Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2013

 TABA YA LETLAKALA LA KA NTLE | MAAKA AO A DIRAGO GORE GO BONAGALE EKA MODIMO GA A RATEGE

Maaka ao a Dirilego Gore Modimo a se Tsebje

Maaka ao a Dirilego Gore Modimo a se Tsebje

SEO BA BANTŠI BA SE DUMELAGO

Bodumedi bja Bokriste “ka dibopego tša bjona tše tharo tše dikgolo e lego Bokatholika bja Roma, bo-Orthodox bja ka Bohlabela le Boprotestanta, bo dumela go Modimo o tee yo e lego Batho ba bararo: Modimo Tate, Modimo Morwa le Modimo Moya o Mokgethwa. Go ya ka tumelo ya Bokriste, tumelo ye ga se ya go dumela go medimo e meraro eupša ke ya go dumela gore batho ba ba bararo ge e le gabotse ke motho o tee.”—The New Encyclopædia Britannica.

THEREŠO E TŠWAGO KA BEIBELENG

Jesu, Morwa wa Modimo, le ka mohla ga se a ka a bolela gore o lekana le Tatagwe goba ke selo se tee le yena. Go e na le moo, o itše: “Ke ya go Tate, gobane Tate o mpheta ka bogolo.” (Johane 14:28) O ile a ba a botša yo mongwe wa balatedi ba gagwe gore: “Ke rotogela go Tate le go Tatago lena le go Modimo wa ka le go Modimo wa lena.”—Johane 20:17.

Moya o mokgethwa ga se motho. Bakriste ba pele ba ile “ba tlala moya o mokgethwa,” gomme Jehofa o itše: “Ke tla tšhollela o mongwe wa moya wa ka godimo ga motho yo mongwe le yo mongwe.” (Ditiro 2:1-4, 17) Moya o mokgethwa ga se karolo ya Boraro Botee. Ke matla a Modimo a šomago.

LEBAKA LEO KA LONA GO LEGO BOHLOKWA GO TSEBA SE

Diithuti tša Katholika e lego Karl Rahner le Herbert Vorgrimler, di hlalosa gore Boraro Botee “bo be bo ka se tsebje ntle le kutollo, gaešita le ka morago ga kutollo bo be bo ka se kwešišwe ka botlalo.” Na ruri o ka rata motho yoo go sa kgonegego gore o mo tsebe goba o mo kwešiše? Ka baka leo, thuto ya Boraro Botee ke lepheko la go šitiša motho gore a tsebe Modimo le go mo rata.

Marco, yo a tsopotšwego sehlogong sa pejana, o be a tšea Boraro Botee e le lepheko. O re: “Ke be ke nagana gore Modimo o nkutela seo a lego sona gomme sona seo se ile sa dira gore a be kgole kudu, a se tsebege le go batamelega.” Lega go le bjalo, “Modimo ga se Modimo wa tlhakatlhakano.” (1 Bakorinthe 14:33) Ga se a re utela seo a lego sona. O nyaka gore re mo tsebe. Jesu o itše: “Re rapela se re se tsebago.”—Johane 4:22.

Marco o re: “Ge ke be ke ithuta gore Modimo ga se karolo ya Boraro Botee, mafelelong ke ile ka kgona go gwerana le yena.” Ge e ba re lebelela Jehofa e le Motho yo a ikemetšego go e na le go mo lebelela e le motho o šele yo a sa tsebjego, go ba bonolo kudu go mo rata. Beibele e re: “Yo a se nago lerato ga a tsebe Modimo, gobane Modimo ke lerato.”—1 Johane 4:8.