Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  February 2014

 BABADI BA RENA BA A BOTŠIŠA . . .

Ke ka Baka la Eng Modimo a Dumelela ba Matla ba Gatelela Bao ba se Nago Matla?

Ke ka Baka la Eng Modimo a Dumelela ba Matla ba Gatelela Bao ba se Nago Matla?

Beibele e bega ka ditiragalo tše di kwešago bohloko tšeo go tšona bao ba se nago matla ba gatelelwago ke bao ba nago le matla. Re ka nagana ka taba ya Nabothe. * Ahaba e lego kgoši ya Isiraele ya lekgolong la lesome la nywaga B.C.E., o ile a dumelela mosadi wa gagwe Isebele a dira gore Nabothe le barwa ba gagwe ba bolawe e le gore kgoši e ka tšea serapa sa morara sa monna yoo. (1 Dikgoši 21:1-16; 2 Dikgoši 9:26) Ke ka baka la’ng Modimo a ile a dumelela gore matla a taolo a dirišwe ka tsela e bjalo e feteletšego?

‘Modimo a ka se ke a aketša.’—Tito 1:2

Anke re eleng hloko lebaka la bohlokwa: Modimo a ka se ke a aketša. (Tito 1:2) Seo se bolela’ng ka ditiro tše mpe tša ge batho ba gatelelwa? Go ba gona, mathomongthomong Modimo o ile a lemoša batho gore go rabela malebana le yena go tla tliša mafelelo ao a nyamišago, e lego lehu. Lentšu la Modimo le a rereša, ga e sa le batho ba lebeletšana le lehu ka morago ga borabele kua serapeng sa Edene. Ge e le gabotse, lehu la pele le bakilwe ke tiro ya kgatelelo, ya ge Kaine a bolaya ngwanabo Abele.—Genesi 2:16, 17; 4:8.

Ga e sa le go tloga ka nako yeo, Lentšu la Modimo ge le bolela ka histori ya batho le re: “Motho [o] buša yo mongwe gore a mo gobatše.” (Mmoledi 8:9) Na mantšu ao a itlhatsetše e le therešo? Jehofa o ile a lemoša batho ba gagwe e lego setšhaba sa Isiraele gore dikgoši tša bona di be di tla ba gatelela, tša dira gore batho ba llele Modimo. (1 Samuele 8:11-18) Gaešita le Kgoši Solomone yo bohlale o ile a gatelela batho ba gagwe ka mo go feteletšego. (1 Dikgoši 11:43; 12:3, 4) Dikgoši tše kgopo, tše bjalo ka Ahaba di be di le šoro kudu. Ela hloko: Ge nkabe Modimo a thibetše dipušo ka moka tšeo di bego di gatelela batho, ge e le gabotse na e be e ka se be gore seo a se boletšego ke maaka?

“Motho [o] buša yo mongwe gore a mo gobatše.”—Mmoledi 8:9

Le gona, gopola gore Sathane o bolela gore batho ba hlankela Modimo feela ka mabaka a boithati. (Jobo 1:9, 10; 2:4) Ge nkabe Modimo a ile a šireletša bahlanka ba gagwe ka moka mehuteng yohle ya kgatelelo, na seo se be se ka se hlatsele gore Sathane o bolela therešo? Le gona, ge nkabe Modimo a ile a thibela gore batho ba se ke ba welwa ke mehuta ka moka ya kgateletšo, na o be a ka se ikarabele ka maaka le go feta? Ka tlase ga tšhireletšego e bjalo, ba bantši ba be ba ka phetha ka gore batho ba ka kgona go ipuša ka katlego ntle le Modimo. Eupša Lentšu la Modimo le bolela seo se fapanego gore motho o tloga a ka se kgone go ipuša. (Jeremia 10:23) Re nyaka gore Mmušo wa Modimo o tle; ke wona fela wo o ka fedišago go hloka toka.

Eupša na seo se ra gore Modimo ga a dire selo ka kgatelelo? Aowa. Ela hloko dilo tše pedi tšeo a di dirago: Ya pele, o utolla seo kgatelelo e lego sona. Ka mohlala, Lentšu la gagwe le utolla ditiro ka moka tša leano la Isebele la go bolaya Nabothe. Beibele e utolla gape gore ditiro tše bjalo tše mpe di hlohleletšwa ke mmuši yo matla yo a nyakago go iphihla seo a lego sona. (Johane 14:30; 2 Bakorinthe 11:14) Beibele e mo utolla e le Sathane Diabolo. Ka go utolla bokgopo le kgatelelo gotee le sebaki sa tšona sa kgonthe, Modimo o re thuša gore re lokologe bokgopong. Ka go re’alo o šireletša bokamoso bja rena bja ka mo go sa felego.

Ya bobedi, Modimo o nea kholofelo e tiilego ya gore kgatelelo e tla fela. Tsela yeo a utollotšego, a ahlotšego gotee le go otla Ahaba le Isebele ka yona—go akaretša le ba bangwe bao ba swanago le bona—e dira gore re kgodišege ka kholofetšo ya gagwe ya go otla badiri ba bobe ka le lengwe la matšatši. (Psalme 52:1-5) Modimo gape o nea kholofelo e ka botwago ya gore kgauswinyane o tla tloša ditlamorago tše mpe tša bokgopo go bao ba mo ratago. * Nabothe yo a botegago o tla hwetša sebaka sa gore yena le barwa ba gagwe ba phele lefaseng la paradeise ka mo go sa felego ba lokologile tshwarong e mpe.—Psalme 37:34.

^ ser. 3 Bona sehlogo se se rego, “Ekišang Tumelo ya Bona” tokollong ye.

^ ser. 8 Bona kgaolo 11 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.