Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2013

 TABA YA LETLAKALA LA KA NTLE | MAAKA AO A DIRAGO GORE GO BONAGALE EKA MODIMO GA A RATEGE

Therešo e ka go Lokolla

Therešo e ka go Lokolla

Ka letšatši le lengwe, ge Jesu a be a le kua Jerusalema, o be a bolela ka Tatagwe, Jehofa, gomme a pepentšha baetapele ba maaka ba bodumedi ba mehleng ya gagwe. (Johane 8:12-30) Seo a ilego a se bolela ka nako yeo se re ruta kamoo re ka hlahlobago ditumelo tše di tumilego tša mabapi le Modimo lehono. Jesu o itše: “Ge e ba le dula lentšung la ka, gona le barutiwa ba ka e le ka kgonthe, le tla tseba therešo gomme therešo e tla le lokolla.”—Johane 8:31, 32.

“Dula lentšung la ka.” Mo Jesu o bea tekanyetšo ya go sekaseka ge e ba dithuto tša bodumedi e le “therešo.” Ge o ekwa go bolelwa selo se itšego ka Modimo, ipotšiše gore, ‘Na se se dumelelana le mantšu a Jesu le Mangwalo ka moka a Makgethwa?’ Ekiša bao ba ilego ba kwa ge moapostola Paulo a bolela le bao ba bego “ba hlahloba Mangwalo ka kelohloko letšatši le letšatši go bona ge e ba dilo tše [dilo tšeo ba bego ba ithuta tšona] di be di le bjalo.”—Ditiro 17:11.

Marco, Rosa le Raymonde, bao ka moka ba tsopotšwego sehlogong sa pele sa lelokelelo le la dihlogo, ba ile ba hlahlobišiša ditumelo tša bona ka go ithuta Beibele le Dihlatse tša Jehofa. Ba ithutile’ng?

Marco: “Morutiši wa rena wa Beibele o be a diriša Mangwalo go araba potšišo e nngwe le e nngwe yeo nna le mosadi wa ka re bego re na le yona. Lerato la rena la go rata Jehofa le ile la thoma go gola, gomme le rena re ile ra batamelana kudu bjalo ka monna le mosadi!”

Rosa: “Mathomong, ke be ke tšea Beibele e fo ba puku ya filosofi yeo e lekago go hlalosa Modimo e diriša tsela ya batho ya go nea mabaka. Lega go le bjalo, ganyenyane-ganyenyane ke ile ka hwetša dikarabo tša dipotšišo tša ka. Ga bjale, Jehofa ke motho wa kgonthe go nna. Ke Motho yoo nka mmotago.”

Raymonde: “Ke ile ka rapela Modimo gore a nthuše go ithuta ka yena. Ka moragonyana ga moo, nna le monna wa ka re ile ra thoma go ithuta Beibele. Mafelelong, re ile ra ithuta therešo ka Jehofa! Re ile ra thabišwa kudu ke go tseba gore ke Modimo wa mohuta mang.”

Beibele ga e pepentšhe feela maaka ka Modimo; e utolla therešo mabapi le dika tša gagwe tše di ipiletšago. Ke Lentšu la gagwe le le buduletšwego, gomme le re thuša “gore re tsebe dilo tšeo re di neilwego ka botho ke Modimo.” (1 Bakorinthe 2:12) Ke ka baka la’ng o sa iponele ka noši kamoo Beibele e ka arabago dipotšišo tše di tlwaelegilego eupša e le tše bohlokwa mabapi le Modimo, morero wa gagwe le bokamoso bja rena? Bala dikarabo tša tše dingwe tša dipotšišo tše ka tlase ga “Dithuto tša Beibele > Dipotšišo tša Beibele di a Arabja” go www.jw.org/nso. Gape o ka kgopela thuto ya Beibele Wepesaeteng yeo goba wa e kgopela go yo mongwe wa Dihlatse tša Jehofa. Re kgodišegile gore ge e ba o dira bjalo, o tla hwetša go le bonolo go rata Modimo go feta kamoo o bego o nagana ka gona.