Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2013

 TABA YA LETLAKALA LA KA NTLE | MAAKA AO A DIRAGO GORE GO BONAGALE EKA MODIMO GA A RATEGE

Maaka ao a Dirilego Gore go Bonagale Eka Modimo o Hloka Leina

Maaka ao a Dirilego Gore go Bonagale Eka Modimo o Hloka Leina

SEO BA BANTŠI BA SE DUMELAGO

“Ga se ra dumelelana tabeng ya ge e ba Modimo a na le leina, le gore ge e ba go le bjalo, gona leina leo e tla ba lefe.”—Moprofesara David Cunningham, Theological Studies.

THEREŠO E TŠWAGO KA BEIBELENG

Modimo o itše: “Ke nna Jehofa. Ke lona leina la ka.” (Jesaya 42:8) Jehofa ke leina la Seheberu leo le bolelago gore “Yo a Bakago go ba Gona.”—Genesi 2:4, mongwalo wa tlase wa Reference Bible.

Jehofa o nyaka gore re diriše leina la gagwe. Beibele e re: “Bitšang leina la gagwe. Tsebatšang mediro ya gagwe merafong. Bolelang gore leina la gagwe le phagame.”—Jesaya 12:4.

Jesu o be a diriša leina la Modimo. Ge Jesu a be a rapela, o ile a botša Jehofa gore: “Ke ba [barutiwa ba Jesu] tsebišitše leina la gago e bile ke tla le tsebatša.” Ke ka baka la’ng Jesu a ile a tsebiša barutiwa ba gagwe leina la Modimo? O tšwetše pele ka gore: “E le gore lerato leo o [Modimo] nthatilego ka lona le be go bona gomme nna ke be boteeng le bona.”—Johane 17:26.

LEBAKA LEO KA LONA GO LEGO BOHLOKWA

Rathutatumelo Walter Lowrie o ngwadile gore: “Motho yo a sa tsebego Modimo ka leina, ruri ga a mo tsebe e le motho wa kgonthe gomme a ka se kgone go mo rata, ge e ba a mo tseba feela e le matla a sa bonagalego.”

Go uta leina la Modimo goba go tsenya le lengwe legatong la lona go swana le go le ntšha ka Beibeleng

Monna yo a bitšwago Victor o be a eya kerekeng beke le beke, eupša o be a sa nagane gore o tloga a tseba Modimo. O re: “Ka morago ke ile ka ithuta gore leina la Modimo ke Jehofa, gomme go ile gwa ba bjalo ka ge e ka ke mo tsebišwa semmušo. Ke be ke ikwa bjalo ka ge eka mafelelong ke kopane le Motho yo ke bego ke kwele mo gontši kudu ka yena. Ke ile ka thoma go mo tšea e le Motho wa kgonthe le go gwerana le yena.”

Ka mo go swanago, Jehofa o batamela kgauswi le batho bao ba dirišago leina la gagwe. Modimo ge a bolela ka “bao ba sa lebalego leina la gagwe,” o holofetša gore: “Ke tla ba kwela bohloko go etša ge motho a kwela morwa wa gagwe yo a mo kwago bohloko.” (Maleaki 3:16, 17) Modimo gape o putsa bao ba bitšago leina la gagwe. Beibele e re: “Yo mongwe le yo mongwe yo a bitšago leina la Jehofa o tla phološwa.”—Baroma 10:13.