Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  January 2014

 BEIBELE E FETOŠA MAPHELO

“Jehofa o be a se a Ntebala”

“Jehofa o be a se a Ntebala”
  • NGWAGA WA MATSWALO: 1922

  • NAGA: SEPANIA

  • BOPHELO BJA PELE E EBA MOKRISTE: MORUTIŠIGADI WA KATIKASEMA

BOPHELO BJA KA BJA NAKONG E FETILEGO:

Ke belegetšwe tikologong ya batho ba maemo a magareng ya Bilbao, kua leboa la Sepania. Ke be ke le ngwana wa bobedi go ba bane. Lapa lešo e be e le la Makatholika ao a ineetšego, gomme ke be ke eya Mmiseng letšatši le lengwe le le lengwe. Ge ke nale nywaga e 23, ke ile ka ba morutišigadi, e lego mošomo woo ke bego ke o rata gomme ka o dira ka nywaga e 40. Gare ga dithuto tše dingwe, ke be ke ikgantšha ka go ruta bodumedi bja Katholika, gomme thapama ke be ke šoma ke le morutišigadi wa katikasema—ke ruta banenyana bakeng sa selalelo sa bona sa mathomo.

Ka morago ga nywaga e 12 ke le lenyalong le thabilego, ke ile ka ba mohlologadi gomme ka šala le barwedi ba bane bao ke bego ke swanetše go ba hlokomela. Ke be ke na le nywaga e 33 feela! Ke ile ka leka go hwetša khomotšo kerekeng ya ka ya Katholika, eupša ke be ke na le dipotšišo tšeo di bego di fela di ntshenywa. Ke be ke ipotšiša gore: ‘Ke ka baka la’ng batho ba tšwela pele ba ehwa ge e ba Kriste a re lopolotše? Ke ka baka la’ng re rapelela gore Mmušo wa Modimo o tle ge e ba batho ba lokilego ba eya legodimong?’ Ka godimo ga tšohle, ke be ke ipotšiša gore: ‘Ge e ba Modimo a re ahlola ge re ehwa, ke ka baka la’ng ka morago go tla nyakega gore re tloge legodimong, pakatoring goba diheleng bakeng sa kahlolo ya mafelelo?’

Ke ile ka botšiša ba bangwe ba baruti bao ke bego ke kopana le bona dipotšišo tšeo. Yo mongwe wa bona o ile a re: “Ga ke tsebe. Botšiša mopišopo. Di go tshwenya ka’ng? Akere o dumela go Modimo? Gona tlogela go itshwenya ka tšeo!” Eupša ke ile ka tšwela pele ke tsoma dikarabo. Ka morago, ke ile ka tsena diklase tšeo di bego di rutwa ke Majesuit, Mapentekoste le Magnostic. Fela ga go yo a ilego a araba dipotšišo tša ka ka tsela e kgotsofatšago.

KAMOO BEIBELE E FETOTŠEGO BOPHELO BJA KA:

Ge ke be ke le nywageng ya ka ya bo-60, morutwana wa nywaga e šupa o ile a ntaletša gore ke ye sebokeng sa Dihlatse tša Jehofa. Ke ile ka rata seo ke se bonego le seo ke se kwelego, eupša ka baka la bophelo bja ka bja leemaema, ke ile ka se sa kopana le Dihlatse ka nako yeo. Ka morago ga nywaga e mebedi, banyalani ba Dihlatse e lego Juan le Maite ba ile ba nketela. Re ile ra tšea dikgwedi tše tharo re ahlaahla dipotšišo le dikarabo ka mo go tseneletšego, e lego seo mafelelong se ilego sa lebiša thutong ya Beibele.

 Ke be ke fagahlela nako e nngwe le e nngwe ya go ithuta! Ke ile ka nyakišiša dilo ka moka ka mo go tseneletšego, ke diriša diphetolelo tše tharo tša Beibele bakeng sa go kgonthišetša gore Dihlatse tša Jehofa di be di ruta therešo. Go se go ye kae ke ge ke lemoga kamoo ke bego ke tšere nywagasome e mentši ke gakanegile bodumeding. Ke ile ka tshwenywa ke go bona phapano e kgolo magareng ga ditumelo tša ka tša nakong e fetilego le seo ke bego ke ithuta sona ka Beibeleng. Ke ile ka ikwa ke imetšwe, go le bjalo ka ge eka ditumelo tša ka di be di swana le sehlare seo se tsemilego medu seo se bego se tumolwa.

Ke be ke tseba gore ke hweditše letlotlo

Ke moka, monna wa ka wa bobedi o ile a babja kudu gomme a hlokofala. Mo e ka bago ka yona nako yeo, ke ile ka rola modiro gomme ka tloga Bilbao ka nakwana. Juan le Maite le bona ba ile ba huduga. Ka manyami, ke ile ka kgaotša go ithuta Beibele. Lega go le bjalo, ka garegare ga ka ke be ke tseba gore ke hweditše letlotlo. Ga se ka ka ka le lebala le ka mohla.

Ka morago ga nywaga e ka bago e 20, ge ke be ke na le nywaga e 82, Juan le Maite ba ile ba boela Bilbao gomme ba nketela. Ke be ke tloga ke thabetše go ba bona gape! Ke ile ka lemoga gore Jehofa o be a se a ntebala, gomme ke ile ka thomološa go ithuta. Juan le Maite ba be ba tloga ba sa mphelele pelo, le ge ke be ke fela ke bušeletša dipotšišo tše swanago. Ke be ke nyaka go kwa mabaka a Beibele leboelela e le gore ke tloše tlemagano yeo ke bego ke na le yona le ditumelo tša ka tša pele. Gape ke be ke nyaka gore ke hlangwe gabotse gore ke kgone go hlalosetša bagwera ba ka le ba lapa Beibele.

Mafelelong ke ile ka kolobetšwa ke na le nywaga e 87 e lego letšatši leo ke bego ke thabile go feta a mangwe ka moka bophelong bja ka. Ke ile ka kolobetšwa kopanong ya Dihlatse tša Jehofa. Mogolo wa Mokriste o ile a nea polelo yeo e theilwego Beibeleng yeo e bego e lebišitšwe ka mo go kgethegilego go bao ba bego ba tla tloga ba kolobetšwa. Polelo yeo e ile ya dira gore ke lle. Ke ile ka e theetša bjalo ka ge eka Jehofa o be a bolela le nna ka go lebanya. Ka morago ga ge ke kolobeditšwe, go ile gwa tla Dihlatse tše dintši di tlo ntebogiša—gaešita le ge tše dintši tša tšona di be di sa ntsebe!

KAMOO KE ILEGO KA HOLEGA KA GONA:

Ke be ke dutše ke tseba gore Jesu Kriste ke “tsela.” (Johane 14:6) Eupša thuto ya ka ya Beibele e ile ya nthuša gore ke tsebe Jehofa, yoo Jesu a re lebišago go yena. Ga bjale ke kgona go rapela Modimo e le Tate yo a rategago le Mogwera. Go bala puku ya Batamela Kgaufsi le Jehofa * go ile gwa fetoša bophelo bja ka. La mathomo ke ile ka e bala ka moka ka bošego bjo tee! Ke ile ka kgongwa ke go tseba kamoo Jehofa a nago le kgaugelo ka gona.

Ge ke lebelela morago go tsomeng ga ka therešo ka nako e telele, ke nagana ka mantšu a Jesu a rego: “Tšwelang pele le kgopela, le tla newa; tšwelang pele le tsoma, le tla hwetša; tšwelang pele le kokota, le tla bulelwa.” (Mateo 7:7) Ka ge ga bjale ke hweditše dikarabo tšeo e lego kgale ke di nyaka, ke thabišwa ke go di hlalosetša ba bangwe.

Le ge ke na le nywaga e 90, ke sa na le dilo tše dintši tšeo ke swanetšego go ithuta tšona ka Jehofa. Seboka se sengwe le se sengwe seo ke yago go sona Holong ya Mmušo ke tiragalo e kgethegilego—bobedi bakeng sa tsebo yeo ke e hwetšago le bakeng sa go ba le bana bešo le dikgaetšedi. Ke kganyoga go ba morutišigadi gape lefaseng la Paradeise leo le holofeditšwego. (Kutollo 21:3, 4) Ke hlologetše go bona baratiwa ba ka ba hwilego ba tsošetšwa bophelong ke moka ka morago ke be le sebaka sa go ba ruta therešo ya Beibele. (Ditiro 24:15) Ke tloga ke fagahletše go ba hlalosetša mpho e bohlokwa yeo Jehofa a mphilego yona botšofading bja ka!

^ ser. 15 E gatišitšwe ke Dihlatse tša Jehofa.