Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI SEPTEMBER 2013

 BATAMELA KGAUSWI LE MODIMO

“Modimo o Rata Monei yo a Neago ka go Hlalala”

“Modimo o Rata Monei yo a Neago ka go Hlalala”

Ke mpho ya mohuta ofe yeo o ka e lebogago go tšwa pelong? Ga go pelaelo gore bontši bja rena re ka thabela go amogela mpho yeo monei wa yona a tutueditšwego ke lerato go e na le go ithola kgwara goba go phetha tlamo. Ge go tliwa tabeng ya go nea, maikemišetšo a bohlokwa. A bohlokwa go rena. E bile sa bohlokwa kudu ke gore a bohlokwa le go Modimo. Ela hloko mantšu a buduletšwego a moapostola Paulo a begilwego go 2 Bakorinthe 9:7.

Ke ka baka la’ng Paulo a ile a ngwala mantšu ao? O be a nyaka go kgothaletša Bakriste ba kua Korinthe go thekga modiro wa tlhakodišo bakeng sa badumedigotee le bona bao ba bego ba diila ba kua Judea. Na o ile a leka go gapeletša Bakorinthe go nea? Go e na le gore a ba gapeletše, o ile a ngwala gore: “Anke yo mongwe le yo mongwe a dire feela kamoo a phethilego ka gona pelong ya gagwe, e sego ka go kgokgona goba ka go gapeletšwa, gobane Modimo o rata monei yo a neago ka go hlalala.” Anke re hlahlobišišeng keletšo yeo.

“Feela kamoo a phethilego ka gona pelong ya gagwe.” Paulo o re Mokriste wa kgonthe o nea ka gobane a phethile “pelong ya gagwe” go dira seo. Ka nako e swanago, Mokriste o naganišiša ka dinyakwa tša barapedigotee le yena. Seithuti se sengwe se re lentšu la leleme la mathomong leo le fetoletšwego e le “phethilego” “le na le kgopolo ya go rulaganya e sa le pele.” Ka gona, Mokriste o naganišiša ka dinyakwa tša badumedigotee le yena gomme a ipotšiša seo a ka se dirago go kgotsofatša dinyakwa tšeo.—1 Johane 3:17.

“E sego ka go kgokgona goba ka go gapeletšwa.” Paulo o bolela ka mehuta e mebedi ya go nea yeo Bakriste ba therešo ba swanetšego go e efoga—go nea ka go dikadika le ka go gapeletšwa. Polelwana ya Segerika yeo e fetoletšwego e le “ka go kgokgona” ka go lebanya e bolela “ka go nyama.” Puku e nngwe ya ditšhupetšo e re monei yo a kgokgonago goba yo a dikadikago o nea “go tšwa pelong yeo e nyamišitšwego ke kgopolo ya gore o kgaogana le tšhelete.” Monei yo a gapeletšwago o nea ka gobane o ikwa a gapeletšega go dira seo. Ge e le gabotse ke mang gare ga rena yo a nyakago go amogela mpho yeo e tšwago go monei yo a kgokgonago goba yo a gapeletšwago?

“Modimo o rata monei yo a neago ka go hlalala.” Paulo o re gateetee ge Mokriste a dira phetho ya go nea, o swanetše go dira seo ka go hlalala goba ka go thaba. Ge e le gabotse, lethabo le tlišwa ke ge tutuetšo ya motho ya go nea e nepagetše. (Ditiro 20:35) Lethabo la monei yo a neago ka go hlalala le bonwa ke bohle. Ge e le gabotse, lentšu “go hlalala” le ka hlalosa gabotse maikwelo a ka gare le pontšho ya ka ntle ya monei. Monei yo a neago ka go hlalala o kgoma dipelo tša rena. E bile o thabiša pelo ya Modimo. Phetolelo e nngwe e re: “Modimo o rata batho bao ba ratago go nea.”—Contemporary English Version.

“Modimo o rata batho bao ba ratago go nea”

Mantšu ao a buduletšwego a moapostola Paulo ke molao wa motheo wo o hlahlago Bakriste tabeng ya go nea. Go sa šetšwe gore re gafa nako ya rena, matla a rena goba dithoto, anke re direng seo ka go rata le ka gobane re thaba e le ka kgonthe ge re nea ba bangwe ka seatla se se bulegilego, kudukudu bao ba diilago. Ga se feela gore go nea mo go bjalo go tla dira gore re thabe eupša gape go tla dira gore re ratwe ke Modimo, ka ge a “rata monei yo a neago ka go hlalala.”

Mmalo wa Beibele o šišintšwego bakeng sa September

Bakorinthe ba Pele le ba Bobedi