Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2013

 TABA YA LETLAKALA LA KA NTLE | MAAKA AO A DIRAGO GORE GO BONAGALE EKA MODIMO GA A RATEGE

Maaka ao a Dirilego Gore go Bonagale Eka Modimo o Sehlogo

Maaka ao a Dirilego Gore go Bonagale Eka Modimo o Sehlogo

SEO BA BANTŠI BA SE DUMELAGO

“Gatee-tee ka morago ga lehu meoya ya batho ba sebe e theogela diheleng, moo ba tlaišwago ka dikotlo tša dihele, ‘mollo wa ka mo go sa felego.’” (Catechism of the Catholic Church) Baetapele ba bangwe ba bodumedi ba bolela gore dihele ke boemo bja go arogana le Modimo ka mo go feletšego.

THEREŠO E TŠWAGO KA BEIBELENG

“Moya wo o dirago sebe o tla hwa.” (Hesekiele 18:4) Bahu “ga ba tsebe selo le gatee.” (Mmoledi 9:5) Ge e ba moya o ehwa e bile o sa tsebe selo, o ka tlaišega bjang ‘mollong wa ka mo go sa felego’ goba gaešita le go tlaišwa ke go kwa bohloko bja sa ruri bja go arogana le Modimo?

Ka Beibeleng, lentšu la Seheberu le la Segerika ao gantši a fetolelwago e le “dihele” ge e le gabotse a šupa go lebitla le le tlwaelegilego la batho. Ka mohlala, ge Jobo a be a swerwe ke bolwetši bjo bohloko, o ile a rapela ka gore: “Ke duma eka o be o ka nkuta lebitleng la ka [“diheleng,” Douay-Rheims Version].” (Jobo 14:13, Holy Bible—Easy-to-Read Version) Jobo o be a nyaka go khutša, e sego lefelong la tlaišego goba leo le mo aroganyago le Modimo, eupša lebitleng.

LEBAKA LEO KA LONA GO LEGO BOHLOKWA GO TSEBA SE

Go ba sehlogo ga go dire gore re rate Modimo; go re tloša go yena. Rocío, yo a dulago Mexico, o re: “Ke rutilwe thuto ya mollo wa dihele go tloga bjaneng. Ke be ke tšhogile kudu mo e lego gore ke be ke sa akanye gore Modimo o na le dika le ge e le dife tše dibotse. Ke be ke nagana gore o befetšwe e bile ga a kgotlelele selo.”

Dipolelo tša Beibele tše di kgwagalago mabapi le dikahlolo tša Modimo le boemo bja bahu di ile tša fetoša tsela yeo Rocío a bego a lebelela Modimo ka yona. O re: “Ke ile ka ikwa ke lokologile—ke ekwa gore ke imolotšwe morwalo woo o mogolo wa maikwelo. Ke ile ka thoma go dumela taba ya gore Modimo o re nyakela tše kaonekaone, gore o a re rata le gore nka mo rata. O swana le tate yo a swarago bana ba gagwe ka seatla gomme a ba nyakela tše kaonekaone.”—Jesaya 41:13.

Ba bantši ba ile ba katanela go ba batho ba bodumedi ka baka la go boifa mollo wa dihele, eupša Modimo ga a nyake gore o mo hlankele ka baka la ge a go tšhoša. Go e na le moo, Jesu o itše: “O rate Jehofa Modimo wa gago.” (Mareka 12:29, 30) Go oketša moo, ge re lemoga gore Modimo ga a dire dilo ka tsela ya go hloka toka lehono, re ka bota le dikahlolo tša gagwe tša nakong e tlago. Re ka bolela re kgodišegile go swana le mogwera wa Jobo e lego Elihu, ra re: “Go dira ka go hloka toka a go be kgole le Ramatlaohle.”—Jobo 34:10.