Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI DECEMBER 2013

 BATAMELA KGAUSWI LE MODIMO

“Bonang! Dilo ka Moka ke di Dira tše Mpsha”

“Bonang! Dilo ka Moka ke di Dira tše Mpsha”

Na o kganyoga gore wena le lapa la gago le phele bophelo bjo bobotse le bjo botelele? Na o kganyoga go phela lefaseng leo go lona bohloko, tlaišego le lehu e tlago go ba dilo tša nakong e fetilego? Lefase le bjalo ga e fo ba boikgopolelo feela. Go fapana le seo, lefase le lefsa la toko e tla ba selo sa kgonthe kgauswinyane, ka gobane ke seo Jehofa Modimo a se rerilego. Ela hloko kamoo go phethagatšwa ga morero wa gagwe go hlaloswago ka gona go Kutollo 21:3-5—Bala.

“[Modimo] o tla phumola megokgo ka moka mahlong a bona.” (Kutollo 21:4) O tla phumola megokgo ya mohuta mang? E sego megokgo ya lethabo goba yeo e šireletšago mahlo a rena. Kholofetšo ya Modimo e šupa go megokgo yeo e bakwago ke tlaišego le manyami. Modimo a ka se fo omiša megokgo yeo; o tla e phumola ka mo go feletšego ka go tloša dibaki tša megokgo yeo e sa nyakegego, e lego tlaišego le manyami.

“Lehu le ka se hlwe le sa ba gona.” (Kutollo 21:4) Ke’ng seo se bakilego megokgo e mentši e sa nyakegego go feta lenaba leo e lego lehu? Jehofa o tla lokolla batho ba kwago ditlemong tša lehu. O tla dira seo bjang? Ka go fediša sebaki sa kgonthe sa lehu: sebe seo se abetšwego go Adama. (Baroma 5:12) Jehofa o tla lebiša batho bao ba kwago phethegong motheong wa sehlabelo sa topollo sa Jesu. * Ke moka lenaba la mafelelo, e lego lehu, le tla “fedišwa mafelelong.” (1 Bakorinthe 15:26) Batho ba botegago ba tla kgona go phela go ya kamoo Modimo a bego a rerile gore ba phele ka gona—ka mo go sa felego ba phetše gabotse mmeleng.

‘Le ge e le bohloko bo ka se hlwe bo sa ba gona.’ (Kutollo 21:4) Ke bohloko bja mohuta ofe bjo bo ka se hlwego bo sa ba gona? Bohloko ka moka bja monagano, bja maikwelo le bja mmele bjo bo bakilwego ke sebe le go se phethagale bjo bo šulafaleditšego batho ba dimilionemilione bophelo, bo ka se sa ba gona.

Bophelo bjo bo se nago megokgo, lehu gotee le bohloko e tla ba selo sa kgonthe kgauswinyane. Mo gongwe o ka ipotšiša gore, ‘Eupša bo tla ba gona kae?’ ‘Na mohlomongwe kholofetšo ya Modimo ya mabapi le bophelo e legodimong?’ Aowa. Ela hloko mabaka ao ka ona e sego legodimong. La pele, kholofetšo yeo e thoma ka mantšu a rego “tente ya Modimo e bathong,” gomme batho ba phela mo lefaseng. (Kutollo 21:3) La bobedi, kholofetšo e hlalosa lefase leo go lona ‘lehu le ka se hlwego le sa ba gona,’ e lego lefase leo go kilego gwa ba le lehu eupša e le leo le tla kgaotšago go ba gona. Lehu ga se la ka la ba gona legodimong le ka mohla, eupša le bile gona ka nako e telele mo lefaseng. Ka gona, go molaleng gore kholofetšo ya Modimo ya bophelo bjo bokaone e tla phethagatšwa gona mo lefaseng.

Modimo o tla gopiša dinoka tša megokgo tšeo di bego di elela ka baka la tlaišego le manyami

Jehofa o nyaka gore re dumele kholofetšo ya gagwe ya lefase le lefsa la toko. Ka morago ga go hlalosa ka ditšhegofatšo tšeo di tlago, Modimo o kgonthišetša kholofetšo ya gagwe ka gore: “Bonang! Dilo ka moka ke di dira tše mpsha.” Ke moka a oketša ka gore: “Mantšu a a botega e bile ke a therešo.” (Kutollo 21:5) Ke ka baka la’ng o sa ithute mo go oketšegilego mabapi le kamoo wena le baratiwa ba gago le ka bago gare ga barapedi bao ba thabilego bao ba tlago go bona dikholofetšo tša Modimo di fetoga tiragalo ya kgonthe ya letago?

^ ser. 5 Bakeng sa go ithuta mo go oketšegilego ka sehlabelo sa topollo sa Kriste, bona kgaolo 5 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.