Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  October 2013

 BEIBELE E FETOŠA MAPHELO

“Batho ba Bantši ba be ba Ntlhoile”

“Batho ba Bantši ba be ba Ntlhoile”
  • NGWAGA WA MATSWALO: 1978

  • NAGA: CHILE

  • BOPHELO BJA PELE E EBA MOKRISTE: GO BA ŠORO KA MO GO FETELETŠEGO

BOPHELO BJA KA BJA NAKONG E FETILEGO:

Ke goletše kua Santiago, motsemošate wa Chile, tikologong yeo dihlaretagi, dihlopha tša disenyi gotee le bosenyi di bego di atile. Tate o ile a bolawa ge ke be ke na le nywaga e mehlano. Ka morago ga moo, mma o ile a dula le monna yoo a bego a le sehlogo. O be a re betha ka mehla. Ke sa dutše ke na le mabadi a maikwelo a nywageng yeo.

Ge ke dutše ke gola, ke ile ka tutuetšwa ke mekgwa e mebe gomme ka ba yo šoro ka mo go feteletšego. Ke be ke theetša mmino wa moretheto o matla, ke enwa ka mo go feteletšego gomme ka dinako tše dingwe ke kgoga dihlaretagi. Ke be ke fela ke elwa le batho bao ba gwebago ka dihlaretagi, bao ka makga a mmalwa ba ilego ba leka go ntloša tšatšing. Ka lekga le lengwe, sehlopha se sengwe sa disenyi se ile sa hira sesenyi se se tumilego gore se mpolaye, eupša ke ile ka kgona go phonyokga ke hlabilwe gatee feela. Lebakeng le lengwe sehlopha se sengwe sa go gweba ka dihlaretagi se ile sa ntšhupa ka sethunya hlogong sa ba sa leka go mphega.

Ka 1996, ke ile ka thoma go ratana le kgarebe yeo e bitšwago Carolina, gomme ka 1998 ra nyalana. Ka morago ga gore morwa rena wa mathomo a belegwe, ke ile ka tšhoga gore ka baka la bogale bja ka, ke be nka swana le tate wa ka wa mogodiši gomme ka swara lapa la ka gampe. Ka gona ke ile ka tsoma thušo lefelong la go kgopamolla mekgwa la tikologong ya gešo. Ke ile ka newa dihlare gotee le kalafo yeo e sa dirišego dihlare eupša ga se tša ka tša nthuša. Ke ile ka tšwela pele ke galefišwa ke selo le ge e le sefe se senyenyane; ke be ke sa kgone go itshwara. E le ge ke leka ka tsela e fošagetšego go se sa tlaiša lapa la ka, ke ile ka leka go ipolaya. Se se kgahlišago ke gore ga se ka atlega.

Ke tšere nywaga e mentši ke le moilamodimo eupša ke be ke nyaka go dumela go Modimo. Ka gona ke ile ka thoma go ikgokaganya le bodumedi bja boebangedi ka nakwana. Ka nako yeo, mosadi wa ka o be a ithuta Beibele le Dihlatse tša Jehofa. Ke be ke hloile Dihlatse tša Jehofa gomme gantši ke be ke di roga. Eupša di be di nkaraba ka boleta, e lego seo ke bego ke sa se letela.

Ka letšatši le lengwe, Carolina o ile a nkgopela gore ke bale Psalme 83:18 ka Beibeleng ya ka. Temana yeo e bontšha ka go lebanya gore leina la Modimo ke Jehofa. Ke be ke makaditšwe ke  go lemoga gore bodumeding bja ka ke be ke rutilwe ka modimo, eupša e sego ka Jehofa. Mathomong a ngwaga wa 2000, le nna ke ile ka thoma go ithuta Beibele le Dihlatse.

KAMOO BEIBELE E FETOTŠEGO BOPHELO BJA KA:

Ge ke dutše ke dira tšwelopele, ke ile ka homotšwa ke go ithuta gore Jehofa ke Modimo yo a šokelago le yo a lebalelago. Ka mohlala, go Ekisodo 34:6, 7, Beibele e hlalosa Jehofa e le “Modimo yo a gaugelago le yo a šokelago, yo a diegago go galefa, yo a tletšego botho le therešo, yo a bolokelago ba dikete botho bja gagwe, yo a swarelago molato, karogo le sebe.”

Ke ile ka homotšwa ke go ithuta gore Jehofa ke Modimo yo a šokelago le yo a lebalelago

Go sa šetšwe seo, go be go se bonolo go diriša seo ke bego ke ithuta sona. Ke be ke kgodišegile gore ke be nka se tsoge ke kgonne go laola bogale bja ka. Nako le nako ge ke be ke palelwa, Carolina o be a nkgothatša ka lerato. O be a nkgopotša gore Jehofa o be a bona maiteko ao ke a dirago. Thekgo ya gagwe e be e nnea matla a gore ke tšwele pele ke leka go kgahliša Jehofa, gaešita le ge ke be ke fela ke ikwa eka nka se atlege.

Ka letšatši le lengwe, Alejandro e lego motho yo a bego a ithuta Beibele le nna, o ile a nkgopela gore ke bale Bagalatia 5:22, 23. Ditemana tšeo di re dika tšeo di enywago ke moya wa Modimo ke “lerato, lethabo, khutšo, go se fele pelo, botho, toko, tumelo, boleta le boitshwaro.” Alejandro o ile a hlalosa gore e le gore ke kgone go bontšha dika tšeo, ke swanetše go ithekga ka moya o mokgethwa wa Modimo e sego ka matla a ka. Therešo yeo e ile ya fetoša pono ya ka ka mo go feletšego!

Ka morago, ke ile ka ya kopanong e kgolo ya Dihlatse tša Jehofa. Thulaganyo, bohlweki le segwera tšeo ke di bonego moo di ile tša nkgodiša gore ke hweditše bodumedi bja therešo. (Johane 13:34, 35) Ke ile ka kolobetšwa ka February 2001.

KAMOO KE ILEGO KA HOLEGA KA GONA:

Jehofa o ile a mphetola gore ke se sa ba motho yo šoro eupša ke be yo a nago le khutšo. Ke ikwa eka o nntšhitše lerageng leo le bego le ntatše. Batho ba bantši ba be ba ntlhoile eupša ga ke ba sole. Lega go le bjalo, ga bjale ke thabela go hlankela Jehofa ka khutšo ke na le mosadi wa ka le barwa ba rena ba babedi.

Ba leloko gotee le bagwera ba ka ba nakong e fetilego ga ba kgolwe tsela yeo ke fetogilego ka yona. Ka baka la seo, ba bangwe ba bona ba bontšhitše kgahlego ya go ithuta therešo ya Beibele. Gape ke bile le tokelo ya go thuša ba bangwe gore ba tsebe Jehofa. Ruri ke tloga ke thabetše go bona therešo ya Beibele e fetoša maphelo a bona ka mo go swanago!