. Go e na le moo, ke be ke nyaka go diriša bophelo bja ka go tagafatša Jehofa. Ka gona, botumo, letago le go thabela phadišano ya dithuthuthu di be di sa hlwe di le bohlokwa go nna.

Ke ile ka thoma go lemoga gore ke ikarabela go Monei wa bophelo

Ka 1996, ke ile ka ya kopanong ya ditšhabatšhaba ya Dihlatse tša Jehofa kua Tallinn, Estonia, yeo e bego e se kgole le lepatlelo leo ke ilego ka tsenela diphadišano tša dithuthuthu gantši go lona. Ge ke le kopanong, ke ile ka bona batho ba tšwago dinageng tše dintši ba kopane gotee ka kwano le ka khutšo. Ka mohlala, ge yo mongwe wa Dihlatse a be a lahlegetšwe ke mokotla wa gagwe, ke ile ka nagana gore a ka se tsoge a o hweditše. Eupša, ka moragonyana, Hlatse e nngwe e ile ya hwetša mokotla woo gomme ya o buša o sa na le dilo ka moka. Ke be ke maketše! Ke ile ka lemoga gore ruri Dihlatse di phela ka ditekanyetšo tše phagamego tša Beibele. Nna le Evija re ile ra tšwela pele re ithuta, gomme ka 1997 ra kolobetšwa gore re be Dihlatse tša Jehofa.

KAMOO KE ILEGO KA HOLEGA KA GONA:

Ba bangwe ba bagwera ba ka ba hwile ka baka la go se hlomphe bophelo le go kitima ka dithuthuthu. Ka go ithuta Beibele, ke ile ka thoma go lemoga gore ke ikarabela go Monei wa bophelo, e lego Jehofa. Mohlomongwe tsebo yeo ke yona e phološitšego bophelo bja ka.

Ka nywaga e mene, nna le Evija re bile le tokelo ya go hlankela re le badiredi ba nako e tletšego ofising ya lekala ya Dihlatse tša Jehofa kua Riga. Ga bjale re thabela go godiša morwedi wa rena, Alise, le go mo thuša gore a gole a rata Jehofa. Le gona, ke na le tokelo ya go fetša letšatši le tee beke le beke ke šoma ofising ya bofetoledi, ke lokiša dikoloi le dilo tše dingwe tšeo di senyegilego. Ruri ke thabišwa ke go diriša bokgoni bjo ke ithutilego bjona ge ke be ke sa le ngwana ka tsela e holago! Ee, ke sa dutše ke hlahlamolla dilo gomme ke di kopanya gape.

Ka baka la seo ke ithutilego sona ka Beibeleng, ke tšeela godimo tokelo ya go nea bohlatse ka Modimo a nnoši wa therešo gotee le lapa la ka. Ruri kholofetšo ya lefase la paradeise e fetošitše bophelo bja ka!