Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI OCTOBER 2013

Mmala o go Kgoma Bjang?

Mmala o go Kgoma Bjang?

Ge o dutše o lebelela go go dikologa, mahlo a gago le bjoko di šoma mmogo go kgoboketša tsebišo. O bona seenywa kgauswi gomme o dira phetho ya ge e ba o nyaka go se ja. O lebelela sebakabakeng gomme wa phetha ka gore pula e ka se ne lehono. O bona mantšu ao o a balago gona bjale gomme o leka go hlatholla seo a se bolelago. Ge e le gabotse, o kgongwa ke mmala. Na ruri go bjalo?

Mmala wa seenywa seo o se bonego o go thuša go dira phetho ya ge e ba se butšwitše gomme se kganyogega. Mmala wa sebakabaka le maru o go thuša go tseba boemo bja leratadima. Ge o dutše o bala mantšu a sehlogo se, mahlo a gago a thabela go se swane ga mmala wa mongwalo le wa moo go ngwaletšwego gona. Ee, mohlomongwe ka ntle le go lemoga seo, o diriša mmala go go thuša go tšweletša tsebišo ka dilo tšeo di go dikologilego. Eupša mmala gape o kgoma maikwelo a gago.

KAMOO MMALA O GO KGOMAGO KA GONA MAIKWELONG

Ge o dutše o sepela ditsejaneng tša ka lebenkeleng, o dikologilwe ke dilo tšeo di phuthetšwego ka tsela yeo e hlametšwego go gogela mahlo a gago. Go sa šetšwe gore o lemoga seo goba go se bjalo, babapatši ba diriša mebala le metswako ya mebala yeo e ipiletšago dikganyogong tše itšego tša gago, go bong bja gago le nywaga yeo o lego go yona. Bakgabiši ba magae, baroki ba diaparo gotee le borabokgabo le bona ba tseba gore mmala o ka go gogela maikwelong.

Batho ba ka hlalosa mebala ka ditsela tšeo di fapafapanego ka baka la setšo le meetlo. Ka mohlala, batho ba bangwe kua Asia ba tswalanya mmala o mohwibidu le katlego le go keteka, eupša dikarolong tše dingwe tša Afrika, bohwibidu ke mmala wa manyami. Lega go le bjalo, go sa šetšwe gore ba godišitšwe bjang, batho ba ikwa ka tsela e swanago ka mebala e itšego. Anke re eleng hloko mebala e meraro le kamoo e ka go kgomago ka gona.

BOHWIBIDU ke mmala wo o tagilego kudu. Gantši mmala o mohwibidu o tswalanywa le matla, ntwa le kotsi. Ke mmala wo o kgomago maikwelo ka mo go tseneletšego gomme o ka kaonefatša tshepedišo ya tšhilego ya motho ya dijo, wa oketša tsela ya go hema gomme wa phagamiša kgatelelo ya madi.

Ka Beibeleng, lentšu la Seheberu bakeng sa ‘bohwibidu’ le tšwa go lentšu leo le rago gore “madi.” Beibele e diriša mmala wa bohwibidu bjo bo tagilego goba o mohwibiduhwibidu, go hlalosa seswantšho seo se sa lebalegego sa mogwebakammele yo a bolayago yo a aperego mmala o mophepolo le o mohwibiduhwibidu yo a nametšego “sebata sa mmala o mohwibiduhwibidu seo se bego se tletše maina a maroga.”—Kutollo 17:1-6

BOTALA bo bolela seo se fapanego le bohwibidu, ka ge bo diegiša tshepedišo ya tšhilego ya dijo gomme bo dira gore motho a iketle. Botala ke mmala wo o homotšego gomme gantši o tswalanywa le boiketlo. Re ikwa re lapologa ge re bona dirapa tše ditala gotee le dithabana tše ditala. Pego ya Genesi ya mabapi le tlholo e bolela gore Modimo o ile a mediša bjang bjo botala gotee le dimela bakeng sa batho.—Genesi 1:11, 12, 30.

BOŠWEU gantši bo tswalanywa le seetša, tšhireletšego le bohlweki. Gape bo sepedišana le dika tše bjalo ka go loka, go hloka molato le tshekego. Bošweu ke mmala wo go bolelwago ka wona gantši  ka Beibeleng. Diponong, batho le barongwa ba bontšhwa ba apere mmala o mošweu, e le go gatelela toko le bohlweki bja moya. (Johane 20:12; Kutollo 3:4; 7:9, 13, 14) Dipere tše tšhweu le banamedi ba tšona bao ba aperego bošweu le linene e hlwekilego di emela ntwa ya toko. (Kutollo 19:14) Modimo o diriša mmala o mošweu go gatelela gore o ikemišeditše go lebalela dibe ge a re: “Le ge dibe tša lena di ka hwibila go etša madi, di tla šweufala go etša kapoko.”—Jesaya 1:18.

GO DIRIŠWA GA MMALA BAKENG SA GO GOPOLA

Beibele ge e diriša mmala e bontšha kamoo Modimo a kwešišago tsela yeo batho ba ikwago ka yona ka mebala. Ka mohlala, puku ya Beibele ya Kutollo e boletše e sa le pele ka maemo a re lebanago le ona ga bjale, go akaretša ntwa, tlala gotee le mahu ao e sego a tlhago ao a bakwago ke tlhaelelo ya dijo le mauba a malwetši. Bakeng sa go re thuša go gopola se, pono e makatšago e re botša ka banamedi ba dipere—e sego dipere tšeo di tlwaelegilego eupša tšeo di nago le mebala.

Sa pele, go na le pere e tšhweu, yeo e emelago ntwa ya toko ya Kriste Jesu. Gape, re bona pere ya mmala wa bohwibidu bja mollo, yeo e emelago ntwa magareng ga ditšhaba. Pere ye e latelwa ke pere e ntsho wa go tšhoša, yeo e emelago tlala. Ke moka re bona “pere e tshehla; yo a e nametšego o bitšwa Lehu.” (Kutollo 6:1-8) Mmala wa pere e nngwe le e nngwe o ka dira gore maikwelo a rena a sepedišane le seo dipere tšeo di se emelago. Re ka gopola gabonolo dipere tše tša mebala le seo di re rutago sona ka mehla ya rena.

Go na le mehlala e mentši ka Beibeleng ya go dirišwa ga mmala bakeng sa go hlalosa dilo gabotse. Ee, Mmopi wa seetša, mmala le leihlo la motho, o diriša mmala ka bokgoni e le sedirišwa sa go ruta bakeng sa go tšweletša diswantšho tšeo babadi ba di kwešišago le go di gopola. Mmala o re thuša go kgoboketša le go tšweletša tsebišo. Mmala o kgoma maikwelo a rena. Mmala o ka re thuša go gopola dikgopolo tša bohlokwa. Mmala ke mpho e lerato e tšwago go Mmopi wa rena bakeng sa go re thuša go thabela bophelo.