Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI OCTOBER 2013

 TABA YA LETLAKALA LA KA NTLE | BEIBELE E BOLELA KA ENG?

“Re Hweditše Mesia”!

“Re Hweditše Mesia”!

Mo e ka bago nywagakgolo e mene ka morago ga gore go ngwalwe puku ya mafelelo ya Beibele ya karolo ya mangwalo a Seheberu, go ile gwa phethagala boporofeta bja Mika bja mabapi le Mesia: Jesu o ile a belegelwa Betlelehema. Ka morago ga nywaga e ka bago e 30, ka 29 C.E., go ile gwa phethagala karolo ya mathomo ya boporofeta bja Daniele mabapi le go tla ga Mesia. Jesu o ile a kolobetšwa gomme Modimo a mo tlotša ka moya o mokgethwa. Mesia yo e bego e le kgale a letilwe, yena Peu, o ile a fihla ka nako e swanetšego!

Gateetee Jesu o ile a thoma bodiredi bja gagwe, a “tsebatša ditaba tše dibotse tša Mmušo wa Modimo.” (Luke 8:1) Bjalo ka ge go be go porofetilwe, Jesu o ile a ba yo botho, yo bonolo le yo a tlogago a tshwenyega ka ba bangwe. Thuto ya gagwe e be e le e šomago le e lerato, e bile a fodiša “mohuta o mongwe le o mongwe wa bolwetši” bathong, a bontšha gore Modimo o be a na le yena. (Mateo 4:23) Batho ba nywaga ka moka ba be ba kgeregela go Jesu gomme ba phetha ka gore: “Re hweditše Mesia”!—Johane 1:41.

Jesu o ile a bolela e sa le pele gore pejana ga ge Mmušo wa gagwe o ka buša ka mo go feletšego, lefaseng go be go tla ba le dintwa, ditšhišinyego tša lefase le mathata a mangwe a mantši. O ile a kgothaletša bohle gore ba ‘dule ba phakgame.’—Mareka 13:37.

Jesu e be e le motho yo a phethagetšego yo a ilego a dula a ekwa Modimo, eupša o be a na le manaba ao mafelelong a ilego a mmolaya. Ka gona lehu la gagwe e bile sehlabelo seo se phethagetšego sa go re rekollela seo se bego se lahlegetše Adama le Efa, e lego tebelelo ya bophelo bjo bo sa felego Paradeiseng.

Lehu la Jesu le phethagaditše boporofeta, go etša ge go bile bjalo ge Modimo a be a tsoša Jesu e le sebopiwa sa moya ka morago ga matšatši a mararo. Ke moka Jesu o ile a tšwelela go barutiwa ba gagwe ba ka godimo ga 500. Pele ga ge Jesu a rotogela legodimong, o ile a laela balatedi ba gagwe gore ba išetše “batho ba ditšhaba ka moka” ditaba tše dibotse tša mabapi le yena le Mmušo wa gagwe. (Mateo 28:19) Ba ile ba phetha kabelo yeo ka botlalo gakaaka’ng?

E theilwe go Mateo, Mareka, Luka, Johane le 1 Bakorinthe.