Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI SEPTEMBER 2013

Tlaišego e Kgauswi le go Fela!

Tlaišego e Kgauswi le go Fela!

Akanya o phela lefaseng leo le se nago tlaišego—lefase leo le se nago bosenyi, ntwa, bolwetši le dikotsi tša tlhago. Akanya o tsoga mesong e mengwe le e mengwe o sa tshwenyege ka kgethollo, kgatelelo goba go se tsepame ga maemo a boiphedišo. Na go thata go dumela tše ka moka? Ke therešo gore ga go na motho goba mokgatlo wo o dirilwego ke motho wo o ka tlišago maemo a bjalo. Eupša Modimo o holofeditše go fediša dibaki ka moka tša go tlaišega ga batho, go akaretša le tšeo di ahlaahlilwego sehlogong se se fetilego. Ela hloko dikholofetšo tše di latelago tšeo di tšwago Lentšung la Modimo, Beibele:

PUŠO YA MMUŠO WA GO LOKA

“Modimo wa legodimo o tla hloma mmušo wo o ka se kego wa fedišwa. Mmušo woo o ka se ke wa fetišetšwa go batho ba bangwe. O tla pšhatlaganya mebušo ye ka moka wa e fediša gomme wona o tla ema go iša mehleng ya neng le neng.”—Daniele 2:44.

Mmušo wa Modimo ke pušo ya legodimong. Mmuši wa wona yo a kgethilwego, Jesu Kriste, o tla tšea sebaka sa pušo ka moka ya batho gomme a kgonthišetša gore thato ya Modimo ga e dirwe feela legodimong eupša e dirwa le mo lefaseng. (Mateo 6:9, 10) Pušo ye e ka se tšeelwe sebaka ke pušo le ge e le efe ya batho ka gobane ke “[mmušo] o sa felego wa Morena le Mophološi wa rena Jesu Kriste.” Ruri khutšo ya ka mo go sa felego e tla ba ya kgonthe.—2 Petro 1:11.

GO KA SE SA BA LE BODUMEDI BJA MAAKA

“Sathane ka boyena o dula a itira morongwa wa seetša. Ka baka leo ga go makatše ge e ba badiredi ba gagwe le bona ba dula ba itira badiredi ba toko. Eupša pheletšo ya bona e tla ba go ya ka mediro ya bona.”—2 Bakorinthe 11:14, 15.

Go tla ba pepeneneng gore bodumedi bja maaka ke modiro wa Diabolo gomme bo tla fedišwa lefaseng. Kgethollo ka moka ya bodumedi le tšhollo ya madi di tla be di se sa le gona. Se se tla dira gore batho ka moka bao ba ratago “Modimo yo a phelago” ba mo rapele ka “tumelo e tee” le “ka moya le ka therešo.” Se se tla feleletša ka khutšo le botee!—1 Bathesalonika 1:9; Baefeso 4:5; Johane 4:23.

GO SE PHETHAGALE GA BATHO GO KA SE SA BA GONA

“Modimo ka noši o tla ba le bona. O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:3, 4.

Jehofa Modimo o dira gore se se kgonege ka Morwa wa gagwe, Jesu, yo a ilego a gafa bophelo bja gagwe  bakeng sa lefase la batho. (Johane 3:16) Ka tlase ga tlhahlo ya Jesu, batho ba tla bušetšwa phethegong. Go ka se sa ba le tlaišego le ge e le efe ka gobane “Modimo ka noši o tla ba le bona” gomme a phumola “megokgo ka moka mahlong a bona.” Kgauswinyane, go se phethagale ga batho le tlaišego di tla be di se sa le gona; “baloki bona e tla ba beng ba lefase, ba tla dula mo go lona ka mo go sa felego.”—Psalme 37:29.

MEOYA E KGOPO E TLA BE E SE SA LE GONA

“A [Jesu Kriste] swara drakone noga ya kgale, yeo e lego Diabolo le Sathane, a e tlema ka nywaga e sekete (1 000). A e lahlela sekoting a se tswalela gomme a bea seka godimo ga sona, gore e se ke ya hlwa e timetša ditšhaba.”—Kutollo 20:2, 3.

Tutuetšo ka moka ya Sathane e tla be e se sa le gona ge yena le batemona ba gagwe ba tlemilwe e bile ba lahletšwe “sekoting,” e lego boemo bja go se dire selo ka mo go feletšego. Ba ka se sa ba le tutuetšo e mpe ditirong tša batho. Ruri e tla ba kimologo e kgolo go phela lefaseng leo le se nago tutuetšo ya Sathane le meoya e kgopo!

‘MEHLA YA BOFELO’ E TLA BE E FETILE

‘Mehla ya bofelo’ e tla fela ge go fela seo Jesu a se biditšego “masetlapelo a magolo.” O itše: “Go tla ba le masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape.”—Mateo 24:21.

Masetlapelo ao e tla ba a magolo ka kgopolo ya gore go tla ba le dikotsi tšeo di sa kago tša ba gona. Dikotsi tše di tla feleletša ka “[ntwa] ya letšatši le legolo la Modimo Ramatlaohle,” yeo e tsebjago gabotse e le “Haramagedone.”—Kutollo 16:14, 16, mongwalo wa ka tlase wa Reference Bible.

Batho kae le kae bao ba ratago go dira se se lokilego ba fagahletše bofelo bja tshepedišo ye e kgopo ya dilo. Ela hloko tše sego kae tša ditšhegofatšo tšeo di ba letetšego ka tlase ga Mmušo wa Modimo.

MODIMO O TLA DIRA DILO TŠE DINGWE TŠE DINTŠI!

“Lešaba le legolo” le tla phološetšwa lefaseng le lefsa la khutšo: Lentšu la Modimo le re palo e kgolo kudu ya “lešaba le legolo” la batho e tla ba “bao ba tšwago masetlapelong a magolo” gomme ba tla tsena ba phela lefaseng le lefsa la go loka. (Kutollo 7:9, 10, 14; 2 Petro 3:13) Ba tla bolela gore phološo ya bona e tšwa go Jesu Kriste, “Kwana ya Modimo yeo e tlošago sebe sa lefase.”—Johane 1:29.

Thuto ya Modimo e tla tliša mehola e megolo: Lefaseng le lefsa, “lefase le tla tlala tsebo ya Jehofa.” (Jesaya 11:9) Thuto ye ya Modimo e tla akaretša tlhahlo mabapi le tsela ya go phela ka khutšo le batho ka moka le go ya ka maemo a tikologo. Modimo o holofetša gore: “Nna, Jehofa, ke Modimo wa lena, Yo a le rutago gore le holege, Yo a le sepedišago tseleng yeo le swanetšego go sepela ka yona.”—Jesaya 48:17.

Baratiwa bao ba hwilego ba tla tsošwa mabitleng: Ge Jesu a be a sa le lefaseng, o ile a tsoša mogwera wa gagwe Latsaro bahung. (Johane 11:1, 5, 38-44) Ka go re’alo o ile a bontšha seo a bego a tla se dira ka tekanyo e kgolo ka tlase ga thulaganyo ya Mmušo wa Modimo.—Johane 5:28, 29.

Khutšo le toko di tla ba gona ka mo go sa felego: Ka tlase ga pušo ya Kriste, go hloka molao go tla be go se sa le gona. Re tseba seo bjang? Ka gobane Jesu o kgona go bala dipelo gomme o tla diriša bokgoni bjoo go ahlola ba ba lokilego le ba kgopo. Bao ba ganago go fetoša ditsela tša bona tše kgopo ba ka se dumelelwe go phela lefaseng le lefsa la Modimo.—Psalme 37:9, 10; Jesaya 11:3, 4; 65:20; Mateo 9:4.

Re ahlaahlile tše sego kae tša diporofeto tše dintši tša Beibele tšeo di bolelago ka nako e botse yeo e sa tlago. Ge Mmušo wa Modimo o buša lefaseng, ‘go tla ata khutšo’ ka mo go sa felego. (Psalme 37:11, 29) Dibaki ka moka tša bohloko le tlaišego tšeo di tshwentšego batho di tla fedišwa. Lentšu la Modimo le hlatsela se ge le re: “Bonang! Dilo ka moka ke di dira tše mpsha. . . . Mantšu a a botega e bile ke a therešo.”—Kutollo 21:5.