Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI SEPTEMBER 2013

 RUTA BANA BA GAGO

Modimo a ka kwa Bohloko—Kamoo re ka mo Thabišago ka Gona

Modimo a ka kwa Bohloko—Kamoo re ka mo Thabišago ka Gona

Na o kile wa kwa bohloko kudu moo o ilego wa ba wa lla? * Ka moka ga rena re ka ba re kile ra ikwa bjalo. Lega go le bjalo, ka dinako tše dingwe, re ka no se kwešwe bohloko mmeleng. Motho yo mongwe a ka bolela dilo tše mpe ka rena tšeo e sego tša therešo. Seo se ka re kweša bohloko, akere?— Modimo le yena a ka kwa bohloko ge go bolelwa maaka ka yena. Anke re bolele ka se gomme re bone gore re ka thabiša Modimo bjang go e na le go mo kweša bohloko.

Beibele e re batho ba bangwe bao ba bego ba re ba rata Modimo ba ile ba “mo kweša bohloko.” Ee, ba ile ‘ba kweša Modimo bohloko’! Ke therešo gore ga go yo a ka kwešago mmele wa Jehofa Modimo bohloko. Ke yo matla ohle. Ka gona, anke re bone gore ke ka baka la eng Jehofa a ekwa bohloko ge re sa dire seo a rego re se dire.

Batho ba babedi ba pele bao Jehofa a ba bopilego mo lefaseng ba ile ba mo kweša bohloko kudu. Ba babedi ba ba ile ba bewa Paradeiseng mo lefaseng yeo e bitšwago ‘serapa sa Edene.’ Batho bao ba babedi e be e le bomang?— Ee, e be e le Adama gomme gwa latela Efa. Anke re bone gore ba dirile eng seo se ilego sa kweša Jehofa bohloko.

Ka morago ga gore Jehofa a ba bee serapeng seo, o ile a ba botša gore ba se hlokomele. Le gona o ile a ba botša gore ba ka ba le bana le go dula mmogo serapeng seo ba sa hwe. Eupša pele ga ge Adama le Efa ba ka ba le bana, go ile gwa direga selo sa go tšhoša. Na o tseba gore selo seo e be e le eng?— Morongwa o ile a tutuetša Efa gomme ka morago a tutuetša le Adama gore a se kwe Jehofa. Anke re bone gore se se diragetše bjang.

Morongwa o ile a dira gore noga e bonagale eka e a bolela. Efa o ile a thabela seo a se kwelego—noga  e be e itše o tla “swana le Modimo.” Ka gona o ile a dira seo noga e mmoditšego gore a se dire. Na o tseba gore selo seo e be e le eng?

Efa o ile a ja seenywa sa sehlare seo Jehofa a bego a boditše Adama gore ba se je tša sona. Pele Modimo a bopa Efa, o be a boditše Adama gore: “O ka ja wa ba wa kgotsofala ka se se tšwago sehlareng se sengwe le se sengwe sa mo serapeng. Eupša ge e le sehlare sa go tseba botse le bobe o se ke wa ja tša sona, gobane mohlang o ka jago tša sona o tla hwa lehu.”

Efa o be a tseba molao woo. Lega go le bjalo, o ile a tšwela pele a lebeletše sehlare seo, gomme a se bona “se loketše go ka jewa le gore ke selo se se kganyogwago ke mahlo . . . Ka gona mosadi a fula seenywa sa sona a se ja.” Ka morago o ile a nea Adama seenywa seo, gomme “le yena a ja.” O nagana gore ke ka baka la’ng a dirile seo?— E be e le ka gobane Adama o be a rata Efa kudu go feta go rata Jehofa. O ile a kgetha go mo thabiša go e na le go thabiša Modimo. Eupša go kwa Jehofa go bohlokwa kudu go feta go kwa motho le ge e ka ba ofe!

Na o sa gopola noga yeo e boletšego le Efa? Go etša ge motho a ka dira gore popi e bonagale eka e a bolela, go na le motho yo a dirilego gore noga yeo e bonagale eka e a bolela. Lentšu leo le bego le etšwa go noga e be e le la mang?— E be e le lentšu la “noga ya kgale yeo e bitšwago Diabolo le Sathane.”

Na o a tseba gore o ka thabiša Jehofa bjang?— O ka dira seo ka go dula o leka go mo kwa. Sathane o re a ka dira gore batho ka moka ba dire seo yena a se nyakago. Ka gona Jehofa o re botša seo a re kgothaletšago sona ka gore: “Morwa [goba morwedi] wa ka, hlalefa gomme o thabiše pelo ya ka, gore ke kgone go fetola yo a nkwerago.” Sathane o kwera Jehofa. O re a ka dira gore batho ka moka ba tlogele go Mo hlankela. Ka gona thabiša Jehofa ka go mo kwa le go mo hlankela! Na o tla leka ka matla go dira seo?

^ ser. 3 Ge e ba o bala le ngwana, thaladi ke ya go go gopotša gore o khutše gomme o kgothaletše ngwana go ntšha sa mafahleng.