Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI DECEMBER 2013

 PHIHLELO

Go Dira Gore go Hlankela Jehofa e be Mošomo wa ka

Go Dira Gore go Hlankela Jehofa e be Mošomo wa ka

Ka morago ga go aloga sekolong se se phagamego ka January 1937, ke ile ka ingwadiša Yunibesithing ya Mmušo ya Iowa, kgauswi le mo re bego re dula gona bogareng bja bodikela bja United States. Ke be ke se na nako ya go dira dilo tše dingwe ka ge ke be ke tsena sekolo e bile ke šoma gore ke lefelele dithuto tša ka. Go tloga bofseng ke be ke dutše ke nyaka go ithuta ka meago e metelele le maporogo ao a lekeletšego.

Mathomong a 1942, ka moragonyana ga gore United States e tsenele Ntwa ya II ya Lefase, ke be ke le ngwageng wa bohlano kholetšheng gomme ke šaletšwe ke dikgwedi tše mmalwa gore ke hwetše bachelor’s degree ya ka ya boentšeneare bja tša go aga. Ke be ke dula legaeng le lengwe le batho ba babedi. Yo mongwe o ile a šišinya gore ke bolele le motho tsoko yo go bego go thwe o etela bašemane bao ba bego ba dula lebatong la ka tlase. Gona moo ke ile ka kopana le John O. (Johnny) Brehmer, e lego yo mongwe wa Dihlatse tša Jehofa. Ke ile ka makatšwa ke tsela yeo ka yona a bego a kgona go nea karabo ya Beibele mo e nyakilego go ba potšišong le ge e le efe. Ke kgahlilwe ke seo, ke ile ka thoma go ithuta Beibele le Johnny ka mehla gomme mafelelong ka thoma go ya le yena modirong wa gagwe wa boboledi ge ke be ke kgona.

Tatago Johnny, e lego Otto, o be a bile Hlatse ge e be e sa le mopresidente wa panka ya motse wa Walnut, Iowa. Otto o ile a tlogela maemo ao e le gore a tsenele bodiredi bja nako e tletšego. Ge nako e dutše e eya, mohlala wa gagwe le wa lapa la gagwe, o ile wa nkgothaletša gore ke dire phetho e bohlokwa.

NAKO YA GO DIRA PHETHO

Ka letšatši le lengwe, mookamedi wa yunibesithi o ile a mpotša gore dimaraka tša ka di be di theoga le gore ke be ke nka se kgone go aloga ka dimaraka tša ka tše dibotse tša nakong e fetilego. Ke gopola ge ke be ke lopa Jehofa Modimo, ke mo kgopela gore a ntlhahle. Ka moragonyana ga moo, ke ile ka bitšwa gore ke yo kopana le moprofesara wa ka wa tša boentšeneare. O ile a mpotša gore o hweditše kgopelo ya go nyakega ga moentšeneare gomme a araba thelekramo yeo ntle le tumelelo ya ka, a ngwala gore ke tla amogela mošomo woo. Ke ile ka leboga moprofesara yoo eupša ka mo hlalosetša lebaka leo ka lona ke bego ke ikemišeditše go dira gore go hlankela Jehofa e be mošomo wa ka. Ka June 17, 1942, ke ile ka kolobetšwa gomme ka nyaka ke kgethwa le semetseng gore ke hlankele ke le mmulamadibogo, ka ge badiredi ba nako e tletšego ba Dihlatse tša Jehofa ba bitšwa bjalo.

Ka morago ka 1942, ke ile ka hwetša lengwalo la taelo ya go tsenela tša bohlabani gomme ka ikhwetša ke le ka pele ga lekgotla la go ngwadišetša tirelo ya tša bohlabani, ke hlalosa lebaka leo ka lona letswalo la ka le bego le sa ntumelele gore ke tšee karolo ntweng. Ke ile ka ntšha mangwalo a bohlatse ao a tšwago go baprofesara ba kholetšheng bao ba bego ba ngwadile mabapi le boitshwaro bja ka bjo bobotse le bokgoni bja ka bja moswananoši bjalo ka moentšeneare wa tša go aga. Lega go le bjalo, go sa šetšwe bohlatse bjoo bjo bo kwagalago, mafelelong ke ile ka lefišwa R100 000 ke moka ka ahlolelwa nywaga e mehlano kgolegong ya mmušo wa United States ya kua Leavenworth, Kansas.

 BOPHELO BJA KA BJA GE KE LE KGOLEGONG

Kgolego ya mmušo wa United States ya kua Leavenworth lehono. Ba e ka bago ba 230 ba rena ba be ba golegilwe moo

Dihlatse tša bafsa tše di fetago tše 230 di be di ahloletšwe go ya kgolegong ya tša temo, e lego lefelo la kgolego ya mmušo ya Leavenworth. A e be e le mašemo ao re bego re abetšwe go šoma go ona ka tlase ga bahlapetši ba mmalwa. Ba bangwe ba bona ba be ba tseba ka boemagare bja rena bja Bokriste gomme ba be ba dumelelana le dipono tša rena.

Bahlapetši ba mmalwa ba be ba re dumelela gore re tšwele pele re swara diboka tša rena tša ka mehla tša Beibele. Ba be ba bile ba re thuša go tsenya dikgatišo tša Beibele ka kgolegong. Mohlapetši yo mongwe wa kgolego o ile a ba a dira peeletšo ya makasine wa Consolation (wo ga bjale o bitšwago Phafoga!).

GO LOKOLLWA GA KA LE TIRELO YA BOROMIWA

Ka morago ga go hlankela nywaga e meraro ya e mehlano yeo ke bego ke e ahloletšwe kgolegong, ke ile ka lokollwa ka February 16, 1946, dikgwedi tše mmalwa ka morago ga ge Ntwa ya II ya Lefase e fedile. Ntle le go senya nako, ke ile ka tsenela bodiredi bja nako e tletšego gape. Ke be ke abetšwe go boela motseng wa Leavenworth, Kansas. Seo se be se ntšhošitše ka gobane Dihlatse tša Jehofa di be di kgethollwa kudu moo. Go be go le thata go hwetša mošomo wa boiphedišo gomme go hwetša lefelo la bodulo gona go le thata le go feta.

Ke gopola mohlapetši yo mongwe a nkgadimola ka gore, “Ntšwele ka motse!” Ge ke be ke bona mmopu wa peisepolo woo a bego a o swere ka seatleng ke ile ka tšhoga gomme ka ja fase. Ntlong e nngwe, mosadi yo mongwe o ile a re, “Ema go se nene” ke moka a tswalela mojako. Ke ile ka leta go fihlela ge gateetee go bulega lefasetere la lebato la ka godimo gomme ke tšhelwa ke meetse a ditšhila a dibjana. Go sa šetšwe seo, bodiredi bja ka bo ile bja ba le ditšhegofatšo. Ka morago ke ile ka kwa gore ba bangwe bao ke ilego ka ba nea dikgatišo tša Beibele e ile ya ba Dihlatse.

Ka 1943 go ile gwa hlongwa sekolo se sefsa sa baromiwa kua leboa la New York. Ke ile ka laletšwa gore ke tlo tsena go sona, gomme ka aloga klaseng ya lesome ka February 8, 1948. Sekolo seo se ile sa bitšwa Sekolo sa Beibele sa Watchtower sa Gilead. Ge ke se na go aloga ke ile ka newa kabelo ya go ya Gold Coast, yeo ga bjale e bitšwago Ghana.

Ge ke fihla Gold Coast, kabelo ya ka e be e le go dira boboledi go bahlankedi ba mmušo le go Mayuropa. Mafelobekeng ke be ke šoma le phuthego ya Dihlatse tša Jehofa gomme ke thuša ditho tša yona bodireding bja go ya ka ntlo le ntlo. Ke ile ka ba ka etela mafelo ao go bego go dula Dihlatse tšeo di lego lekatana gomme ke be ke di tlwaetša bodireding. Go oketša moo, ke ile ka hlankela ke le molebeledi wa mosepedi kua Ivory Coast yeo e lego kgauswi le moo, yeo ga bjale e bitšwago Côte d’Ivoire.

Ge ke be ke hlankela mafelong ao, ke ile ka ithuta go phela bjalo ka baagi ba Afrika—ke robala ka ntlong ya mabu, ke eja ka diatla le go ithoma “ka ntle” go swana le Baisiraele ge ba be ba le lešokeng. (Doiteronomio 23:12-14) Go dira bjalo go thušitše nna le baromiwagotee le nna gore re be le botumo bjo bobotse. Basadi ba  bahlankedi ba moo ba ile ba thoma go ithuta Beibele le rena. Ka gona ge baganetši ba be ba re tshwenya le go ntšha taelo ya go fediša tumelelo ya go dula ga rena nageng (di-visa), basadi ba bahlankedi bao ba be ba phegelela banna ba bona ke moka phetho yeo ya fetošwa!

Mafelelong, ke ile ka swarwa ke malaria go swana le baromiwa ba bantši ba Afrika. Ke ile ka hlaselwa ke go tonya le letadi tšeo di bego di ntlhakahlakanya. Ka dinako tše dingwe ke be ke swanelwa ke go swara mohlagare wa ka wa ka tlase gore o se thothomele. Go sa šetšwe seo tirelo ya ka e ile ya tšwela pele e nthabiša le go nkgotsofatša.

Nywageng ya ka e mene ya mathomo ke le Afrika, ke be ke ngwalelana le Eva Hallquist, yoo ke bego ke kopane le yena pele ke tloga United States. Ke ile ka kwa gore o be a tlo aloga klaseng ya bo-21 ya Sekolo sa Gilead ka July 19, 1953, kopanong ya ditšhabatšhaba ya Dihlatse tša Jehofa yeo e bego e swaretšwe Yankee Stadium kua New York. Ke ile ka dira dithulaganyo le molaodi wa sekepe tša gore ke šome sekepeng sa gagwe e le ge ke lefelela leeto la go ya United States.

Ka morago ga matšatši a 22, ao ka dinako tše dingwe re bego re hlaselwa ke madimo a ka lewatleng, ke ile ka goroga e le gore ke yo kopana le Eva ntlongkgolo ya Dihlatse tša Jehofa kua Brooklyn. Gona moo, re le ka godimo ga tlhaka moo re bego re kgona go bona boemakepe bja New York le bogomapono, ke ile ka mo kgopela gore re nyalane. Ka morago, Eva o ile a tla Gold Coast go tlo hlankela le nna moo.

GO HLOKOMELA BOIKARABELO BJA LAPA

Ka morago ga go hlankela le Eva ka nywaga e mmalwa Afrika, mma o ile a nngwalela a ntsebiša gore tate o be a bolawa ke bolwetši bja kankere. Ka morago ga go tšea matšatši a go se be gona kabelong ya rena, nna le Eva re ile ra boela United States. Tate o ile a fokola kudu gomme go se ye kae ke ge a hlokofala.

Ka morago, ge re be re šetše re na le nywaga e mene re boetše Ghana, re ile ra tsebišwa gore mma o thomile go fokola. Bagwera ba bangwe ba rena ba ile ba šišinya gore nna le Eva re boe gae re tlo mo hlokomela. Yeo e bile phetho e thata kudu yeo re ilego ra swanelwa ke go e dira. Re ile ra boela United States ka morago ga nywaga e 15 yeo re e feditšego re le tirelong ya boromiwa, yeo e 11 ya yona re hlanketšego gotee.

Ge ke be ke kopana le kgoši ya kua Gold Coast, yeo ga bjale e bitšwago Ghana

Ge nywaga e dutše e eya, re be re šiedišana ka go hlokomela mma, re mo thuša gore a be gona dibokeng ge a be a kgona. Ka January 17, 1976, o ile a hlokofala a na le nywaga e 86. Eupša re ile ra welwa ke selo se nyamišago le go feta nywaga e senyane ka morago. Eva o ile a swarwa ke bolwetši bja kankere. Re ile ra dira sohle seo re ka se kgonago go lwa le bolwetši bjoo, eupša mafelelong Eva o ile a ineela ntweng ge a be a hlokofala ka June 4, 1985, a na le nywaga e 70.

DIPHETOGO TŠE OKETŠEGILEGO MOŠOMONG O KGOTSOFATŠAGO

Ka 1988, ke ile ka laletšwa gore ke be gona go neelweng ga ofisi ya lekala yeo e bego e sa tšwa go katološwa kua Ghana. Yeo e bile tiragalo e sa lebalegego! Nywaga e 40 pele ga moo, ge ke be ke fihla Ghana ka morago ga go aloga sekolong sa Gilead, go be go na le Dihlatse tše makgolo a mmalwa feela. Ka 1988, go be go na le Dihlatse tše ka godimo ga tše 34 000, eupša ga bjale go na le tše e ka bago tše 114 000!

Nywaga e mebedi ka morago ga go etela Ghana, ke ile ka nyala mogwera wa Eva yo mogolo e lego Betty Miller ka August 6, 1990. Bobedi bja rena re ile ra tšwela pele go dira gore go hlankela Jehofa e be mošomo wa rena. Re hlologetše letšatši leo ka lona re tlago go bona gape borakgolo le bomakgolo ba rena, batswadi ba rena gotee le Eva ge ba tsošwa Paradeiseng mo lefaseng.—Ditiro 24:15.

Ke tlala megokgo ge ke nagana ka tokelo e kgolo ya ge ke dirišitšwe ke Jehofa ka nywaga e fetago e 70 tirelong ya gagwe. Ke mo leboga gantši ge a ile a ntlhahla gore ke dire tirelo ya gagwe gore e be mošomo wa ka. Le ge ga bjale ke le nywageng ya ka ya bo-90, Jehofa yo e lego moentšeneare yo mogologolo wa tša go aga legohleng, o tšwetše pele a mpha matla le sebete gore ke tšwele pele ke phegelela mošomo wa ka wa go mo hlankela.