Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  November 2013

 BATAMELA KGAUSWI LE MODIMO

“Moputsi wa Bao ba mo Tsomago ka Phišego”

“Moputsi wa Bao ba mo Tsomago ka Phišego”

Na Jehofa o tšeela godimo seo barapedi ba gagwe ba se dirago e le ge ba leka go mo kgahliša? Ba bangwe ba ka no se dumelelane le seo, ka go bolela gore Modimo ga a re kgahlegele. Eupša go bolela seo ke go godiša thuto e fošagetšego kudu ka Modimo. Lentšu la gagwe, Beibele, le phošolla maaka a bjalo. Le re kgonthišetša gore Jehofa o tšeela godimo maiteko a barapedi ba gagwe ba botegago. Ela hloko mantšu a moapostola Paulo ao a hwetšwago go Baheberu 11:6.

Go nyakega’ng e le gore re kgahliše Jehofa? Paulo o ngwala gore: “Ka ntle le tumelo go kgahliša Modimo gabotse ga go kgonege.” Ela hloko gore Paulo ga a bolele gore go thata go kgahliša Modimo ntle le tumelo. Go e na le moo, moapostola o bolela gore ga go kgonege go dira bjalo. Ka mantšu a mangwe, tumelo ke selo se bohlokwa bakeng sa go kgahliša Modimo.

Ke tumelo ya mohuta mang yeo e kgahlišago Jehofa? Tumelo ya rena go Modimo e swanetše go akaretša dibopego tše pedi. Sa pele, re “swanetše go dumela gore o gona.” Diphetolelo tše dingwe di re re swanetše “go dumela gore ke wa kgonthe” le “go dumela gore o a phela.” Re ka kgona bjang go kgahliša Modimo ge e ba re belaela go ba gona ga gagwe? Le gona, tumelo ya kgonthe e akaretša mo gontši, ka gobane gaešita le batemona ba dumela gore Jehofa o gona. (Jakobo 2:19) Tumelo ya rena ya gore Modimo o gona e swanetše go dira gore re gate mogato, e lego go bontšha tumelo ya rena ka go phela ka tsela yeo e mo kgahlišago.—Jakobo 2:20, 26.

Sa bobedi, re “swanetše go dumela gore” Modimo ke “moputsi.” Motho yo a nago le tumelo ya kgonthe o kgodišegile ka botlalo gore maiteko a gagwe a go phela ka tsela yeo e kgahlišago Modimo e ka se be a lefeela. (1 Bakorinthe 15:58) Re ka kgahliša bjang Jehofa ge e ba re belaela bokgoni bja gagwe goba kganyogo ya gagwe ya go re putsa? (Jakobo 1:17; 1 Petro 5:7) Motho yo a phethago ka gore Modimo o swanetše go ba a se na taba, a hloka tebogo e bile a se na seatla se se bulegilego ga a tsebe Modimo yo go bolelwago ka yena ka Beibeleng.

Ke bomang bao Jehofa a ba putsago? Paulo o re: “Bao ba mo tsomago ka phišego.” Puku e nngwe ya ditšhupetšo ya bafetoledi ba Beibele e re lentšu la Segerika leo le fetoletšwego e le ‘go tsoma ka phišego’ ga le bolele “go yo nyaka” eupša go e na le moo, le umaka go tla go Modimo “ka borapedi.” Puku e nngwe gape ya ditšhupetšo e hlalosa gore lediri le la Segerika le ka sebopego seo se bontšhago go tsenelela le go dira maiteko a magolo. Ee, Jehofa o putsa bao tumelo ya bona e ba tutueletšago go mo rapela ka lerato leo le tšwago pelong le ka phišego.—Mateo 22:37.

Re ka kgahliša bjang Jehofa ge e ba re belaela bokgoni bja gagwe goba kganyogo ya gagwe ya go re putsa?

Jehofa o putsa bjang barapedi ba gagwe ba botegago? O holofeditše moputso o mogolo kudu wa nakong e tlago wo o utollago go tsenelela ga go nea ga gagwe ka seatla se se bulegilego gotee le lerato la gagwe, e lego bophelo bjo bo sa felego Paradeiseng mo lefaseng. (Kutollo 21:3, 4) Gaešita le gona bjale, bao ba tsomago Jehofa ka phišego ba thabela ditšhegofatšo tše di humilego. Ka thušo ya moya wa gagwe o mokgethwa gotee le bohlale bjoo bo hwetšwago ka Lentšung la gagwe, ba thabela bophelo bjo bo putsago le bjo bo kgotsofatšago.—Psalme 144:15; Mateo 5:3.

Ruri Jehofa ke Modimo yo a bontšhago tebogo le yo a tšeelago godimo tirelo ya go botega ya barapedi ba gagwe bao ba ineetšego. Na go tseba seo go dira gore o nyake go batamela kgauswi le yena? Ge e ba go le bjalo, ke ka baka la’ng o sa ithute mo go oketšegilego mabapi le kamoo o ka hlagolelago le go bontšha mohuta wa tumelo yeo Jehofa a tlago go e putsa ka mo go humilego?

Mmalo wa Beibele o šišintšwego bakeng sa November

Tito 1-3; Filemone 1-25; Baheberu 1-13Jakobo 1-5